Asak Kadun Shangun Ai Lu Hpa Ntsin

Masha law law ra lu chye ga ai soda lawm ai lu hpa ntsin ni gaw hkamja lam a matu kaja ai lu hpa gaw nre ngu ai hpe masha law malawng chye na da ga ai raitim lu mu ai dwi hpa ntsin re majaw ra lu ai masha ni grai law nga ga ai.

Dai dwi ai lu hpa ntsin ni a majaw masha hkum gawng hpe sak kung lawan shangun ai hte kaga hkum hkrang hkamja lam ni hta ndum shami rai hkra machyi shangun taw ai gaw teng sha rai nga ai. Dai majaw soda lawm ai  hte jumdwi law rawng ai,ga shadawn cocacola, pepsi zawn re ai lu hpa ntsin ni hpe shadawn sharam rai nna lu ga ngu shawng tsun mayu ai.

Sawk sagawn lam ni galaw tawn da ai hta soda lawm ai, jumdwi law rawng ai lu hpa ntsin ni gaw malut hka yawm lu ai zawn sha masha hkum hkrang hpe gawng run, sak kung lawan shangun lu nga ai.

Ndai lam hte seng nna American Journal of Public Health a sawk sagawn da lu ai sum tang laika hta soda rawng ai dwi hpa ntsin ( 240 ml ) hka gawm mi dang hpe shani shagu lu taw ai rai yang masum ning na wa ai ten tinang a asak aprat hta asak lahkawng ning grau kaba ai zawn sak kung nna gawm lahkawng hta jan nna galoi mung lu taw ai rai yang gaw masum ning na ai hpang tinang a asak hta 5 ning grau kaba sak kung ai lam byin shangun ai lam tsun da nga ma ai.

Ndai mahtai hpe asak 20 ning – 65 ning lapran na hkamja ai masha marai 5,300 hpe masum ning tup sawk sagawn lam galaw nna lu tawn da ai lam chye lu ai. Soda lawm ai dwi hpa ntsin hpe grai law lu ai masha ni hta cell ni hpe makawp maga ya ai Telomeres ( DNA a matu nchyan ) ni kadun wa nna, sakkung kumla ni rai nga ai hpyi kyip dumrit ai lam ni byin wa ai hte cell ni bungli atsawm n galaw mat ai majaw shan hkraw hkraw re ai lam ni byin wa ai hpe mu lu ai. Dwi hpa ntsin hta rawng ai jumdwi dat nan mung bawnu, salum hte hkam jan n gun ni hpe hkra machyi shangun ai sha n ga, ban si tu ai lam ni mung byin shangun lu nga ai.