Bu Hkrawp Si A Hkamja Lam Akyu

Nbu si hpan hta na rai nga ai bu hkrawp si gaw sha dat yang a sau nga ai rai nna masha nkau mi sau law ai majaw hpum jat na hpe tsang nna koi gam ai ni nga ma ai.Kaja wa nga yang ndai bu hkrawp si hta rawng ai sau gaw hkamja lam a matu kaja ai sau rai nga ai.Dai majaw bu hkrawp si hpe lani mi ramdaw daw rai nna sha ya ai rai yang hpum jat na tsang shara n nga ai hte hkum num nak shadang hpe pyi hting hkang da ya lu nga ai.

Bu hkrawp si hta e protein dat, mawm dat, vitamin dat, n hprang dat, hpri dat,jumdwi dat,  folic dat,antioxidant hte omega-3 fatty acid dat ni rawng ai.Dai majaw bu hkrawp si hpe sha ya ai gaw cholesterol hte triglyceride shadang hpe shayawm kau ya lu ai hte salum ana byin lu na lam grai yawm mat ai.

Bai bu hkrawp si gaw kawp ja si hpan hta lawm ai rai nna kawp ja si ni gaw anhte yawng chye ai hte maren hkamja lam a matu sha ya na kaja ai,hkamja lam hte htuk ai lusha rai nga ai.Bu hkrawp si gaw bawnu nyan marai kaja shangun ai hte sai gayin shamu shamawt kaja ai majaw shadawn sharam rai lu sha chye ai rai yang hkamja lam a matu sha ya na kaja ai lu sha tsi mawan langai hta lawm nga ai re.

Bu hkrawp si sha nna lu la mai ai hkamja lam akyu ni hpe matut hkaja mat wa yu ai shaloi Cholesterol shayawm ya lu ai atsam nga ai. Hpa majaw nga yang bu hkrawp si hta anti-oxidant, polyphenol , vitamin E ni rawng ai hte hkum hkrang hpe akyu n jaw ai n kaja ai cholesterol hpe shayawm kau ya lu nna hkum hkrang hpe akyu jaw ai kaja ai cholesterol shadang hpe sharawt ya lu ai.

Salum hkamja ai - Bu hkrawp si hta alpha-linolenic acid ngu shamying ai hpun kaw na lu ai omega-3 fatty acid rawng ai majaw sai lam lasa ni hkamja nna salum de sai atsawm sha gayin shadu ya ai majaw salum hkamja ai akyu hpe jaw ya lu ai.Dai rai nna bu hkrawp si sha ya ai gaw salum ana a majaw si hkrum ra shadang tsa hta 10 du hkra shayawm kau ya ai lam chye lu ai.

Bum machyi ana hkyamsa lu ai . – bu hkrawp si gaw anti oxidant dat grai law rawng ai majaw bum machyi ana hpe hkyamsa shangun lu ai.Dai sha n ga jitdwi ana, sai rawt ana hte salum ana ni n byin hkra mung makawp maga ya lu ai.

Lusha rin kaja ai – bu hkrawp si hta kaja ai bacteria ni hpe lu sha n gun jahpring ya lu ai lu sha n gun dat ni rawng ai majaw hkum hkrang hte kaja ai bacteria ni hpe mung hkamja shangun nna lusha rin masa kaja hkra n gun jahpring ya nga ai.

Cancer ana byin lu masa hpe shayawm kau ya lu ai – bu hkrawp si hta e  sinda shan cancer,jit bawng cancer hte pu kaba cancer ana ni byin wa lu masa hpe shayawm kau ya lu na atsam rawng ai.Bai bu hkrawp si sha ya ai gaw hormone a majaw byin ai cancer ana hpe mung makawp  maga ya lu ai.

Jitdwi ana nbyin hkra makawp maga ya lu ai – bu hkrawp si gaw jitdwi ana nbyin hkra makawp maga ya lu na atsam rawng ai.Dai majaw shani shagu bu hkrawp si loi loi sha ya ai gaw jitdwi ana byin wa lu ai hpe tsa shadang 47% du hkra shayawm kau ya lu ai.Jit dwi ana lu taw ai masha ni mung bu hkrawp si sha ya ai rai yang jitdwi a majaw matut byin wa lu chye ai hkamja lam mang hkang ni kaw nna makawp maga ya lu ai.

Hkum num nak shadang shayawm ya lu ai – bu hkrawp si a kaja ai akyu langai mi gaw hkum numnak shadang hpe hting hkang ya ai rai nga ai.Bu hkrawp si hpe shat garai n sha ai ten loi sha da ai rai yang kan hkru nna lu sha grai law n lu sha sai majaw ladu lai hpum ai lam n byin hkra hting hkang ya lu ai.

Myitdaw ana hpe hkyamsa shangun lu ai .- Myit daw ana hkam sha taw ai masha law malawng gaw shanhte a hkum hkrang hta omega-3 fatty acid shadang yawm taw chye nga ai.Bu hkrawp si hta omega-3 fatty acid rawng shadang law ai a majaw bawnu bungli atsawm sha galaw lu na garum ya lu ai majaw myitdaw ana hkam sha taw ai masha ni a matu sha ya na kaja nga ai.

Jit bawng cancer ana hpe makawp maga ya lu ai – bu hkrawp si hta anti oxidant grai law rawng ai majaw jit bawng cancer ana n byin hkra makawp maga ya lu ai atsam rawng ai.

Hkum hkrang galu kaba lawan jat na garum ya lu ai – bu hkrawp si hta lu sha n gun dat grai law rawng ai majaw lani mi a matu ra kadawn ai lu sha n gun dat hpe atsawm sha jaw ya lu ai.Bai nna protein dat,vitamin B, vitamin E, magnesium, calcium, potassium ni rawng ai majaw bawnu a magam bungli hpe atsawm sha galaw shangun lu ai zawn hkum hkrang bawng ring galu kaba jat lam a matu mung ahkyak ai hta lawm nga ai.

Shingrai tsawra ai shiga madat nu wa hpunau ni ya ndai aten hta grai law pru nna manu mai mai hte mari sha lu nga ai bu hkrawp si gaw tinang a hkum hkrang hkamja lam akyu law law hpe jaw ya ai lu sha hpan re majaw hkamja lam a matu mung myit shalawm nna sha ya nga ga. Raitimung lani mi hta sha grai law sha ai hku nre sha,shani shagu shadawn sharam rai sha chye ga ai rai yang hkum hkrang hkamja hkamja lam akyu law law hpe teng sha hkam la lu na rai nga ga ai law.

lamang tang madun ai - Julia Ja Ing