Hkam Kaja Hkra Nga Na

Masha langai galoi mung hkam kaja nga lu na matu ra ahkyak ai npawt madung lam ni gaw san seng ai nbung hpe chyu ra ai.San seng ai hka lu ra ai,hkamja shangun ai lusha ni hpe sha ra ai.Hkum hkrang shamu shamawt lam nga ra ai.Yup hkru hkru yup na ra ai.Hkamja lam hte htuk ai hku bu hpun sumraw chye ra ai.Hkum hkrang dung ai,tsap ai hkrang jaw ai hku nga ra ai.San seng san pan lam nga ra ai.Myit hpe asan sha tawn da chye ra ai lam ni lawm nga ai re.

Masha langai asak hkrung nga lu na matu minute,second shagu ahkyak ai gaw nbung rai nga ai.Asak hte hkum hkrang grin nga lu na matu hkum hkrang kata na sai ni shamu shamawt gin rawn hkawm ai hpe nbung gaw grai madi shadaw garum ya ra ai rai nga ai.

Dai majaw hkam kaja lam a matu san seng ai nbung chyu ra ai ngu ai hta hkum hkrang kata chyu marawp bang dat ai nbung gaw san seng ai nbung rai yang she hkamja ai akyu hpe jaw ya lu nga ai.Hkum hkrang kata na sinwawp gaw san seng ai nbung hta lawm ai oxygen hpe sha ra nga ai.Dai re majaw san seng ai nbung hpe aten shagu hta ra kadawn nga ga ai re.

Masha nkau mi gaw nbung katsi bung yang nga npyaw,machyi makaw byin wa chye ai ngu hkap la nna nta hkuwawt chyinghka ni pat da nna rawng nga chye ai.San seng ai nbung gaw ana ahkya galoi nbyin shangun nga ai.Dum nta langai hta nbung pru pru shang shang kaja na grai ahkyak nga ai.Dum nta kata na maza mala ni,grai gyip kaji ai gawk kata na nbung maza ni mahtang she masha ni a hkamja lam hpe hkra mahcyi shangun ya taw nga ai re.

Dai majaw dum nta masha yawng hkam kaja nga lu na matu tinang shanu rawng ai dum nta gaw nbung pru pru shang shang kaja na grai ra ahkyak nga ai.Nbung pru pru shang shang kaja hkra galaw nan galaw da ra na ga ai re.Bai nbung kaja law law  marawp chyu lu na matu dum nta shinggan de law law nga ya na mung ra ai.San seng ai nbung kaja  hpe lu marawp chyu ai a marang e ana ahkya law law hpe pyi mai tsai mat shangun lu nga ai.

San seng ai nbung kaja gaw hkamja lam a matu manu dan ai daram aten shagu mung aloi ali hte lu la mai ga ai re.Nbung kaja nlu  chyu ai masha gaw hkamja lam hta hkra machyi ningra wa na teng sha rai nga ai.Dai majaw tinang shanu rawng nga ai dum nta hta nbung pru pru shang shang kaja hkra tawn da nna,makau grupyin hta mung manam shagram lam nbyin hkra san san seng seng galaw da rai nna san seng kaja ai nbung hpe chyu marawp nna hkum hkrang myit masin ngwi pyaw hkam kaja ai akyu hpe hkam la nga ga law.

Lamang tang madun ai - Julia Ja Ing