Face Shield Jai Lang Ai Hte Covid-19 Ana Zinli Makawp Maga Lam

Ya ten face shield ngu ai myiman shinggang hpe mung masha law law jai lang taw ai hpe mu lu ai.Ndai face shield hpe hkamja lam maga hku yu dat ga nga yang covid -19 ana zinli makawp maga ai hta jai lang na grai htap htuk ai ngu mu mada lu ai.

Rai tim ladat jaw jaw hte nchye jai lang ai rai yang tsang ra ai lam ni mung nga ai hpe chye tawn da na ra nga ai.Ndai myiman shinggang face shield ngu ai hpe ya ten byin taw ai covid-19 ana makawp maga lam a matu nga yang ana kanu ni hpe grau shim ai hku makawp maga kau lu na matu mask jai lang ai hta lai jan nna jai lang ai makawp maga rai langai rai nga ai.Face shield a shawng maga de plastic htingkung langai lawm ai rai nna dai htingkung gaw shakap jai lang ai masha a nsa sa lam kaw na pru wa ai shingmun shingmawng kasha  ni shinggan de n gale pru mat ai sha plastic ntsa kap taw ai majaw kaga masha wa hta bai htawt kap na masa lam yawm ai,Myiman shinggang face shield gaw na lahkawng maga du hkra htingkung ai re majaw shawng ang ang kaw na du shang wa ai ana kanu ni hpe plastic a shinggan maga de kap mat shangun ai ndai zawn rai makawp maga lam ni galaw ya lu nga ai.

Face shield hpe kadai ni grau jai lang ai a ta?

Ndai face shield hpe jai lang law ai masha ni gaw ma kaji ni,asak kaba sai gumgai dingla ni hte nsa sa lam hte seng ai ana lu ai masha ni,hkamja dap magam gun ni grau nna jai lang ai hpe mu lu nga ai.N95 mask shing nrai surgical mask ni hpe nlu mari lang nna sumpan hte chywi ai mask hpe jai lang nga ai yak hkak ai masha ni hku nna mung mask a ntsa kaw face shield bai shakap lang jat na kaja nga ai.

Ya sha tsun sai hte maren  face shield shakap da ai masha wa hta ana kanu rawng ai rai yang kaga masha hta bai htawt kap na masa lam nau n nga ai.Rai tim shawng maga hpe sha madung shinggang da ai re majaw face shield hpan mi hpe sha jai lang nna mask n shakap lang  ai rai yang gaw makau hte shingdu maga hku nna ana kanu ni kap shang wa lu chye nga ai.

Bai langai mi gaw face shield hta ana kanu ni jung kap taw na filter sinlam nlawm ai.Dai re majaw face shield hta kap taw ai a na kanu ni kaga shara de bai bra kap mat chye ai zawn mask n shakap da ai rai yang face shield hta kap taw ai ana kanu ni hpe n-gup ladi hte myi ni hku nna shang wa shangun chye nga ai.

Rai yang face shield hpe latung sat kau nna lang na ra ai kun chye mayu na ga ai.Rai sa face shield hta e nhpu maza hte kaga shingmun shingmawng ana kanu ni kap taw chye ai re majaw face shield hpe nbyin nmai latung shingtai sat ya na ra nga ai.Shinggan de pru hkawm ai shaloi face shield shakap jai lang da ai rai yang dum nta du wa ai hte rau face shield hpe baw maga shachyawp da ai ntsa kaw jum lang nna raw u.Dai hpe sap pya hte brush lang nna shara shagu arut kashin kau dat u,dai hpang hka hte atsai sha kashin kau nna jan hta bai lam jahkraw kau nna she hpang kalang bai jai lang na ra nga ai.

Tsawra ai shiga madat nu wa hpunau ni ya sha tsun ai ndai face shield myiman shing gang plastic gaw ya byin taw ai covid-19 corona virus ana makawp maga ai arung rai langai hku nna jai lang shalawm na kaja ai rai tim mask jai lang ai gaw kaja dik makawp maga lam rai nga ai hpe nmai malap na ga ai.Dai majaw Mask shakap ngut ai hpang she face shield hpe bai ntsa kaw shakap lang u.

Face shield shakap da ai shaloi nra ang ai sha face shield hpe masawp ai,jum hkra ai lam hkum galaw u.

Mask shakap da ai aten nsa sa nhkru ai zawn nga hkam sha wa ai rai yang masha nlaw ai shara shing nrai masha kadai n nga ai shara du jang she lata hpe shawng asan kashin kau ai hpang  mask hpe sumri kaw sha jum nna nsa sa la u,dai hpang mask bai shakap da nna lata bai kashin kau u.

Anhte matsing da ra na bai langai mi gaw face shield gaw corona virus ana kanu kaw na  makawp maga ya lu ai arai re nga tim shadang hpring tup makawp maya ya lu ai nrai nga ai zawn myiman shinggang  face shield hpan mi sha shakap ai lam hpe mung nmai galaw na ga ai.Dai re majaw lata hpe ladat jaw jaw hte jahkring hkring sha kashin ya nga ga,shinggan de pru hkawm jang mask hpe nbyin nmai jai lang ga,mai byin ai made ahkyak ai lam n nga ai rai yang shinggan de npru hkawm ga,ndai ana zinli a majaw ya ten mungkan masha law law a asak hpe dawm la kau ya taw nga ai,masha law law wa machyi tsin yam hkrum sha ra nga ai hte mayak mahkak lam ni law law hkrum sha ra nga ga ai majaw ndai ana zinli lawan hkoi tsai myik mat lu na matu mahkra hpe dang di lu ai Karai Kasang kaw kamhpa myit majing hte akyu ja ja hpyi shakut nga ga.Ndai ana hpe tsi shamai lu na,ana nbyin hkra makawp maga lu na tsi mawan kaja ni htuk shapraw lu na matu mung akyu hpyi ding yang rai nga ga.Anhte mung chying mung shawa shagu mung hkamja dap a matsun hte maren tinang kaw nna shawng makawp maga la ai ladat hpe hkan nang hkan sa let ndai ana zinli gasat shamyik ai magam lam hta yawng shang lawm nga ga ngu tsun shadum ya dat ga ai law.