Daw Chyen Shagu Ahkyak Ai

Daw Chyen Shagu Ahkyak Ai

Masha hpawng shingra gaw,masha a hkum hkrang hte grai bung ai.Hkum hkrang gaw atai langai sha re.Raitim dai hta shada da nbung ai daw chyen ni law law lawm nga ai.Dai daw chyen shagu mung shi a amu shi mi lu ai.

Masha hkum zawn,hpawng shingra gaw shi a daw chyen ni yawng,hkum hkum ra ra ngwi ngwi pyaw pyaw hte rau amu jawm galaw yang sha,hkam kaja ai.Hkum daw chyen langai ngai amu atsawm sha n galaw ai shaloi,dai hkum gaw machyi wa ai.Masha hpawng shingra hpe hkum langai,shing nrai mungdan langai,mare langai,hpaga hpung langai,jawng langai,nta htinggaw langai mi hku nna yu dat yang hkum hkrang hta byin ai hte maren rai nga ai.

Anhte masha hkum shagu gaw masha hpawng shingra langai mi,shing nrai dai hpawng shingra a hpung law law hta na masha langai ngai rai nga ai.Anhte myit,tsun,galaw sa wa ai lam ni gaw masha hpawng shingra ting hte grau  nna anhte lawm ai hpawng shingra hta anhte lit grai kaba nga ai.Anhte nga ai lam grai ahkyak ai.Masha hkum hta na kaja dik ai daw chyen sha pyi,hkum hkrang hkam kaja na matu ahkyak ai lit lu ai.Myi mu,na na,n-gup shaga,lagaw lam sa,salum galawp,sinwawp nbung marawp ,kan shat rin na ra ai.Kaga daw shan ni gaw ndai daw ni a malai ntai ya lu ai.Shanhte shagu dek nna,shanhte nan a laklai ahkyak ai lam ni nga ai.

Dai lam gaw nang hte ngai hta mung maren sha teng nga ai.Anhte ni ahkyak ga ai.Anhte kaw na marai langai mi a shara hpe pyi,kaga masha ni hkang galai dagraw la ya lu ai nrai.Anhte galaw ai amu hpe masha langai ngai e,nlaw htum adaw achyen sha pyi galaw ya lu ai.Raitim masha hpawng shingra hta anhte a shara hpe kadai mung tup hkrak nhkap hta la ya lu ai.Kaning rai me law nga yang anhte gaw hkum dek nna,anhte a numrai arawn alai hpe nan lu ga ai.Nang hte bung ai masha kadai mung shawng de n nga yu ai.Ngai hte bung ai masha mung langai mi pyi n nga yu ai.Anhte a nta anhte a makau mayang,anhte a amu galaw shara hte ndai mungkan ntsa hta e,masha kaga kadai mung n hta la yu ai amu magam galaw na matu nang hte ngai lit lu ga ai.Masha hpawng shingra hte de a daw shan mahkra a hkam kaja lam gaw anhte masha hkum shagu dek nna tinang hta ang wa ai lit ni hpe gara hku hpai sa wa nga ai ngu ai hte seng ai.Kaga masha ni anhte hpe malai ntai ya lu ai.

Dai majaw nang mung ngai mung,nang ngai galaw sa ai magam lam shagu mung ahkyak ai daw chyen ni hkrai rai nga ai.Kaga masha ni malai ntai ya lu ai nang ngai hta ang wa ai lit magam hta yawng hpe hkam kaja shangun lu ai daw chyen ni anhta tai nga ga.

Wajau Paulu Lasang La