Wa Sarabyim A, Lu Sha Gam Ladaw A Matu, Mungga Ndau Shana

2020 ning a matu Wa sarabyin Francis a Lu Sha gam ladaw mungga hpe Feb 24, bat langai ya shani hta Vatican kaw nna ndau shapraw dat nga ai.

Korintu masha ni hpang de Kasa Pawlu shagun dat ai laika 2 daw kaba 5 kaji 20 hta na “Karai Kasang hte htinglu htinglai mu, ngu nna Hkristu a jaw e anhte hpyi nem ga ai” nga ai ja chyum mungga daw hte ga baw shatut da ai Wa sarabyin Francis a 2020 ning Lu Sha gam ladaw mungga hta, “Karai Kasang hpang de bai gayin wa lu na lam a npawt madung ahkyak gaw Paska mung sung lam rai nga ai Madu Yesu a nni nkri hkam la ai lam, si hkam ai lam hte bai hkrung rawt ai lam ni hpe sumru yu ai lam re, dai hpe ndai Lu Sha gam ladaw hta galaw nga ga” nga nna hpung masha ni yawng hpe saw shaga ai lam Wa sarabyin Francis galaw da nga ai.

Wa sarabyin tsun ai hta, “Ndai Lu Sha gam ladaw laman hpung masha ni yawng hku nna Madu Yesu a udang hpe sharawt madu yu nga nna dai udang a marang a jaw ya nga ai hkye hkrang la ai lam hpe ya sha ya sha kahtap nna bai hkap la ai lam ni galaw nga ga, Madu Yesu a nni nkri hkam la ai, si hkam ai hte bai hkrung rawt ai lam ngu ai gaw labau byin lai wa sai mabyin langai san san sha nrai, Chyoi pra ai wenyi a atsam hte dai mung sung lam ni gaw anhte a lapran dingrun shanu nga ai, yu rak jam jau tsinyam lam ni hkrum nga ai hpu nau ni hta Madu Yesu a hkum sai shan hpe anhte hkra lu, mu mada lu nga ga ai” nga nna Wa sarabyin tsun shadum da nga ai.

Akyu hpyi na ahkyak ai lam hte seng nna Wa sarabyin tsun ai hta gaw “akyu hpyi ai lam gaw Madu Karai kasang a tsawra ai lam hpe anhte maga kaw nna bai chyeju htang ai lam rai nga ai majaw Lu Sha gam ladaw hta akyu hpyi na matu grai nan ahkyak nga ai, akyu hpyi ai hku nna sha shawng de anhte sit nawt lu na ga ai hte da hpran lu nga na mung rai ga ai. Madu Yesu a mungga hpe madat hkan sa ga ai rai yang sha, jahpu manu njaw ra ai sha anhte hpe shi Madu madun jaw ya nga ai shi a tsawra matsan dum lama ai lam hpe anhte hkam sha l una rai ga ai. Gawng kya ai shut hpyi ai ni anhte rai nga ga ai raitim, Karai Kasang gaw shi a hkye hkrang la ai lam anhte hpe jaw ya na matu galoi mung shakut nga ai, anhte hpe hkye la mayu ai myit a marang e Karai kasang gaw anhte yawng a shut hpyit mara ngu ai lit hpe shi a kasha a kahpa ntsa mara ya sai rai nga ai” nga nna mung Wa sarabyin Lu Sha gam ladaw mungga hta ka shalawm da nga ai.

Grau mai kaja nga pyaw ai mungkan ga byin tai hkra jawm gaw gap shakut mayu ai myit rawng nga ra ai lam the seng nna Wa sarabyin tsun ai hta gaw, “Madu Yesu a nni nkri lam ni hpe ndai Lu Sha gam ladaw hta myit dum sumru yu ai lam ni galaw ai ngu ai lachyum hta, majan the kaga ntara ai lam ni amyu myu a majaw mara kata tsinyam hkrum nga ai hpu nau ni a tsinyam lam ni hpe myit tau ya ai, shanhte hpe matsan dum lama lam madun ai, shanhte a tsinyam lam ni hta nni nkri hkrum nga ai Madu Yesu a myit man hpe mu mada ya ai. Ndai lam ni gaw grau mai kaja tsawm htap ai mungkan ga byin tai hkra gaw gap shakut ai lam ni nan rai nga ai” nga nna Lu Sha gam ladaw a matu ndau shapraw ai Wa sarabyin Francis a mungga hta hpung masha ni yawng hpe shadum dat nga ai lam Vaticasn shaiga dap kaw nna shana dat nga ai.                         

Source - Vatican News

 #churchnews

#rvakachinservice