Dumsu Hkyi Dap Namhpun Galaw Jai Lang Ai

Nga uloi hkyi, dumsu hkyi maza ni hpe wan nat kau nna wan wu jahkrat namhpun shatai jai lang ai gaw nam law nam lap hkai nmai sun ni a matu shingra namhpun kaja langai  rai nga ai. Dai hpe akyu jashawn jai lang taw ai ni mung law law rai nga ai re. Nga hkyi, dumsu hkyi maza hpe wan nat nna wan wu jahkrat la ai dap namhpun ni gaw ga hkri shum dat hte lamu ga madi dat hpe chyup da ya lu ai atsam hpe sharawt ya lu nga ai. Dai sha n-ga ga kata gyem rawng taw ai latung kanu ni hpe mung jasan jahkoi kau ya lu nna hkai li tum ni hpe jahten ai kaw na hkyamsa lu ai.

 Dumsu hkyi nat la ai dap namhpun hpe nam law nam lap gat bra da ai hkai sun hte hkai bawng yan ni hta e jai lang akyu jashawn lu nga ai. Nga hkyi dap namhpun jai lang ai akyu ni hpe tsun ga nga yang, mi sha tsun ai hte maren lamu ga madi dat hpe chyup da ya lu ai hte hkai hpun ni a matu lusha dat rai nga ai ra kadawn ai namhpun dat n gun ni hpe hkra langai htum hkra a matu madi shadaw da ya lu ai majaw hkaili tum ni hta matsun prut lawan ai, rap rap ra ra rai prut pru wa shangun ai hte hkai nmai hpun ni kaba lawan ai akyu hpe jaw ya lu nga ai.

Nga hkyi wan nat nna wan wu jahkrat da ai dap namhpun gaw hka ing,hpung yang taw ai hpe mung shayawm kau ya lu nna ga kaput magap rai hku nna mung ga madi dat hpe mung  chyup mazing  da ya lu nga ai.

Bai nna hkai nmai hpun ni a alap hte aru, pawt sha ai baw hkai nmai ni hta hkrat chye ai latung shingtai kanu ni a majaw hkai nmai hpun ni nhten mat hkra makawp maga ya lu nga ai.

Nga hkyi hta lawm wa ai tsing hpun tum ni mung nga hkyi hpe wan nat kau ai re majaw n hkrung sai rai nna nga hkyi kaw na tsing tu jat ai lam ni n nga sai. Bai nna wan nat da ai dap namhpun hpe sha la ai re majaw htaw wa htaw sa loi nga ai hte namhpun grau loi ai hku lu mai sai rai nga ai.

Dumsu hkyi shing nrai nga  hkyi dap nam hpun hpe akyu jashawn jai lang ai gaw dat namhpun mari lang ra na htum gumhpraw mung hkyamsa lu nga ai. Dumsu hkyi dap namhpun lang nna hkai ai hkai n mai, nam law nam lap ni gaw dat nam hpun bang nna hkai ai nam law nam lap ni hta nna mung grau dwi ai nam chyim rawng nga ai.

Dumsu hkyi hpe dap nam hpun gara hku galaw la mai na hpe tsun ga nga yang dap nam hpun galaw na ladat gaw dumsu hkying shing nrai nga hkyi hpe shana maga de wan nat nna shana tup hkru  taw shangun u. Shani ten dumsu hkyi hpe wan nat ai rai yang wan wu ni nbung hta poi lawm mat chye ai majaw shana maga daw  nbung bung zim ai ten  nat ai kaja dik rai nga ai.

Zaibru ga hte zai ni ga ni hta rai yang nga hkyi hpe kaga shara hta laksan ju la nna lu ai dap hpe sha nam law nam lap hkai na san da ai hkai sun shara de la sa wa nna dai nga hkyi dap nam hpun hpe ga hte gayau nna hkai na shara laksan galaw da ai n hkun kata de bang ya mai ai.

Hkai hpun ni hta jai lang sana rai jang jahpawt manap daw hta  wan wu jahkrat da sai dap nam hpun ni hpe ara sha di garai tawn da u. Dai hpang n hkun kata de atsawm shang hkra shang hkawp hte achye bang ya ra ai. Rai tim dai dap nam hpun ni hpe ga kata letma 2 hta grau nsung ai sha  bang ra ai. Hka jaw ai shaloi hka madi dat hpe chyup da lu na matu dap n kau mi hpe n hkun ntsa kaw ngam da ra ai.

Hkai bawng yan hpe hka loi mi jaw ya ra ai. Hkaili tum ni hpe gin yan hku rai rai, gat nna rai rai hkai mai ai. Chyinghkra hkrung kanu ni n kap na matu hkai hpun lap ni a ntsa dap hpe gat ya mai ai.

Galaw  ra ai lam

Dap hpe e ga man ni a ntsa hte ga kata ntsa lam let ma 2 daram hta bang ya ra ai. Dai zawn galaw ai gaw ga madi dat hpe chyup da nna nam law nam lap ni a ru pawt ni hta nam hpun dat grau nna lu shangun nga ai.

Koi ra ai lam

Lanam ta na marang hkra sai dumsu hkyi ni hpe gaw n mai jai lang ai. Zaibru law ai hkum tsai ga hte zai ni ga ni hta dumsu hkyi ni hpe majaw nat ai lam n mai galaw ai. Dai zawn ,mmk galaw ai gaw hka chyup da lu ai ga hpe jahten kau ai tai wa  ai. Bai nna ga man shara mi hta sha nga hkyi hpe jahkring hkring sha wan nat wan wu jahkrat ai lam n mai galaw ai. Dai zawn galaw ai mung ga man ntsa lam hpe jahten shaza kau ya ai lam byin wa ai hpe sadi la chye ra na ga ai lam machye machyang ni hpe garan kachyan ya dat lu ga ai.