Du Sa Ladaw A Lachyum

DU SA LADAW LABAN (1)
( First Sunday of Advent year A)

Hkungga ai nu wa hpunau ni,
Ndai Laban Shani kaw nna Du Sa Ladaw de bai du shang wa saga ai. Shing re ai majaw, Du Sa Ladaw a lachyum hpe loi mi sang lang dan dat ga ai.

'Du Sa Ladaw' gaw English ga hkum " Season of Advent" a lachyum rai mali ai. Advent gaw Latin ga hkum adventus kaw na lu la ai re. Lachyum gaw du sa wa ai ( coming ) ngu ai re. Dai majaw Jinghpaw ga hte mung Adventu ngu nna tsun lang lai wa saga ai. Ya gaw lachyum hpe grau asan sha loi ai hku chye na lu na matu, Du Sa Ladaw ngu ga ai rai.

Ndai Du Sa Ladaw hta hta Laban mali lawm ai. Bai nna daw lahkawng di nna karan da ai. December 16 du hkra Daw Langai rai nhtawm, December 17 kaw nna December 23 du hkra Daw Lahkawng rai li ai.

Daw Langai hta Yesu Hkristu hpung shingkang hte bai du sa na lam hpe myit mada ala nga let myit masin wenyi hpe hkyen lajang tawn shangun nga ai. Daw Lahkawng hta e gaw, shinggyim masha sa tai na matu shangai chyinghkai wa ai Hkye La Madu hpe kabu gara, kamsham myit kaba hte tau hkalum na matu shachyip da shangun ai lam re....

Ndai Du Sa Ladaw a lachyum hpe shapraw shadan ya ai gaw, Du Sa Ladaw a Nampan Shanghkawng ( Advent Wreath) rai nga ai. Ndai kaw nau galu wa ai majaw Du Sa Ladaw Nampan Shanghkawng a lam n tsun shalawm sai.

***Madat hkam la na Karai a mungga de kayin wa ga. Shawng hti ai Myihtoi Esaiah laika hta, simsa ai hte Madu gaw amyu baw shagu hpe kahkyin na hpe myihtoi wa shingran mu ai lam tsun tawn da nga ai.

*** Roma hpung masha ni hpang de shagun ai laika hta, Kasa Pawlu gaw, hkye hkrang la lam du ni sai, jin jin rai hkyen lajang tawn mu, nga nna tsun nga ai.

***Mahte a kabu gara laika hta, Yesu gaw shi sape ni hpe tsun ai: ahkying aten hpe n chye ai majaw, dai Madu a N'htoi a matu hkyen lajang shachyip da mu, nga nna tsun nga ai.

*** Madu Yesu tsun ai lam hpe kadun ai hku matsing gun la ga nga yang;
-- Maja let ala nga ai ( watchful waiting),
-- Ra ai lam hpe hkyen lajang ai (preparation),
-- Tara dingman ai hku hkam sa na ( justice) ...ni rai nga ai.

*** Anhte a myit masin wenyi hpe Shi Madu ra sharawng ai hte maren lajang shachyip da lu na matu shakut nga ga law...Amen..

Sang lang dan ya ai _Wa Jau John Dashi Naw Lawn

Lamang tang madun shana ya ai - Julia Ndawng Ja Ing