DINGKHU DE AI A YAW SHADA LAM (27 AUGUST 2018)

Hkungga tsawra ai Nu Wa hpu nau ni, “dinghku de ai a yaw shada ai lam “ ngu ai gin lam hte seng nna, yawng a matu machye machyang rai u ga, gam garan ya dat n’ngai.

        Kun dinghku de lit magam hpe gun hpai nga sai Nu Wa ni, dinghku de ai a yaw shada lam gaw hpa rai ta? …ngu ai ga san hpe bai san yu ga. ndai ga san hpe san dat ai hte, yaw shada ai lam ni amyu myu  nga na re gaw teng sha rai nga ai. Ndai zawn yaw shada ai lam hta mung kanu kawa makyin jing hku ni myit hkrum nna de ai dinghku a yaw shada lam hte shada da tsawra nna de ai dinghku, n’tsawra ai sha mabyin masa a majaw gaw de ra ai dinghku ni a yaw shada lam ni gaw bung na n’rai nga ai. Yaw shada ai lam n’nga ai sha ding hku de ai ni gaw n’nga na re. Ndai zawn yaw shada ai hta mung n’kau dinghku Num/ La  ni gaw tinang a dinghku hpe ahpa atang sha shatai ai, tinang hpe gawn na matu sha dinghku de ai, n’kau bai rai jang shingbyi machyu na n’nga ai majaw dinghku de ai, ra ang ai ten hta manang shatai na matu dinghku de ai zawn re ai ni nga nga ai.

        Ndai yaw shada lam ni mung maga mi hku gaw akyu jaw nga ai. Raitim, jet ai kun dinghku a matu gaw ngang grin lu ai, jaw ai yaw shada lam ni re ngu gaw n’mai tsun nga ai. Yaw shada ai lam hkrak n’nga ai rai jang gaw, n’nan daw sha pyaw nna, dinghku prat na wa magang yak hkak magang , n’ngwi n’pyaw rai magang , gali galaw, n’sim n’sa rai, dinghku bra mat chye nga ai re. Dai majaw dinghku bungi lit kaba hpe gun hpai sana nga myit daw dan sai hte rau , Aw…. kaja ai yaw shada lam gaw nga ra ai ngu ai myit hpe bang da ra nga ai . Dai zawn tinang a yaw shada lam hpe hkan shakut ai rai jang, kanu kawa ni jaw sha ai mi rai rai ? shada tsawra nna mi rai rai? n’tsawra ai sha mabyin masa amyu myu a majaw mi rai rai ? lani hte lani shada da tsawra myit ni ngang grin wa na, ngwi pyaw ai kun dinghku majing tai wa na rai nga ai.

        Nu Wa ni, kun dinghku de ai ngu ai gaw, Hpan Madu karai nan jaw ai chyeju sut gan langai mi kaw lawm nga ai . dai chyeju ni hpe n’chye jai lang ai rai jang gaw hkrit hpa  mung tai wa na rai nga ai. Manu shadan chye ai ni a matu chyawm gaw, Nampu Nampan hpan hkum nna, sama hawm ai , tsawm htap dik ai sun kaba hte bung nga ai re. Hkrit hpa ngu ai hta, dinghku kanu kawa gaw re da, dinghku hpe gaw ahkyak n’shatai ai sha htingbu htingbyen de lam n’da hkawm, lu da ai ja, gumhpraw hpe jai jahtum kau, pyaw sha Ah sha rai, hpa yaw shada lam mung n’nga re ai, dai dinghku gaw hkrit hpa rai nga ai. Nu Wa ni, dai ni na ten anhte a makau grup yin hta n’dai zawn byin ai lam law law nga nga ai hpe mu mada lu nga ai . Madung gaw dinghku de ai a yaw shada lam n’nga ai majaw re ngu yang n’shut na re. Dai zawn yaw shada lam n’nga ai majaw, shada da mara jaw hkat , n’chye na, nchye madat hkat rai, hpang jahtum dinghku bra mat ai du hkra byin chye nga ai. Nkau dinghku Num / La ni bai rai jang dum n’ta na mayak mahkak hpe myit daw myit htum nna, Tsa, chyru hpe manang shatai rai, prat hpe jahten jasa kau chye nga ai. Nang kun dinghku a Kanu nan Kawa nan dai zawn byin mat ai rai jang, ngam nga ai na a kashu kasha ni hpe gadai yu ya na, bau maka ya na rai ta? Mara n’lu ai Ma ni a prat matsan shayen rai mat na rai nga ai. Masha ni a man hta kani ya a kasha  , tsa ya a kasha , hpaji n’chye ai a kasha ngu nna, tsun hkrum sha na gaw teng sha rai nga ai. Zai zawn rai hkrum sha sai ma gaw, Shi a prat rawt jat galu kaba na matu, grai yak wa na rai nga ai. Hpa majaw nga jang shi a myit kraw kata hta myit kaji, myit yawn ai, myit daw ai lam ni a majaw , masha hpawng de n’sa gwi, manaw manang ni hte  n’sha gwi rai, ten shagu hta, myit kaji ai hte sha aten htum mat na rai nga ai.

        Mabyin langai mi hpe gram garan mayu n’ngai. Buga ginra langai mi hta, kanu yen kawa lahkawng yen Asuya magam gun ma ai. kashu kasha mung lahkawng sha lu ma ai. Dai kun dinghku gaw nnan daw hta grai ngwi pyaw ma ai. Raitim, dinghku a baw jum kawa hkum nan dinghku lit magam hta n’kang ka ai sha n’ga shi a yaw shada lam ni gaw dinghku shinggan na matu sha rai mat ai majaw, lani mi na ten hta tsa ya prat du mat wa ai. Grai pyaw ai dinghku kaw nna, hkrit maja ra ai, ga li ga law , shada da mara jaw ai madang de rai mat wa ai. mara kata ma yen gaw jawng sa tim n’pyaw, n’ta nga tim n’pyaw mat rai, hpang jahtum kasha num sha ma, salum ana hte si mat ai du hkra rai mat ai. Dai zawn hkrum sha ai Ma ni daini na ten hta gade she nga na? Dai ma ni a prat gaw, sak hkrung nga tim, kung hpan ai lam hta hpang hkrat mat na gaw, ta lahtum n’shut rai na re. Dai majaw Nu ni Wa ni e, grai myit yu ra nga sai. Lam shagu hta yaw shada lam gaw grai ahkyak nga ai re. Myit dum ra ai langai gaw, Na a yaw shada da ai lam hta Madu karai a chyeju lawm ra na n’mai malap nga ai. Dai chyeju hte rau ta tut jai lang na grai ahkyak ai. Yaw shada ai lam hta Karai kasang a chyeju mung lawm, nang hkum nan mung kam sham , kam hpa, manoi manat shakut ai rai jang gaw lani mi na a yaw shada lam ni awng dang ai chyeju lu la na gaw teng sha rai nga ai.  

        Tsawra ai Nu Wa ni, kun dinghku lit magam hta sha nre , lam shagu hta “bang dung” ngu ai yaw shada lam gaw grai nan n’hkyak ai manu dan nga ai lam gam garan ya let, lamang hpe ndai kaw naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.