Hka Ge Ntsin Hpe Shadawn Sharam Rai Lu Ga

Jan grai kahtet ai ten hta a katsi nga ai hka ge ntsin lu dat ai gaw jahkring mi na aten laman hta kahtet ai hkam sha lam hpe shayawm kau ya nna masha hpe grai nan nga pyaw shangun lu ai majaw masha law law wa hka ge ntsin tam lu chye nga ga ai.

Raitim hka ge ntsin gaw hkamja lam hpe kade daram du hkra,jam jau jaw,hkra machyi shangun lu ai hpe gaw nau wa ndum sawn chye ga ai re.Hka ge ntsin lu ai gaw  lusha rin shamyit ai lam hpe ahtu hkra machyi shangun ai.Sai lam lasa ni hpe kaji chyum mat shangun ai hte hkam jan lu na hkum chying n-gun yawm mat shangun ai lam ni byin wa chye nga ai.

Hka ge ntsin lu ai majaw byin wa lu ai hkra machyi lam ni hpe hka ja yu ai shaloi

1)Sau shajan ni law wa ai – hpa majaw kun nga yang  hka ge ntsin lu dat ai shaloi hkum hkrang hta  kahtet shadang yawm mat ai majaw sau ni majaw rawng wa nna lusha rin mani ai hta grau yak hkak wa ai rai nga ai.

2)Kan chyat shangun ai – hka law law lu ai gaw lusha rin shamyit ai hta garum ya lu ai nga nna tsun ai rai tim hka ge ntsin hpe lu ai rai yang gaw kan chyat ai mang hkang byin wa lu ai.Hpa majaw nga yang hka ge ntsin gaw sha bang ai lusha ni hpe mung ja ge mat shangun nna rin mani na yak hkak wa ai zawn pu ni kaw nna sha bang ai malu masha ni hpe ra ang ai shara de nlu sa bang ya ai shaloi kan chyat ai lam byin wa ai rai nga ai.

3)Hka dat jahpring ai hta dingbai dingna byin shangun ai – hka ge ntsin lu dat ai shaloi hkum hkrang a hka dat chyup marawp la ai lam shawoi na hta grau lakyin gau ngwi mat ai.Hkum hkrang gaw hka ge ntsin hpe kahtet dat rawt jat hkra shawng galaw nna she hkum hkrang a matu ra kadawn ai hka dat hku nna gale dat ya ai rai nga ai..

4) Tsam n-gun hpe shayawm kau ya ai – a lagyi nga ai hka ge ntsin hpe lu bang dat ai gaw grai ba hkoi mat ai zawn nga hkam sha lu ai raitim dai gaw jahkring mi a matu sha rai nga ai.Aten galu a matu gaw n-gun atsam yawm mat ai zawn nga hkam sha wa chye nga ai.

5) Lusha rin shamyit ai hta nru nra byin shangun ai – hka ge ntsin lu ai gaw kan machyi ai,nbung hta ai,kanying kanyung nga ai lam ni hpe byin shangun lu ai. Hka ge ntsin a jamjau jaw akyu yawm shangun ai lam bai langai mi gaw hka ge ntsin shat kan de du shang wa ai shaloi shat kan a lusha rin shamyit ai magam hta grau nna yak hkak shangun ai rai nga ai.

Dai re majaw tsawra ai shiga madat nu wa hpu nau ni ya na zawn kahtet la ai aten ni hta hka ge ntsin lu dat yang she ba hkoi ai zawn nga hkam sha lu ai raitim hka ge ntsin grai law lu ai gaw hkam kaja lam hpe grai hkra machyi shangun ai re majaw hka hpun lum shing nrai yu maya hka san hka katsi ni hpe madung lu nna hkam kaja ai akyu hpe hkam la nga ga.

Yu maya hka katsi shing nrai hka hpun lum hpe lu nna lu la mai ai akyu nkau mi hpe tsun ga nga yang hka dat jahpring ya lu ai.Shingra lusha rin shamyit emzyme ni hpe jasu alun ya ai majaw lusha rin mani kaja shangun ai,pu kaba shamu shamawt magam hpe grau kaja shangun ai,sai san seng nna hpyi,sade,sai hpraw di ni kaw nna maza mala  gung ni hpe la shapraw kau ya ai akyu ni hpe lu la mai ai ngu tsun shadum garan kachyan ya dat lu ga ai.

By - Julia Ja Ing