Gaw Rahka Si A Hkamja Lam Akyu Ni

Anhte shani shagu lu sha taw ai malu masha ni hta lu sha mung tsi tai,tsi mung lu sha tai re ai malu masha ni grai lawm nga ai.Dai malu masha ni hta daini gaw kala ginsap si shing nrai kala wa hkum si nga nna mung tsun shamying lang ai gaw rahka si a hkamja lam akyu hte seng nna sawk sagawn hkaja da lu ai made hpe garan kachyan ya mayu ai. Gaw rahka si gaw anhte a Myanmar mungdan hta manu hkyamsa nna mari sha loi ai lu sha shat mai langai rai nga ai majaw masha shagu lu mari sha jin ai lu sha hta lawm nga ai hte shadu sha yang mung dwi dwi nga ai nam chyim rawng nna sha mu la nga ai.A katsing hprap hprap re ai hpe lu sha ai rai yang hkamja lam a matu grau kaja nna lu sha n gun dat mung grau hpring tsup ai hku lu la mai nga ai.

Gaw rahka si hta masha ni a hkamja lam hpe garum madi shadaw ya lu ai shingra shat naw dat,vitamin C,amino acid hte vitamin B uhpung ni grai law rawng nga ai.Gaw rahka si gaw cholesterol hte sodium jum dat tsep kawp nrawng ai sha n-ga calorie yawm nna mawm dat law rawng ai lu sha rai nga ai.

Gaw rahka si hta vitamin C, Ascorbic acid hte poly-phenolic ni rawng ai majaw shat kan,sin,sinda shan,pu jat,pu kaba hte sinwawp cancer cell ni kaba jat ai lam nbyin hkra ning hkap shing dang ya lu ai.

Cholesterol nrawng ai re majaw hkum hkrang hpum lai ai lam nbyin hkra sha ya na kaja ai lusha hta lawm nga ai.Pu dung,pu kaba ni hpe n gun jaw ai lu sha re majaw kan chyat,kan shing dang ai lam nbyin hkra makawp maga ya lu ai.

Wa uji hkamja lam,wa,n gup hkamja lam,sinwawp hkamja lam hte shingma marung nra hkamja lam hte seng ai ana ahkya ni a matu mung kaja ai lu sha rai nga ai.

Gaw rahka si hta magnesium dat rawng ai majaw galoi mung sha ya taw ai rai yang labawp galau,bawp le le machyi ai lam nbyin hkra makawp maga ya lu ai.

Gaw rahka si gaw sai kata cell ni hpe akyu jaw garum ya ai,bai ladu lai hpum ai masha ni mung gaw rahka si sha ya ai rai yang cholesterol hpe shayawm kau ya ai.Cancer ana hpe mung makawp maga ya lu ai hte masha hkum gawng hpe gawng kung ginsa hpyi kyip lawan shangun ai kaw na mung makawp maga ya lu ai.Dai majaw gaw rahka si gaw hkum hkrang hkam kaja lam a matu sha ya na kaja ai lusha hta lawm nga ai hpe nmai malap da na ga ai.

Gaw rahka si galoi mung sha ya ai a marang e nra hpa,nra bawm ana,Alzheimer ngu ai matsing nyan hten za mat ai ana,myit daw myit hkrat ana ni nbyin hkra mung makawp maga ya lu ai.Bai gaw rahka si hta vitamin B6 dat rawng ai majaw matsing nyan marai hpe mung sharawt ya lu ai.Aten galu yup npyaw byin taw ai masha ni a matu mung sha ya na kaja ai lu sha rai nna puba ai hpe hkyamsa shangun lu ai.

Gaw rahka si gaw cell ni hten za machyi ai kaw na mung tau nau makawp maga ya lu ai, hkum chying n gun hpe sharawt ya lu ai re majaw jahkring hkring byin chye ai hkum katsi kahtet machyi ai,tuk kwi makhalawng ana byin ai lam ni hpe tau nau makawp maga ya lu ai.Gaw rahka si sha ya ai gaw salum ana hte hkum katsing si ana ni nbyin hkra mung makawp maga ya lu ai.

Gaw rahka si hta rawng ai zinc dat a majaw hpyi kata kaw na pru ai sau ni a majaw byin ai myi man ban si tu ai hpe mung hkyamsa mai tsai shangun lu ai.

Gaw rahka si sha nrai,gaw rahka lap,gaw rahka makrung ni mung hkamja lam hpe akyu jaw garum ya lu ai lu sha kaja ni rai nga ai.Gaw rahka lap,gaw rahka makrung ni hpe katsing shing nrai lam jahkraw da nna hpa hka lu ai zawn tsing lu ya jang sai rawt ana hkyamsa lu ai,sai lam lasa kaba wa nna,sai lam pat ai mang hkang hpe shayawm ya lu ai,jit sa kaja ai,sade hta rawng ai nlung ni hpe ga mani ayai kau ya lu ai tsi kaja re lam tsun da nga ai.

Gaw rahka si hpe sha na rai jang sadi chye ra na gaw tinang a sunwang hta shingra nam hpun hte hkai ai nre sha,gat na mari sha ai rai jang latung sat tsi hpyen kaw na makawp maga la lu na matu hpyi garai nsep shi yang hpyi hte nawng rai atsawm tsai hkra shawng kashin kau nna shadu sha na hpe mung tsun shadum ya mayu ai.

Shingrai tsawra ai shiga madat nu wa hpunau ni mi sha tsun sai hte maren gaw rahka si gaw sha mung mu ai lu sha shat mai kaja rai nga ai.Hkai sha na mung loi ai,mari sha ga nga tim manu hkyamsa ai re majaw masha shagu mari sha jin ai lu sha rai nga ai majaw gaw rahka si hpe lu sha shat mai kaja,tsi mawan kaja hku nna akyu jashawn lu sha jai lang chye let hkum hkrang,myit masin ngwi pyaw hkam kaja ai akyu hpe hkam la nga ga law.

Lamang tang madun ai - Julia Ja Ing