Baw Hkrut Ladat Njaw Ai Gaw Kara Hpe Grai Hten Za Shangun Nga Ai

Masha shagu gaw galoi mung baw hkrut nga ga ai re.Rai tim nang galoi mung galaw taw ai baw hkrut ladat gaw jaw nga ai kun ngu ai hpe daini anhte hka ja yu ga. Baw hkrut ai shaloi masha law malawng galaw chye ai,grau nna kara galu ai num kasha ni galaw chye ai gaw kara madi chyam na daram sha hka jaw ai hpang baw hkrut tsi chya nna baw hkrut chye ga ai,dai gaw shut ai lam re nga nna tsun da nga ai.Baw hkrut ai shaloi  shawng nnan baw ga hpyi,kara ni hta kap ai ugri maza mala ni tsai mat na matu hka asan re ai hte minute mi dang na hkra atsawm shawng jaw kashin kau ra ai.Dai hpang she baw hkrut tsi chya nna baw hkrut ai gaw kara hkamja lam a matu jaw ai baw hkrut ladat re nga nna matsun da nga ai.

Kalang ta baw hkrut tsi chya nna baw hkrut ai gaw kara hpe grai hten za mat shangun nga ai.Bai nna baw hkrut tsi ntsin lang ai shaloi mung baw hkrut tsi hpe kara hta kalang ta chya dat ai hku nre sha,lata lahpan hta rai rai,sap  pya kawk shing nrai hka dagawt kawk zawn re ai lama ma hta bang nna hka loi mi hte shawng gayau kabun ngut ai hpang bawp atsawm pru ai shaloi she kara de chya nna baw hkrut ra ai.Dai gaw jaw ai baw hkrut ladat rai nga ai.Hpa majaw dai hku nmai galaw a ta nga yang,baw hkrut tsi hta lawm ai chemical datu tsi nkau mi gaw hka hta atsawm shawng gayau shatun nna bawp ntsin tai ai hpang she bungli galaw ai majaw rai nga ai.

Bai baw hkrut ai shaloi baw ga chyam hkra hpe abwi sha rai byip manat nna hkrut ai gaw myiman hpyi kyip lawan ai lam nbyin na matu tau nau makawp maga lam tai nga ai hte kara raw,kara run ai masha ni a matu mung hkyamsa lu na,makawp maga lam langai rai nga ai.

Masha nkau mi seng de sa nna baw hkrut ai,rai tim masha law malawng gaw tinang hkrai dum nta kaw baw hkrut la nga ga ai.Grau nna ya na zawn re ai Covid ana zinli kap bra law ai ten hta e tinang a dum nta kaw sha baw hkrut la ai ni law nga ga ai re.Tinang hkrai baw hkrut la ai shaloi,mi sha tsun ai hte maren lata layung nchyan ni hte baw hpe abwi sha rai dip manat nna hkrut ai gaw sai gayin shamu shamawt lam kaja ai hte atsu atsa nga ai lam ni mung hkoi mat shangun lu ai hkamja lam hte htuk ai baw hkrut ladat rai nga ai.

Ya daini na aten kara tsawm kaja na matu,kara kya madi na matu nga nna conditioner ngu ai kara kya tsi hte kara kabaw tsi ni hpe jai lang ai masha grai law nga ga ai.Conditioner kara kya madi tsi hpe ladat jaw ai hku jai lang chye na mung ahkyak nga ai re.Conditioner kara kya madi tsi hpe gaw baw ga hpyi de n hkra ai sha,kara a ntsa lam hte nchyan daw hkan sha chya na ra nga ai.Dai nrai yang conditioner hpe kara pawt du hkra chya ai rai jang kara ra pawt hku ni hpe pat kau ya nna kara nnan bai tu na matu dingbai dingna byin shangun ai hte baw sau law pru ai lam byin shangun  chye nga ai.Dai majaw kara kya tsi,kara kabaw tsi ni hta na chemical datu tsi ni gaw baw ga shan hkamja lam a matu nhkrak ai hpe galoi mung dum nna sadi sahka rai ladat jaw ai hku jai lang chye na ra nga ai.

Jahkring hkring sha baw hkrut ai – ndai mung sadi la ra ai lam langai rai nga ai.Hka shin baw hkrut ai ngu ai gaw hkum ding jasan jaseng lam rai nga ai.Rai tim shani shagu hka shin ai majaw shani shagu baw hkrut  gaw nra ai.Lahkawng ya hta kalang,bat mi hta 3 lang dang hkrut ai gaw kaja dik rai nga ai.Hpa majaw nga yang kara kaja,kya madi tsawm na matu gaw kara sing gawng hta nga ai shingra sau e galaw ya taw ai rai nga ai.Lama shani shagu baw hkrut ai rai yang kara hta na shingra sau ni htum hkraw mat ai majaw kara hten wa ai,kara lahkawng brang rai ga ai,hkai nu mun zawn rai hkraw ai lam ni byin wa chye ai hte kara ja ja,rawg rawng rai hten za mat chye ai lam sawk sagawn hkaja da lu ai hpe garan kachyan ya dat lu ga ai.

Lamang tang madun ai - Julia Ja Ing