Gawkngu Pu A Hkamja Lam Akyu Ni

Ginhtawng ta a shingra maka hpe shatsawm jahtap ya ai gawkngu pu gaw tsawm nna masha hpe myit pyaw lam jaw ya lu ai sha n-ga hkamja lam akyu hpe mung jaw ya lu ai hpe akyu jashawn jai lang chye ai masha ni nga ai zawn garai n chye ai masha ni mung law law nga na ga ai re. Gawkngu pu sha nrai, lap, asi, hpun hpyi, hpun mat hte hpun ru ni du hkra tsi tai ai lam hpe chye lu ai.

Ndai gawkngu pu, gawkngu si, gawkngu hpyi ni a lam hte seng nna myen mungding tsi chyum hta ka shaleng tsun tawn da ai gaw si gaw loi mi dwi dwi nga nna kan san ai akyu jaw lu ai hte n gup mu shangun ai. Lap gaw kya nna kan a matu kaja ai hte mahkak hpe dang lu ai. Pu gaw katsi nna loi hka ai, hkup ai rai nna nbung machyi, shagri machyi ai hte chyahkye shaw ana ni hpe dang lu ai. Shi a kata na paw  gaw dwi  nna nbung hpe dang ai akyu ni jaw lu ai lam tsun da nga ai.

Rai yang ndai gawkngu hpun gaw hkam kaja lam a matu kaning re ai akyu ni jaw ya lu ai re kun ngu ai hpe matut  hka ja yu ai shaloi gawkngu pu hpe kan chyat, kan shingdang ai lam hkyamsa na matu jai lang ya mai ai.  Gawkngu pu gaw lusha rin shamyit kaja nna kan kya na matu garum ya lu ai. Kan chyat yang gawkngu lap hkalung hpe shat mai ntsin shadu lu mai ai zawn shadu kaprawng kau nna sha  ai shing nrai shadu nna hpa hka lu ai  zawn mung lu ya mai ai. Dai re majaw kan chyat, kan shingdang lam chyahkring hkring sha byin chye ai masha ni rai yang gawkngu pu, gawkngu lap hkalung hpe akyu jashawn jai lang ga.  Atsawm chyoi chye ai mungding tsi sara ni hpe san la nna jai lang ai gaw grau kaja ai.

Hpyi hkamja lam a matu tsi tai ai – gawkngu lap hpe hpyi hta byin chye ai sumbraw, sumbram, maru hte kaga hpyi ana amyu myu a matu akyu jashawn jai lang mai nga ai. Gawkngu lap hpe htu mani abraw la nna hpyi gaya ai shara hta chya ya mai ai zawn gawkngu hpyi, ru hte si ni hpe mung garang chya ya mai ai.

Gawkngu pu a hkamja lam akyu bai langai mi gaw jahkru ai hpe mai tsai hkyamsa shangun lu ai hte hkum kahtet machyi yang mung jai lang mai ai. Gawkngu pu gaw nsa sa lam hpe hkamja shangun lu ai zawn hkum hkrang kata de kap bra ana ni n du shang wa hkra mung makawp maga ya lu ai, hkum chying n gun kaja na matu mung n gun jahpring ya lu ai.

Ladi pat nga n pyaw ai hpe hkyamsa shangun lu ai – gawkngu pu gaw ladi pat nga n pyaw ai hpe mung shamai shatsai ya lu nga ai. Nsa sa lam hta mahkak chyat rawng ai hpe jasan jaseng kau ya lu ai zawn bum ai hpe mung jasip kau ya lu ai.

Na machyi ai rai yang gawkngu hpun hkyep hpe hprang la nna shadu u, dai ntsin hpe na kata kahte bang ya jang mai tsai lu ai lam tsun da nga ai.

Salum hkam kaja ai – gawkngu pu gaw salum lasa ni hpe hkam kaja shangun lu ai zawn cholesterol hpe mung shayawm kau ya lu ai. Salum ana nbyin hkra makawp maga ya lu ai zawn sai lam kata sai pa gumdin ai lam n byin hkra mung makawp maga ya lu ai.

Jit ana hte seng nna akyu jashawn jai lang mai ai – gawkngu pu gaw jit sa hka hkaw kaja nna jit ana hte seng ai ana ni rai nga ai jit hti hti ai, jit sa yang kaprep ai, jit atsawm n sa ai hte jit sa lam hta ana kanu shang ai mang hkang ni a matu tsi mawan tai ya lu nga ai.Dai majaw jit hte seng ai mang hkang byin yang gawkngu pu hpe ntsin shadu lu mai ai zawn  jit shadang, jit hti hti ai rai yang gaw kata na paw hpe garang chya ya jang mai tsai lu ai lam tsun da nga ai.

Gawkngu pu a hkamja lam akyu bai langai mi gaw hkum hkrang kata na gung ni hpe jasan shaprai kau ya lu ai. Hpyi shan nsam tu tsawm ai hte salat bat manam ai hpe hkyamsa shangun lu ai akyu ni jaw ya lu nga ai.

Gawkngu pu hte gawkngu si ni gaw shingra tsi byin ai re nga tim anhte sadi ra na lam ni nga ai hpe chye da rag a ai. Gawkngu pu, gawkngu lap hte gawkngu si ni hpe katsing sha hkrup yang nang chye nga ai majaw katsing n sha ga ngu tsun shadum dat mayu ai. Bai nna tsi re nga nna  grai law mung hkum sha u, kan mase kan hten ai lam bai byin wa chye ai. Naw kaji ai ma ni hte ma hkum rai taw ai kanu num ni mung n sha ai kaja dik rai nga ai. Tinang hta ana lama ma nga ai majaw tsi dingrun lu taw ra ai masha ni mung grai law n mai lu na lam tsun da nga ai.

Gawkngu hpun a hkamja lam akyu jaw ya lu ai hpe gumhpawn nna tsun ga nga yang nsen kaja ai akyu jaw ya lu ai, n gup manam ai, lusha nkrai nam pum pum ai hte lasi lamun re ai a matu akyu jaw ya lu ai.

Gawkngu hpun ru gaw kya nna dwi ai namchyim nga ai, hkum kahtet machyi ai, sinda machyi ai, chyahkye shaw ana hte n bung ana ni mai tsai lu ai. Ma kaji ni kan bum, pu bum machyi ai, kan nbung htu machyi rai byin yang gawkngu si kata na mawm shan hpe hka hte garang nna shadai grupyin hta chya da ya jang mai tsai lu ai. Lami laman hkri hkraw machyi yang gawkngu lap hpe a kahet rai hkra galip kakang la nna machyi ai shara kaw ahkyen gayawp da ya jang mai tsai lu ai lam garan kachyan ya dat lu ga ai.

 

By - Julia Ja Ing

 

Add new comment

6 + 6 =