Corona Virus Li Ana Hpe Tau Hkrau Sadi La Chye Ga (Heath Care )

Anhte yawng chye ga ai hte maren ya aten hta Miwa Mung,Wuhan kaw nna shawng byin hpang wa ai Novel Corona virus ngu ai sinwawp bum machyi  li ana gaw mungdan law law hta chyambra taw sai lam shiga dap ni law law hta hpaw tsun da nga ma ai re.Miwa mung Wuhan hta mung January (26 ) ya, mani du hkra rai yang corona virus li ana kap hkrum ai masha 2000 daram du wa sai hte asak si sum mat ai masha (56 ) rai sai lam tsun da nga ai.

Ndai corona virus ana kanu chyambra ai lam gaw rai lawan ladan rai byin taw nga ai majaw mungdan a hkrit tsang shara ahkyak ai madang hta du taw sai lam Miwa gumsan mungdan a gum san magam Shijin Pin kaw nna shiga dap hpe sadi jaw hpaw tsun ndau shana ai lam ni galaw da ai hpe Sin Hwar shiga dap ni tsun da nga ai.

Ya aten miwa mung shara law law hte kaga Thai,Singapore,Hong Kong,Japan,Macao,Dingda Korea,American,Vietnam,Australia,Thai Wan hte Malaysia mungdan ni de mung chyambra taw sai lam January shata 25 ya jahpawt du hkra lu tawn da ai shiga jahpan ni hku nna chye lu nga ai.

Anhte a Myanmar mungdan de gaw ya du hkra li ana kap hkrum ai masha garai n nga ai lam asuya hkamja dap ni hpaw tsun da ma ai rai tim ndai li ana gaw tsi lajang shamai la na tsi garai n nga ai,masha shada kap bra lawan nna ya sha naw byin hpang yu ai li ana nnan rai nga ai majaw anhte shiga madat ni yawng mung tau hkrau nna mai byin ai ladat hte sadi sahka maja nna nga sa chye na hpe kahtap tsun shadum ya mayu ai.

Ndai corona virus sinwawp bum machyi ai li ana nkap hkrum na matu anhte tau nau sadi sahka la mai na lam ni hpe hpaji jaw matsun da nga ai gaw mask ngu ai n-gup magap sumpan shakap lang u,hka law law lu ra ai,hka lu mayu ai hpe nmai sharang da ai, ndai ana gaw nsa sa lam yu hkraw kaw nna hkum hkrang kata de chyambra loi ai ana re majaw yu hkraw galoi mung madi taw na ra ai,hka lu mayu ai hte kalang ta lu dat u,tinang lu ai hka gaw hka san hka rai u ga,lama hka nau nsan seng dum ai rai yang hka shadu nna katsi shakawp lu ya na kaja nga ai.

Yu hkraw n hkraw na grai ahkyak ai re majaw na makau hta lu hka galoi mung tawn da u.Masha law ai shara de mai byin ai made hkum sa u,lama hkawm sa ra jang mung mi sha tsun ai mask shakap lang u.Sau law ai malu masha ni hpe koi gam ra ai lam ni hpaji jaw matsun da nga ma ai.

Bai nna ana kap hkrum sai machyi masha ni hte ni ni htep htep rai nmai gayau nga na lam ni hpe mung sadi jaw tsun da nga ai.Ndai li ana kap hkrum ai machyi kumla ni gaw hkum kahtet machyi na,dai hpang aten na na jahkru ai,baw machyi ai,kashung gari ai,nsa sa chyat ai,yu hkraw machyi ai, ba ai hte hkum hkrang hkam jan n-gun yawm ai lam ni byin wa ai.Ndai li ana gaw asak ( 5 ) ning npu na ma kaji ni hte asak kaba sai gumgai dingla ni,hkam jan n-gun yawm ai masha ni hta grau kap loi chye nga ai.

Tsawra ai shiga madat ni Hpa ana ahkya mi rai tim tinang hta hkam jan lu na n-gun rawng ai rai yang kap na yak nga ai.Dai majaw hkum hkrang hkam jan n gun rawng na matu hkamja lam hte htuk ai malu masha ni hpe sha na,yup hkru na,hka law law lu na,lata hpe galoi mung asan shin chye na,maza mala ni hpe jum magra ai lam koi yen ra na ga ai.Ndai ana gaw virus ana kanu kap hkrum nna nhtoi (14) ya daram na ai hpang she machyi ana kumla ni madun ai lam tsun da nga ai.Machyi ana kumla n madun ai rai tim masha langai hta ndai ana kap taw sai kaw nna kaga masha hta bai htawt kap lu shangun ai grai kap lawan ai li ana rai nga ai.Dai majaw tinang maga na galoi mung sadi maja let tau hkrau makawp maga la chye nga ga.