Galu Kaba Mayu Ai Myit

Shada da grai shing jawng hkat ai prat ndai hta,kalang lang,masha langai mi a awng dang ai lam hpe shi galaw shapraw ai arai ni hpe yu nna ganoi mahkra ngu na daram daw dan mayu ga ai.Dai shi galaw da ai gaw ahkyak na re.Raitim dai arai ni gaw shi a awng dang ai lam mahkra hpe ntsun dan ya na re.Prat tup shi hpa baw amu galaw ai ngu ai hta grau ahkyak ai gaw shi kaning re ai masha hpan re ngu ai lam rai nga ai.

Atsawm hkrak galu kaba nga ai masha gaw shi galaw ai ntsa lam amu hta mung,shi a kata lam arawn alai hpe galaw sharawt ai lam hta mung,galu kaba ai wa re.Shi galaw da ai ntsa lam amu hpe yu nna,gara hku raitim,ntsa lam amu galaw shangut da yang chyu sha,masha a prat hta galu kaba ai lam re ngu nna myit la ai lam gaw shut nga ai.

Mungkan a labau hpe yu yang,num da,la da shanhte a lapyin atsam hte shanhte galaw da ai amu ni a majaw mying grai dan hkung ai masha ni law law nga lai mat wa masai.Raitim shanhte a prat gaw mahkra yawng ting sum mat manu ai.Sut gan law law mahkawng sumpum da nna,mungkan ting hta satang dan hkung ai sumla hkrung ning hkring ni,yungwi ninghkring ni,mungchying bawmung ni,laika ka lak chyoi ni hte hpaga kummi ni nga lai wa masai.Raitim shanhte a prat gaw grai pyaw ai prat n rai malu ai.Shanhte amu magam law law gun hpai nga ai ten hta shanhte a hkum hpe galaw shaprawt la na matu malap mali rai kau ma ai.

Dai zawn re ai masha hpan hta nlawm na matu daini anhte myit yu na lam nga wa ai hta madung gaw amu nrau ai hte grau nna lapyin laram ai masha ni myit sumru yu ra ai lam rai nga ai.Ndai zawn re ai masha ni gaw hpawng shingra hta kaja wa teng teng dan pru nna kaja wa teng teng galu kaba wa na ahkaw ahkang lu ai masha ni rai ma ai.Raitim shanthe hkum hte seng ai mai kaja lam ni hpe galaw sharawt la ai lam hte shanhte a hkik hkam ai ntsa lam amu ni bung pre yang sha,shanhte kaja wa teng teng galu kaba ai masha ni tai lu ma ai.

Dai re majaw tsawra ai shiga madat ni kaja wa galu kaba mayu ai masha ni gaw ga san nkau mi hpe san yu na ra nga ai.Galu kaba mayu ai masha ngu ai hta nang,ngai anhte yawng lawm nga na ga ai re.Anhte yawng gaw kaja wa galu kaba ai hte labau tsawm ai amyu ni tai ra nga ga ai.

Sutgan htun anin mahkawng da ai gaw,wenyi simsa lam hpe lu la ai hta grau ahkyak ai kun? Masha ni a matu lama ma galaw ya ai,shing nrai hku hkau,hkam sharang nna matsan dum ai hte masha ni hpe garum shingtau  ai amu ni hpe anhte galaw nga ga ai kun? Anhte galaw ai amu ni a majaw dan hkung ai gaw grau galu kaba ai lam rai nga ai kun? Shing nrai anhte lu da ai mai kaja lam ni a majaw,masha hku nna hkungga hkrum ai gaw grau  galu kaba ai lam rai nga ai kun? Tinang galaw sharawt ai kata lam,ntsa lam arawn alai ni mahkra tsawm htap kaja ai rai yang chyu sha labau tsawm ai hte kaja wa galu kaba ai masha hpan hta  lawm nga ga ai hte wenyi mung tsawm htap lu na teng sha rai nga ai law.