Wa Sarabyin: Tara Laika Gaw Karai Mungga Hpe Shapraw Ya Ai Nsen Re

Italy mungdan kaw Tarahkaw Sara magam gun ni shi hte rau akyu hpyi na matu Wa Sarabyin Francis January 30, bat kru ya shani saw shaga da ai lam Vatican kaw nna ndau da ma ai.

Greek ga rai nga ai “Kerygma” Chyum Laika ga hte maren sumru hkaw tsun da ai tara laika hta madung da nna sumru akyu hpyi na matu Tarahkaw sara ni hpe saw shaga da ai. Dai zawn akyu hpyi ai gaw anhte shinggyim wuhpung wuhpawng a shawng lam a matu nhtoi jaw ya nga ai. Dai gaw nau na tsaw ra myit hte yawng hpe hkyawm la ai lam rai nga ai.

Wa Sarabyin Francis gaw “the National Catechetical Office of the the Italian Bishops’ Conference (CEI)” Italy mungdan kata Wa Saradaw Hpawng a matsun ai npu hta tarahkaw sara rung magam gun ni hpe n gun jaw mungga tsun da ai rai nga ai.

Dai rung hpe 1961 shaning hta gaw de hpang da ai rai nna, daining gaw 60 ning ladu hkrum shaning du sai rai nga ai. Ladu hkrum shaning gaw lai wa sai ten hta galaw lai wa sai lam ni hpe bai myit dum na matu, lu la sai chyeju a matu chyeju dum chyeju shakawn na matu, prat hta hkan nna ningnan re ai lam hte shatsawm jahtuk nna hkaw tsun na matu rai nga ai ngu mung tsun shadum da ai.

“Nanhte a magam bungli shagu hpe garum ya na re ngu myit mada ai,” ngu mung Wa Sarabyin Francis n gun jaw da ai.

Tarahkaw Sara ni hte Tara Laika gaw galoi mung arau rai nga ra ai. Tara Laika gaw Karai Mungga hpe nsen shapraw ya ai. Tarahkaw Sara ni gaw Chyum laika hte htep lahti rai nga ra ai.

Tarahkaw Sara/num ni hte shawng lam myit mada shara

Tarahkaw Sara/num ni gaw Sasana lam hta shawng lam myit mada shara kaba hpe lahpa hta gun hpai da ai ni rai nga ai. 2020 shaning gaw Italy mungdan kata tara laika hpe shatsawm jahtuk ai 50 ning hpring shaning rai nga ai. Tara laika sharin ai hta myit lawm hkawm lawm ai hte atsawm sharin madat hkam la na matu gaw grai ahkyak ai lam Wa Sarabyin Francis n gun jaw da ai.

Chyum Laika hta na Madu Yesu a ga shadawn “Kaja ai Samaraitan” masha zawn prat hta hkra machyi hkrum nga ai ni a ana ni hpe tsaw ra myit hte tsi tsi lajang ya chye ai ni tai nga na matu shinggyim wuhpung wuhphawng shagu hpe n gun jaw saw shaga da ai lam hpe Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-01/pope-francis-catechesis-...