Myanmar Mungdan Simsa Rapra Lam A Matu May Shata Rosary Hti Na Matu Cardinal Charles Bo Saw Shaga

Kahtawlik Nawku Hpung masha ni akyu hpyi ai lam langai rai nga ai “Rosary” hti ai lam hpe shaning shagu May shata hta hpung masha shagu ahkyak la hkan shatup nga ga ai rai nga ai.

April, 23 ya shani Cardinal Charles Bo ndau shabra lam galaw da ai hta “daining 2021 shaning na May shata Rosary hti ai yaw shada lam hpe Myanmar mungdan simsa rapra lam lu na matu rai u ga”, ngu Nawku Hpung masha ni hpe ndau shabra da nga ai.

 Saradaw, Jau, Deacon, Brother, Ma Ma, Tara Hkaw Sara/num ni hte nawku hpung masha ni yawng May shata akyu hpyi ai hpe Nawku Jawng hta, Maria Lungpu ni hta, htu manu ai masa lam hku Rosary hti akyu hpyi lamang ni hpe galaw let shang lawm ga, ngu saw shaga da nga ai.

Bat Shagu Na Yaw Shada Lam Ni

1. Mungdan ngwi pyaw simsa lam lu na matu (shawng na laban bat a yaw shada lam)
2. Mungdan hta tara rapra lam lu na matu (Lahkawng ngu na laban bat a yaw shada lam)
3. Mungdan kata galung kahkyin gumding lam nga na matu (masum ngu na laban bat a yaw shada lam)
4. Mungdan kata shinggyim sari hpe hkungga manu shadan na matu (mali ngu na laban bat a yaw shada ai lam)
5. Mungdan rawt jat galu kaba wa na matu (May hpang jahtum laban bat a yaw shada ai lam)

Nawku Hpung woi hpa-awn ni kawn shani shagu na Misa Hkungga nawng jaw ai aten ni hta ndai yaw shada lam ni hpe ndau ya na matu, shani shagu ahkying hkum mi (2:00 p,m – 3:00 p.m) yaw shada lam tawn let Chyoi Pra Hkum kawan na matu hte shani shagu Rosary akyu hpyi ai hpe shana daw hkying sanit (7) kaw nna hkying masat (8) lapran hta galaw na matu lam matsun masat da ya ai.

“Teng man dinghpring ai lam, sak jaw daw jau ai lam, tara rapra lam hte galung kahkying gumding lam ni n nga ai rai yang teng man simsa lam hpe n lu la ai” ngu Wa Sarabyin Yawhan Pawlu II a shadum ga hpe mung Cardinal Charles Bo ga manoi jaw da ai.

“Ndai mungkan gaw awng dang lam, atsam ningja rawng ai lam hte ja gumhpraw sut su lam tam na matu tsun ai rai tim, Karai Kasang gaw shagrit shanem lam, ap nawng daw jau lam hte shawang tsawra ai lam hpe tam na matu tsun nga ai,” ngu Wa Sarabyin Francis tsun shadum da ai ga hpe mung tsun dan da ai.

Wa Sarabyin Francis hte Vatican kaw mung 2021 shaning na May Shata Rosary Hti Ai Hta Covid-19 Lawan Hkoi Htum Mat U Ga Matu Rai U Ga Ngu Yaw Shada Let Mungkan Ting Hta Kam Sham Ai Masha Ni Rosary Hti Akyu Hpyi Na Matu Saw Shaga Da Nga Ai.

Cardinal Charles Bo Ndau Da Ai May Shata Rosary Hti Yaw Shada Lam Hpe Mung Vatican Shiga Dap Kawn Mung Ndau Da Ya Ma Ai.

“Ngwi pyaw simsa lam a matu galaw hunhpai ai ni gaww a lu ma ai; hpa majaw nga yang, shanhte hpe Karai Kasang a kasha ni, ngu nna shamying na maru ai!” (Mt 5:9)

By Fr. Patrick Gawmaw Hkawng Yae

#fabcosc

#vaticannews

#rvakachin

www.catholicarchdioceseofyangon.com