Byili Si, Pu, Hpyi Hte Ru Ni Hta Na Lu Mai Ai Hkam Kaja Lam Akyu Ni

Ndang da lim nga nna mung shamying ai byili hpun  hta na lu la mai ai hkam kaja lam akyu hpe sawk sagawn hkaja da lu ai made garan kachyan ya mayu ai.

Byili si hpe shat mai shatai sha ga ai zawn byili hpyi hpe gaw tsi mawan hku nna akyu jashawn jai lang nga ga ai. Ndai byili si gaw sha yang loi hka ai nam chyim rawng nna n-gup  mu shangun ai shat mai kaja rai nga ai.Byili hpun ting hta e si,lap,pu,hpyi hte ru ni yawng gaw shingra  tsi mawan kaja mung rai nga ai. Dai re majaw byili hpun hta na kaning re ai akyu ni lu la mai ai hpe daini anhte hka ja la yu ga.

Hkam kaja lam a matu byili hpun hta na lu la mai ai akyu ni hpe hkaja dat yu ai shaloi gyi hpye ningma ni  sangau lawt,shanam ai rai yang byili ru hpe garang chya nna shamai ya lu ai.Na matswi yun ai,na wu kadu ai,na kata na nbung pru rai byin ai rai yang byili ru hpe htu mani la nhtawm chyingnam sau hte wan hta shadu kakang  nna loi lum lum nga ai hpe na hta kahte bang ya mai ai.Bai na kata na sai pru ai rai yang gaw byili si hpe wan ju la nna lwi hkri si ntsin hte gayau chya ya mai ai.Lamyi laman machyi ana byin ai,kan bum machyi ana byin ai rai yang mung byili ru hpe garang chya nna shamai la lu ai.

Jahkru,sinda chyat ana byin ai rai yang byili hpyi hpe htu mani la nna shanam hte lagat ntsin gayau bang rai lu ya yang mai tsai lu ai.Bai byili hpyi hpe htu mani nna hka tsing da ai hte n-gup garu,n gup krang ya ai rai yang mayu hkraw ai,n ten hkraw ai ana hpe shamai ya lu ai.

Byili si hpe shadu kaprawng kau shing nrai wan ju nna sha ai rai yang du bawng ana,jahkye shaw ana hte kraw galau ai ana ni hpe shamai ya lu ai lam tsun da nga ai. Bai nna byili si gaw cancer ana hpe makawp maga ya lu ai hte hkum bum machyi ai hpe mung shamai ya lu ai.Hkum hkrang na cell ni hpe bai galaw sharai ya nna hpyi nsam hpe hkalung tsawm htap shangun ai akyu mung jaw ya lu ai.

Byili si sha nrai,byili pu hpe mung hka hpun lum hte kaprawng kau nna gayau sha ya ai rai yang na kata kaw na nbung pru ai,na wu kadu ai,na lahpang ai,asak kaba wa ai majaw na nau nsan wa ai mang hkang ni a matu garum ya lu nga ai.

Mi sha tsun sai hte maren ndai byili hpun hpe shingra tsi mawan hku nna akyu jashawn lang chye ai ni nga ga ai raitim hpa baw ana ahkya a matu gara hku akyu jashawn jai lang ra ai hpe yawng tup hkrak gaw n chye na ga ai nhten. Dai re majaw ya sha na la lu sai lam hte rau byili si, pu, ru hte hpyi ni hta na lu la mai ai hkamja lam akyu ni a lam hpe matut hka ja yu ga.

(1)Byili hpyi hpe htu mani jahkraw tawn nna shanam,lagat ntsin hte gayau lu ya ai rai yang sinda chyat,sahti ana,jahkru ai ana ni hpe shamai ya lu ai.(2)Byili  hpyi htu mani da ai hpe sha hka hpun lum hte nar yi hkum (2) daram na hkra tsing tawn ai hpang jen la nna shana lu ya ya di ai rai yang kraw galau, nam pum pum ai hpe shamai ya lu ai.(3)Byili hpyi hpe hka tsing tawn nna dai hka hte n-gup krang garu ya ai rai yang n-gup,nten hkraw nna ga kahpraw machyi ai ana hpe shamai ya lu ai.(4 )Byili hpun ru hpe hkri hkraw lamyi laman machyi ana,kan bum,kan machyi ai ana ni byin ai shaloi garang chya yang mai tsai lu ai.

(5) Byili si hpe shadu nna rai rai,ju nna rai rai sha ya ai gaw nam pum pum ai,du bawng ai,jahkye shaw ai ana ni hpe shamai ya lu ai.(6) Byili ru hpe garang chya yang ningma shanam ai hpe lawan ai hku shamai ya lu ai.(7)Byili hpyi hte ru ni hpe garang chya ya yang hkum katsing si ana byin ai,sai,nbung atsawm nhkawm sa mat ai hte lasa hpam machyi ana ni mai tsai lu ai.

(8)Byili hpyi hte shanam  hpe maren bang,nam htan htam lahkawng bang nna gumdin kaji ji rai tarin tawn da u.Dai hpe kanu num ni ma shangai ngut ai hpang nhtoi 5/6 ya dang jahpawt shana lu ya ai rai yang kan htingpa machyi,mangut machyi ai hpe grai mai shangun lu nga ai.(9)Byili hpyi hpe htu mani la nna shanam ntsin,lagat ntsin hte gayau sha ya ai rai yang sinda chyat,jahkru ana mai tsai lu ai lam machye machyang ni hpe ra kadawn nga ai ni yawng akyu hkam la lu mu ga  ngu garan kachyan ya dat ai.

By - Julia Ja Ing