Gwi Ai Lam Kaja Yang

Tsawra hkungga ai shiga madat nu wa hpunau ni ndai lamang hta gaw Wajau Paul Lasang La ka lajang tawn da ai Masha Atsam ngu ai laika buk hta na “Gwi Ai Lam Kaja Yang” ngu ai ga baw hte bai garan kachyan ya mayu ai.

Hpa baw tsun mayu ai rai a ta nga yang ,Galaw shut na hpe hkrit tsang ai majaw masha law law wa shanhte lu ai lapyin atsam ni hpe kaja dik ai hku akyu n jashawn ai sha tawn da kau ma ai.Ga shadawn langai mi hpe tsun ga nga yang Lapyin atsam grai rawng ai America mung na dakkasu lak chyoi langai mi gaw ndai zawn re ai lam shi hta nga lu ai.Shi gaw Inglik laili laika hte laika ka ai lam hta tsun shara n nga hkra byin ai wa re.Shi a jawng ma law law mying kaba dan hkung ai laika ka ai lak chyoi ni tai wa masai.Dai gaw shi sharin ya ai masa a akyu rai nga ai.Rai tim shi hkum nan gaw laika shabawn langai mi pyi nka shapraw da ai.

Hpa majaw nga jang,ndai laika ka ai hta grai lapyin ai dakkasu lak chyoi wa gaw shi ka da ai laika hpe galoi mung tup hkrak myit nkrem ai majaw,dai hpe ndip shapraw da lu ai rai nga ai.Shi gaw galoi mung masha ni mara tam na hpe sha hkrit nga ai.Dai gaw n dum shami shi hpe jahten kau ai shi a gumrawng ai myit a nshat tai nga ai.Dai majaw shi dip shapraw lu na mau hpa laili laika ni law law mungkan masha ni hpe njaw ya lu sai.

Ndai zawn re ai gumrawng myit gaw ram ram law nga ai hte masha law law a lapyin atsam ni hpe hkap ban shingdang kau ya nga ai.Ndai zawn re ai mabyin lam ni anhte hta mung rawng chye nga ga ai.Mabyin bai langai mi hta gaw Wunpawng sha lahkawng Inglik ga sharin hpang ma ai.Shan gaw laika hti ai,lak chyoi hte rau ga shaga shaman ai hte rim da ai ga hpe madat la ma ai.Dai yan hta na langai wa gaw laika sharin gawk hta raitim,shinggan e raitim,Inglik ga lang na tsawm ai ten shagu hta,ndut ndang shaga ai.Shi shaga ai hta shut ai lam ni nga ai.Raitim dai ni hpe shi tatut sharai la ai.Dai hpang sharin la ai ga ni hpe lang na matu,shi aloi sha chye chyang wa ai.

Lahkawng ngu na jawngma mahtang,gaya ja ai wa re.Shi grai shakut ai.Raitim shi shaga na hkrit ai.Ngai hkoi wa mi shut nhten,masha ni ngai hpe mani na ra ai,ngu nna shi myit la ai.Dai majaw n shaga nmai ra nan ra wa ai shaloi sha shi Inglik ga shaga ai.Shaning law law na hkra,shi Inglik ga sharin la ai.Raitim dai gaw shi a baw  hta chyu sha rawng nga ai.Shi grai hkaja la tim,hkrak ga shaga  ai hta grai kung na n re,dai gaw shi hta atsam marai nrawng nna gaw nre,Shi shaga shut na hpe hkrit tsang ai myit mahtang gaw shi lu da ai atsam marai hpe n jai lang kau  shangun nga ai lam rai mat nga ai.Dai zawn re ai mabyin lam ni daini na ramma ni law law hta byin chye ai majaw awng dang lam nlu la shangun nga ai.

Anhte gaw mungkan a rawt galu kaba lam hpe hkan sharawng lawm na matu,anhte a lapyin atsam hpe jai lang ai hta gwi nan gwi ra ga ai.Anhte masha hkum shagu hta kalang mi pyi garai n jai lang yu ai grai kaba law htam ai n-gun atsam rawng nga ai.Masha law law gaw tinang hta rawng ai n-gun atsam mahkra hpe jai lang dat yang kade kaja ai amu galaw shapraw dat lu na ngu ai hpe n sumru yu nga ga ai.