Covid-19 Gaw Bawm Langai Zawn Rai Nna, Bawm Kapaw Shangun Ai Fuse Gaw Myit Htum Hpa Nan Rai Nga Ai

Wa Sarabyin Gaw Covid-19 hte seng nna, masha shagu hpe kahtap kahtap tsun da ai. Chyam bra ana hkoi mat ai hpang, anhte ni kaja grau na kun, shing nrai, Sawng grau na kun. Mungkan masha ni shada matut mahkai galung gahkying gumding lam gaw ahkyak na re.

Chyam bra ana gaw mungkan ting, lusu matsan mungdan n ginhka mungdan shagu jam jau jaw nga ai. Coronavirus gaw shinggyim masha ni shada jau gaung gaung hkat shangu, majan byin shangun ai hte azim sha n nga shangun ai bawm zawn tai nga ai.

Wa Sarabyin Francis hte UN Secretary-General Antonio Guterres hpyi shawn da ai hte maren, Covid-19 hte seng ai lam hpe Vatican’s Covid-19 Commsion kaw woi awng nga ai Maryann Cusimano Love (The Catholic University of America) hte Dan Plesch (director of the Centre for International Studies and Diplomacy at SOAS) yan kaw nna coronavirus hte seng ai lam ni hpe sawk shagawn sang lang da ma ai.

San: Wa Sarabyin a yaw sin ai hte maren Vatican Covid 19 Commission kaw shang lawm ai hta sharin la lu ai mahkrum madup gaw hpa rai ta? Commission a bungli lit magam gaw wuhpung wuhpawng hpe gara hku akyu jaw lu na rai ta?

 Htai: Mungkan ting a mayak manghkang re majaw mungkan ting shang lawm hparan ra ai. Mungkan labau hta anhte nga pra ai prat gaw shinggyim masha jahpan law dik rai nga ai. Dai majaw mungkan labau hta chyam bra ana zingli tsin-yam hpe ninghkap ai hta anhte a prat hta gaw shinggyim masha shada rau kahkying gumding let jawm gasat ai hta grau tsaw ai madang hku galaw sa wa ra ga ai. Wa Sarabyin hpaw da ai Covid-19 ninghkap commission gaw mungkan ting hta kasi kamang tai ra ga ai. Dai hta yawng shang lawm na matu aten shagu myit mada ga ai. Ra kadawn dik ai masha ni hpe, mungdan hpe, wuhpung wuhpawng hpe, mungdan kaw nna n dep n hkap ai ni hpe garum ya nga ai re.

Covid -19 paw pru wa ai kaw nna bawng ring lam hta hkrit tsang hpa kaba hte hkrum katut hpang wa saga ai. Commission hta magam rum ni a ap nawng myit, shanhte a ap hpaji hparat kaba ai lam, shanhte a jaw ang ai bungli galaw ladat, shanhte a aten jaw ai lam, shanhte a matsan dum tsawra myit kaba ai lam ni hpe asan sha mu lu ai. Shanhte shada matut mahkai let simlam lu na matu aten shagu shakut nga ma ai hpe mu lu ai.

San: Covid -19 Commission hpe shagren na matu hkyen lajang ai hta, shawng lam a matu hkyen lajang na matu Wa Sarabyin lit shatsam da ai. Rai yang, dai zawn hkyen lajang shakut ai hta Kahtawlik Nawku Hpung a yaw sin ai gaw hpa rai ta?

Htai: Sut masa lam gaw lani mi na aten hta si mat na re lam chyam bra ana tsin-yam hkrum ten na mahkrum madup gaw sakse re ngu Wa Sarabyin sadi jaw da ai. Sut masa lam dingsa hpe bai n htang galaw na n mai byin mat sai. Ga shadawn, nuclear laknak ningnan bai galaw na masin hta trillion Dollars jai lang na lam n mai byin mat ai. Hpa majaw nga yang dai gumhpraw hpe hkyak hkyak ra ahkyak ai malu masha hte hkam ja lam a matu jai lang da sai rai nga ai. Dai gaw amyu mi hku yu yang kaja dik ai kaw jai lang lu ai rai nga ai.

Nawku Hpung a masing rai nga ai garum shingtau lam hte shawng lam hta bawng ring rawt jat wa na matu sumru ai gaw ahkyak dik ai. Raitimung, shingra makau grupyin, matsan mayan lam hta jai lang ai gaw law hpa myit hte mungkan majan a matu laknak galaw shapraw ai lam hta grau akyu rawng nga ai. Anhte gaw shinggyim masha ni sak hkrung lam a matu garum shingtau lu hkra hkyen lajang nga ra ga ai.

San: Chyam bra ana zingli mahkrum madup kaw na lu la ai mahkrum madup tsun dan mai na kun? Ndai chyam bra ana tsin-yam hkum ai hta lawm ai nang hkum nan hte mungkan ting gara hku galai shai wa ai rai kun?

Htai: Chyam bra ana zingli hkrum sha ai a marang e, n nga n mai n re ai lam ni hpe tsan kau ya ai; bai, anhte hta kaja wa ahkyak ai hpe madung da na matu shadut ya nga ai. Kun dinghku nta masha ni hte rau nga lu ai, grau nna ma ni hte rau aten grau jaw lu wa ai, asak kaba dinggai dingla ni hpe yu lakawn lu ai, kun ding nta masha ni rau hkawm rau sa let makau grupyin shingra tara hpe grau hkam sha lu wa ai. Mungkan shing ra tara makau grupyin bai hkam kaja wa hkra galaw shatsawm jahtuk na matu hprang hkrat ai ngu nnga ai hpe shadum ya ai. Anhte a sut masa lam hte sut hpaga ga ai shara ni hta hkam ja lam hte htuk ai lam hpe galaw da nna, mungkan hte shinggyim masha shada da hku hkau lam hpe shatsaw ra ga ai.

Galai shai ai lam kaba nga nga na gaw teng sha rai nga ai. Raitimung, tingkyin myit a matu laknak ni hpe htuk shapraw ai lam hpe jahkring na matu mungdan Asuya ni, mung masha wuhpung ni, Nawku Hpung ni hte kaga wenyi lam hta hkawm nga ai wuhpung wuhpawng ni yawng hpe hpyi shawn mayu nngai. Shaning shagu dolar trillion 2 lahta de jai lang nga ai gaw hpyen majan de yawng taw ai laknak htuk shapraw na matu rai taw nga ai. Bai, dum nta hta, wuhpung wuhpawng hta, mungdan Asuya ni lapran hta, shada dawsa ai lam ni hpe mu nga ai, grau grau law jat wa ai hpe mu mada lu nga ai.

Matut na naw nga ai!

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/vatican-city/news/2020-10/covid-project-bomb-fuse-misery-pope-un.html