Ana Ahkya Tsan Gang Na Matu Hkum Hkrang Shamu Shamawt Lam Galaw Ga

Nang hta jahkring hkring sha waw shawn machyi rai nga ai kun, hkum hkrang ali ahti nga hkam sha taw ai kun, baw machyi nga n pyaw ai zawn nga jahkring hkring byin taw ai kun, ya sha ya sha jahkru taw ai kun, aten shagu n gun nrawng ai zawn nga hkam sha taw ai kun ndai lam ni hpe jahkring hkring sha hkam sha taw ai rai yang gaw hkum hkrang shamu shamawt lam hpe shani shagu galaw yu u. Grai wa laja lana rai n lu galaw ai raitim, jahpawt shagu shing nrai shana de shagu lam hkawm nna salat jahpaw kau ai hpe galaw yu u. Yawm dik bat mi hta masum ya daram tinang lu galaw na hkum hkrang lagaw lata shamu  shamawt lam ni hpe galaw yu u, byin hkrum taw ai ana ahkya ni hkyamsa mai tsai wa na ra ai. Dai zawn hkum hkrang shamu shamawt lam galaw ai gaw salum ana byin wa lu masa hpe mung shayawm kau ya lu nna nra ni hpe hkam kaja shangun lu nga ai.

Dai sha n ga hkum hkrang shamu shamawt lam galaw ai gaw sinwawp hte nsa sa lam hta na bacteria ana kanu ni hpe la shapraw kau ya ai hta mung garum ya lu nga ai. Hkum hkrang shamu shamawt lam galaw ai gaw mi sha tsun ai katsi lawt waw shawn ai, tuk kwi hte kaga ana ahkya byin wa lu masa law law hpe mung shayawm kau ya lu nga ai.  Galoi shagu hkum hkrang shamu shamawt lam galaw taw ai masha ni gaw anti body hte ana ahkya ni hpe shapraw kau ya lu na hkum hkrang a hkum chying n gun cell ni rai nga ai sai hpraw di a sai kata sai gayin shamu hkawm ai lam grau lawan wa nna ana kanu ni hpe lawan ladan rai mu tam shapraw kau ya lu ai.

Bai hkum hkrang shamu shamawt lam galaw ai gaw myit n simsa, myit n ngwi n pyaw byin shangun ai hormone shapraw shadang hpe mung shayawm kau ya lu ai. Dai majaw ginsup shamu shamawt lam galaw ai gaw myit pyaw simsa ai hpe mung hkam sha shangun nna ana ahkya law law kaw na makawp maga la lu nga ai.

Dai re majaw hkum hkrang shamu shamawt lam galaw ai gaw grau nna hkam kaja wa ai, n gun lapyin hpring ai akyu hpe lu la mai ai.  Hkum hkrang shamu shamawt lam galaw ai hte rau hkam kaja lam hte htuk kaja ai hku lu sha nga sa ai, aten hte hkrak hkrak rai yup hkring sa ai gaw nang hta e myit masin, hkum hkrang hkam kaja ai akyu hpe teng sha hkam la lu na rai nga ai.

Bai nna hkum hkrang shamu shamawt lam galaw ai gaw hkum hkrang hkam kaja ai akyu hpe jaw ya ai zawn tsawm htap ai akyu hpe mung jaw ya lu nga ai. Hpa majaw nga yang hkum hkrang shamu shamawt lam galoi shagu galaw taw ai masha ni gaw n gun ja wa hkra, shan ni hkak nna yu tsawm wa hkra garum ya lu ai hte tinang hkum tinang kam ai myit hpe grau nga wa shangun nga ai re.

Hkum hkrang shamu shamawt lam galaw ai gaw asak grau galu shangun ai akyu hpe mung jaw ya lu nga ai. Hpa majaw nga yang hkum hkrang shamu shamawt lam galoi shagu galaw taw ai rai yang salum sai lam hte nsa sa lam hpe hkam kaja shangun ai gaw hkam kaja nna asak galu shangun ai lam langai rai nga ai.

Tsawra ai shiga madat nu wa hpu nau ni nang kaja wa sha hkam kaja mayu ai rai yang hkum hkrang shamu shamawt lam hpe galaw byin hkra galaw yu u ngu n gun jaw tsun mayu ai. Hkum hkrang shamu shamawt lam hpe ta tut galaw taw ai masha ni gaw shi a akyu hpe teng sha hkam sha lu nga ma ai. Tinang a hkam kaja lam gaw tinang madu hkum nan sha sadi sahka lit la, gawn hkang la  ra ai re majaw hkum hkrang shamu shamawt lam hpe aten jaw nna n byin n mai galaw chyam yu u, akyu hkam sha lu ai hpe chye jang nang ayan galaw byin mat na ra ai.

Nnan galaw hpang wa ai ten hta akyu n hkam sha dum ai, yak hkak ai lam ni nga dum ai shing nrai lagawn na zawn nga na re, kalang lang n galaw byin mat ai ten ni mung nga wa chye ai. Dai zawn re ai aten ni hta tinang gaw hkum hkrang shamu shamawt lam a akyu hpe garai n chye hkam sha shi ai re majaw bai matut galaw na zawn n nga mat na ra ai. Raitim asum n jaw ai sha, matut nna shakut galaw u. Hkum hkrang shamu shamawt galaw ai a akyu hpe nang hkam sha lu wa ai shaloi aten hpe nlu lu hkra tam nna galaw mayu ai myit ni byin pru wa na ra ai. Tinang sharawng ai, shing nrai tinang galaw lu ai hkum hkrang shamu shamawt lam, shing nrai ginsup hpan lama ma hpe ayan galaw ya taw ai gaw myit masin, hkum hkrang nga pyaw, hkam kaja ai akyu hpe teng sha hkam la lu na ra ai ngu tsun n gun jaw garan kachyan ya dat lu ga ai.

By Julia Ja Ing