Aten Ladaw Masum Nga Ai

Anhte hpe lai mat sai,ya nga ai,hpang de du na ra ai,ngu nna aten ladaw  daw masum ginhka tawn da ai.Lai mat wa sai ten gaw ya n nga ai,hpang de na aten gaw garai pyi ndu ai hte ya nga ai aten gaw lai mat wa sai ten hte hpang na ten a lapran na chyahkring mi laman sha rai nga ai.

Aten ladaw ngu ai gaw grai mau hpa langai mi rai nga ai hte  masha a matu grai ahkyak ai ni hta na langai mi mung rai nga ai.Rai tim dai aten ladaw gaw jum lu ai baw arai lama mi nrai nga ai.Dai hpe myit yu nga yang pyi dai aten gaw lai mat wa nga ai.

Masha nkau mi,malawng maga, ya ten hta chyu sha myit shakap da ma ai.Shanhte gaw hpang de na lam hpe grai wa n yaw shada ai hte lai mat wa sai lam hpe mung grai wa n sumru yu ai sha lani mi hpang lani mi lai wa ma ai.Masha nkau mi rai jang hpang na lam hpe nau sumru ai majaw ya ten e jaw da ai tsawm htap ai ahkaw ahkang hpe shalai kau ma ai.

Masum ngu na hpung hta nga ai masha ni mahtang,lai mat wa sai prat hta nga ma ai.Shanhte gaw moi prat na kaja ai lam,shing nrai lai mat wa sai shaning hkan na ruyak shoi hpa lam ni hpe chyu sha tut e myit dum ma ai.Shanhte gaw lai mat wa sai ten hpe nau tsang ai majaw ya na aten hpe akyu grai wa n jashawn kau ma ai.

Raitim hkrak ka-ang shen ai masha gaw aten ladaw masum hta na langai mi hpe pyi,sadi n da ai nrai.Yawng masum hte ting hpe sadi da ai.Shi a matu ya nga ai aten gaw ahkyak dik ai aten ladaw rai nga lu ai.Hpa majaw nga yang,ya nga ai aten chyu sha hpa raitim,shi galaw lu ai.

Dai ka-ang shen ai masha gaw hpang na ten hpe mung lai mat wa sai aten hpe mung,sadi nda ai nrai.Shi a matu hpang na ten gaw myit mada shara nga ai lam a kumla re.Ya na shi a sat lawat ni gaw hpang de shi lu na myit mada ai ngwi pyaw lam a matu lajang shachyip da ai lam rai nna,yawng hkrak yaw shada tawn ai hkrai re.

Lai mat wa sai aten  ni gaw hkrum katut yu sai lam sut sumpu rai nga ai.Hkrak ka-ang shen ai masha gaw ya aten na sat lawat ni a lam ningshawng tai ya na hte hpang de yaw shada ai lam ni a npawt tai ya namtu,lai wa sai aten hta hkrum katut yu sai lam ni hpe ya sha ya sha nhtang sumru yu nga ai.

Ya na aten hpe akyu grai jashawn nthawm,lai mat wa sai aten hta na hpaji la ai hpe hpang na matu hkrak yaw shada tawn da na ngu nna myit shachyen sa wa ai masha gaw,aten a lachyum hpe tup hkrak chye madat ai wa rai nga ai.

Rai yang tsawra ai shiga madat nu wa hpunau ni anhte nang ngai ni mung aten ladaw masum hta na gara hta lawm nga ga ai kun ?Ngai gaw ya ten hta chyu sha myit shakap da nna hpang de na lam hpe n yaw shada nga ai kun,shing nrai hpang na lam hpe chyu myit nna  ya ten e jaw da ai ahkaw ahkang hpe shalai kau nga ai kun?Shing nrai lai mat wa sai aten na ruyak shoi hpa lam ni hpe chyu myit nna ya na ten hpe akyu n jashawn kau ai hta lawm nga ai kun ngu ai lam ni hpe daini myit sawn ding lik yu nna tinang a prat hpe kalang bai shading sharai la nga ga law.