Covid Ana The Mask Lahkawng Htap Shakap Lang Ai Lam

Covid ana zinli gaw daini ya aten du hkra hkoi tsai mat ai lam n nga ai,numdaw langai hpang langai rai kap bra ding yang naw rai taw nga ai gaw anhte yawng chye ai hte maren rai nga ai. Covid ana n kap hkrum hkra makawp maga la na hta n gup ladi magap mask gaw covid aten laman aten shagu ahkyak ai hta lawm nga ai re. Covid ana byin ngut sai masha mi rai rai, garai n kap hkrum ai masha mi rai rai, covid makawp maga tsi prup da ngut sai masha mi rai rai mask shakap lang na,lata kashin na hte kaga masha hte hkran hkran rai nga na hpe hkan sa ra ding yang sha rai nga ai. Seng ang ai hkamja dap ni a chyam maram sawk sagawn lam n nan galaw da lu ai mahtai tsun shapraw da ai hta n gup ladi magap mask hpe lahkawng  htap shakap jai lang ai gaw grau kaja ai lam tsun da nga ai.

Mungkan mungdan ni mung mask htap lahkawng shakap lang na matu hpaji jaw matsun da ma ai hte maren shakap mung shakap lang taw sai hpe mu chye lu nga ai. Hpa majaw mask htap lahkawng shakap lang na matsun wa ma ai re kun nga yang American CDC a chyam maram sawk sagawn da lu ai mahtai hta mask htap lahkawng shakap lang ai gaw htap mi sha shakap lang ai hta ana n kap hkrum hkra grau tang du ai hku makawp maga ya lu ai hpe mu lu nga ai.

Sumpan hte chywi da ai mask htap mi sha shakap nna chyam yu ai, surgical mask htap mi sha shakap lang nna chyam yu ai, bai surgical mask shawng shakap nna sumpan mask bai kahtap shakap rai ndai hpan masum hte chyam yu ai shaloi sumpan mask htap mi sha shakap lang ai rai yang tsa shadang 51.4% makawp maga ya lu nna, surgical mask htap mi sha shakap lang ai gaw 56.1% makawp maga ya lu ai. Raitim surgical mask hte sumpan mask htap lahkawng shakap da ai rai yang tsa shadang 85.4 % du hkra makawp maga ya lu ai lam tsun da nga ai. Ndai gaw jahkru ai masha kaw na kap wa ai lu ai hpe makawp maga ya lu ai shadang rai nga ai.

Nsa sa ai kaw na kap wa lu ai hpe makawp maga lu na shadang bai yu ga nga yang nsa sa shapraw dat ai masha wa gaw mask htap lahkawng hpe ladat jaw jaw rai atsawm shakap lang da ai rai yang kaga masha wa mask n lang da ai raitim pyi tsa shadang 82.2% makawp maga ya lu ai. Bai nsa sa shapraw dat ai masha wa mask n shakap da ai raitim nsa sa marawp bang la hkrup ai wa mask htap lahkawng shakap da ai rai jang tsa shadang 83% du hkra makawp maga la lu nga ai. Lahkawng maga na yan mask htap lahkawng shakap lang da ai rai yang gaw tsa shadang 96.4% du hkra makawp maga ya lu ai.

Dai zawn shakap lang ai shaloi shawng shakap lang na surgical mask hpe ladat jaw ai hku shakap lang lu na matu myiman maga ang ai mask sumri matu hpe lahkawng maga gyit shajup kau na hpaji jaw da nga ai.Dai zawn gyit shajup dat ai rai yang mask shakap lang ai shaloi hku n wap hkra kap rai nna n gup, ladi hte n hka yawng atsawm gap rai grau shim mat ai majaw ana n kap hkrum hkra makawp maga lu ai lam tsa shadang 95.9% re lam tsun da nga ai.

Mask shakap lang ai shaloi n bung gawut yu yang n bung pru taw ai rai jang virus ni mung pru shang lu na sha rai nga ai.Mask htap lahkawng shakap lang ai gaw dai mang hkang hpe mung hparan kau ya sai hte grau shim mat ai majaw masha langai ngai ga aja wa shaga ai, shing nrai jahkru,kahti dat ai raitim virus ana kanu ni tinang kaw n kap shang sai,tinang galaw dat ai raitim mask htap lahkawg shakap da jang manang wa kaw mung n kap hkrum sana rai nga ai.

Mask htap lahkawng shakap lang ai shaloi sadi ra na gaw ya sha tsun ai surgical mask hte sumpan mask yan hpe sha htap lahkawng rai shakap lang mai na ga ai re. Surgical mask hpe shawng shakap nna ,de a ntsa kaw she sumpan mask hpe kahtap shakap lang ra ai. Sumpan mask hpe shawng shakap nna ntsa kaw surgical mask kahtap shakap ai gaw shut ai ladat rai nga ai.Dai zawn galaw jang hpa akyu n nga ai lam tsun da nga ma ai re.Bai KN 95 mask shakap jai lang ai ni gaw kaga hpa mask hpan mung n mai kahtap shakap lang sai hpe anhte chye tawn da na ra ai.

Mask shakap da ai hpang n gup,ladi, n hka shara ra hta wap taw ai lam n nga hkra,yawng shim sai kun ngu ai hpe jep yu ra ai.Grau shim hkra n bung pru n pru gawut chyam yu, jahkru yu rai galaw ya lu yang kaja ai. Shinggan de pru hkawm na rai shagu mask shakap lang ra ai nga tim tinang sa na shara hpe mung maram yu chye ra ai,masha nau n law ai shara, masha law law hte hkrum shaga ra ai lam n nga ai rai yang htap mi sha shakap lang u.Shing nrai tinang sa na shara gaw masha langai hte langai pre 6 gang nna nga na matu n mai byin na shara rai jang gaw mask htap lahkawng shakap lang na grau kaja nga ai. Ga shadawn gat mari sa ai,tsi rung, tsi gawk sa ai,mawdaw daru, nbungli daru, wan leng daru zawn re ai hkan sa ra ai rai jang mung mask htap lahkawng shakap lang na ra sai. Masha law law hte hkrum shaga nna bungli galaw ra ai masha ni mung mask htap lahkawng shakap lang ai gaw kaja dik rai nga ai.

Dai zawn ra ahkyak ai shara ni hta hkawm jang mask hpe htap lahkawng shakap lang na,lata mung kashin na, masha law ai shara de ra ahkyak ai lam nga jang she pru hkawm sa na, covid makawp maga tsi hpe mung mai byin ai rai yang prup hkam da lu ai rai jang Covid kap bra ana zinli hpe tang du ai hku makawp maga la lu na ga ai re ngu tsun shadum garan kachyan ya dat lu ga ai. Shiga madat ni yawng ngwi pyaw hkam kaja nga mu ga law.

Lamang tang madun ai - Julia Ja Ing