Dat Namhpun Htan Shingra Namhpun Hpe Madung Jai Lang Ai Ladat

Dat Namhpun Htan Shing Ra Namhpun Hpe Madung Jai Lang, Hkai Lu Hkai Sha Ga

  Tsawra ai shiga madat Nu Wa Hpu nau ni, ndai lamang hta gaw Laiza shi shanan hta Ah Naw ka lajang da ai Dat namhpun hta shingra namhpun hpe madung jai lang, hkai lu hkai sha ga ngu ai lam hte seng nna gam garan gachyan ya na n ngai.

  Anhte buga ginra ni hta lai sai ten gaw ginhtawng si mai, nshung si mai nga nna hkai lu hkai sha ai lam galaw ai raitim dai ni na mungkan prat masa hta hkan nna kaning re ai simai simaw ni hpe raitim ginhtawng, lanam, nshung n nga aten hpring hkai lu hkai sha mai hkra galaw ai prat madang de du mat sai rai nga ai.

  Raitim ya aten (nshung ta laman hta hkai lu hkai sha na matu htap htuk ai simai si maw ni gaw) anhte ginra hta mung ding yang hkai lu hkai sha nga ai chyinghkrang, hpagyi, Lau bu, shakau ni rai nga ai. Rai yang ndai simai simaw ni hpe ladat jaw jaw hte hkai lu na matu hte kaning re shara ni hta hkai yang grau htap htuk ai lam ni hpe garan gachyan ya na n ngai.

Ndai simai simaw ni hpe hkai ai shaloi tu kaba tsawm na matu ga sau rawng ai, shingra namhpun rawng ai shara ni rai nna hka gang atsam nga ai ga mung rai ra nga ai, marang htu ai aten, (shn) hka jaw dat ai aten ing taw ai zawn re n byin hkra hka lwi mat lu na matu atsawm galaw ra ai.

  Buga kahtawng ni hkan hkai lu hkai sha shara ni dam lada wanglu wang lang mai galaw ai raitim ladat jaw jaw hte hkai ai lam ni hta gawng kya ai majaw simai simaw ni aten ndu shi yang yat mat ai, latung sha mat ia zawn re ni law law mung nga ai re.

  Myo mare kaba hkan lamu ga shara n nga ai nga nna, gat lawk kaw dut ai simai simaw ni hpe madung kam let lu sha ai malawng rai nga ga ai. Gat lawk ni hta dut ai nam law nam lap, si mai ni gaw maigan mungdan kaw na galaw shapraw ai dat namhpun ni hpe madung jai lang nna hkai shatut ai re majaw anhte ginra shing ra namhpun hpe jai lang let hkai ai simai simaw ni hta grau kaba lawan ai, hpun ni kaba shangun ai raitim, tinang ginra kata hta tinang nan hkai shatut sha ai malu masha gaw hkum hkrang hkam kaja lam a matu grau akyu jaw ya ai re.

  Lagawn lamawn rai aten hpe majoi shalai mau nga ai ni mung law law rai nga ga ai. Prat masa hta hkan nna hkai lu hkai sha na matu lamu ga, shara n nga ai raitim ladat amyu myu shaw nna tinang nta wang kata atsawm sha hkai lu hkai sha ai lam ni mai galaw nga ai re. Sung lang ngut sai hka bu dingsa, Modo Taya dingsa (shn) buri dingda ni hta mung aga bang nna ahku baw nhtawm hkai lu hkai sha mai nga ai.

  Shingra namhpun hpe jai lang ai gaw madung rai nga ai. Dat namhpun bang nna hkai ai rai yang namlaw namlap ni grau hkalung tsawm nna hka mung grau law ai majaw shingtai latung ni mung namlaw namlap ni hta grau hkrat manu nga ai. Shingtai ni hkrat ai shaloi shingtai sat tsi ni hpe bai jai lang wa ra nga ai. Dai shaloi shingtai tsi gat nna tsi ngam atsam ni hpe anhte sha jang hkumhkrang kata mahkawng nga nna hkamjan atsam n nga wa jang hkaja lam ahtu hkra machyi makaw byin wa shangun ai re.

  Dai majaw shiga madat Nu wa hpu nau ni mung, hkai lu hkai sha ai hta dat namhpun hpe jai lang na malai shingra namhpun hpe madung jai lang let hkai lu hkai sha ai rai yang tinang hkumhkrang a matu hkam kaja lam lu la na re ngu garan gachyan dat nngai….