Cancer Ana Nbyin Hkra Nga Chye Ga

Anhte kadai mung mawng cancer ana byin wa na hpe hkrit tsang ai hkrai rai nga ga ai Masha langai cancer ana byin sai nga yang tsi lajang hkam la na matu masha n-gun,ja gumhpraw n-gun law law hpe jai lang ra nga ai.Tsi sara/wun ni mung dang lu ai daram tsi tsi lajang shamai ai hpe galaw ya ai rai tim cancer ana nbyin wa hkra gara hku sadi sahka koi yen nga sa ra na lam machyi masha ni hpe tsun dan na matu gaw aten nau nlu jaw nga ma ai.Kaja wa nga yang tau jau nna cancer ana byin wa lu mai ai lam ni hpe sadi sahka koi yen nga sa ai rai yang cancer ana a hkrit tsang lam kaw nna tsa shadang 80% du hkra shayawm kau ya lu nga ai.Dai majaw garai nbyin shi ai aten kaw na cancer ana byin wa chye ai lam ni hpe sadi sahka koi yen let nga sa chye ai gaw yawng a matu kaja dik rai nga mali ai.

Cancer ana byin wa chye ai lam madung ni hta malut hka yawm lu marawp ai mung lawm nga ai.Dai majaw cancer ana byin wa na hpe tsang ai rai yang malut hka yawm nlu ga,lu taw ai ni mung gau ngwi ngwi shayawm  mat wa nna dawm kau lu hkra shakut ga ngu kalang bai tsun shdum  n gun jaw mayu ai.Malut hka yawm lu ai masha ni hte mung ni ni htep htep n nga ga.Hka yawm wan hkut gaw lu ai masha wa hta sha nrai wan hkut marawp hkrup ai makau mayang na masha ni hta du hkra, hkra machyi shangun ai re majaw hka yawm lu ai masha ni mung tinang hka yawm lu marawp mayu jang dum nta masha shing nrai,masha hte tsan ai shara de sa lu chye ai akyang hpe galaw shaman da nna makau mayang na masha wa a matu myit ya chye nga ga.

Sau law ai lu sha hkum sha u – sau ngu ai hta hkum hkrang hkam ja lam a matu n nga n mai ra ahkyak ai hkam ja lam hpe akyu jaw ai sau ni mung nga ai.Dai majaw hkum hkrang hpe akyu jaw ai kaja ai sau hte hkamja lam  a matu nhkrak ai n kaja ai sau hpe ginhka sha chye na ra ga ai.Grau nna dusat sau ni rai nga ai u,hkai pyek hte nsam hkyeng ai hkarang shan hta na sau,ma-un sau ni gaw hkamja lam hte nhtuk ai sau hta lawm nga ai majaw koi gam ya na ra ai.Hkum hkrang hpe akyu jaw ai sau hpan ni gaw nga kaba sau,shapre sau,tsan lwin sau,hkainu sau, kawp ja tum hta na sau ni gaw hkamja lam hpe akyu jaw ai kaja ai sau hpan ni rai nga ai.

Nam law nam lap sha u – nam law nam lap law law sha ai gaw hkum hkrang hkamja lam a matu kaja dik rai nga ai.Dai majaw shan hpe shadawn sharam rai shayawm sha nna,nam nam lap hpe law law sha ga.Nam law nam lap ni hpe sha ai shaloi katsing sha mai ai hpan rai yang katsing sha u,shing nrai shadu sha ra ai baw rai jang mung shi hta na dat ni nprai mat na matu grai hkut hkra shadu kau ai nre sha,a kahtet lau di shadu sha na kaja ai.

Jan kahtet ai shara de aten grai na hkra hkum nga u – jan kahtet shing kang hpe jahkring hkring sha hkra ai+,aten grai na hkra jan kahtet ai kaw nga ai rai jang hkamja lam a matu tsang shara nga nga ai.Grau nna saba lai jan kahtet shing kang katen hkra hkrum ai gaw hpyi cancer ana a matu tsang shara nga ai re majaw sadi la chye na ra ga ai.

Myihprap wan sumri npu shing nrai dat wan sumri ni ai shara,wan n gun jaw ai jak rung kaba hte ni ai shara hkan nga ai lam hkum galaw u,myihprap wan jak arai ni hte ni ni htep htep dung ai,makau kaw tawn nna yup ai lam ni hkum galaw u.Dai mung cancer ana byin wa na hpe tsang ai hta lawm nga ai hpe anhte chye tawn da na ra nga ai.

Mu sau lai ai,malu masha ni hpe koi gam ga – tsun mayu ai gaw mi na shi a shingra nam chyim hta grau lai jan mu sau hkra dwi,sau hpa amyu myu bang jat nna galaw da ai malu masha ni hpe koi gam na,shadawn sharam sha ra na hpe tsun mayu ai rai nga ai.

Tsa hpe shayawm lu u – tsa grai law lu ai gaw hkamja lam a matu nhkrak ai hpe chye ai rai tim tsa lu ai masha grai law la nga ai.Tsa  galoi mung lu taw ai masha ni hpe tsa hkum lu u ngu tsun na mung yak la nga ai.Dai majaw nang gaw cancer ana byin wa na hpe tsang ai masha rai yang tsa hpe shayawm nna lu u.Tsa a majaw sin cancer ana hte sinwawp ana ni madung byin wa lu ai hpe dum nga ga.

Jum law ai nga jahkraw,nga banau ni, shan ju ni hpe hkum sha u.Dai lu sha ni mung hkamja lam a matu nhkrak ai hpe anhte yawng chye da chyalu hkrai rai na ga ai.Kalang marang sha ai gaw hpa mang hkang n nga ai rai tim,jum law ai nga jahkraw,nga banau ni hpe jahkring hkring  sha ai,shan ju jahkring hkring sha, sha ai gaw cancer ana hte kaga hkamja lam hkra machyi na hkrit tsang shara nga ai re majaw dai malu masha ni hpe koi yen koi gam ga,shadawn sharam rai sha ga ngu tsun shadum ya mayu ai.Shiga madat ni yawng cancer ana byin wa lu ai lam ni hpe koi yen koi gam nga sa chye nna asak galu ngwi pyaw hkam kaja ai akyu hpe hkam la nga ga law.

Lamang tang madun ai - Julia Ja Ing