Chyum Laika Gaw Karai Kasang Shinggyim Masha Ni Hpe Hkrum Shaga Ai Shara Re nga tsun dat ai Shiga

January 27, laban bat masum ya shani, “shawa masha ni hte hkrum shaga ten,” Wa Sarabyin Francis, anhte marai hkum shagu a matu ka da ai chyum laika hpe hpaw hti nna akyu hpyi let sak hkrung hkawm sa ai gaw ahkyak ai ngu sumru woi da nga ai.

Karai a Ja Chyum Mungga gaw laika maisau pa hta ngam nga na matu yaw shada let ka da ai hku n re ai sha, masha hkum shagu a myit masin salum hpe hpaw malang ya na matu ka da ai she re ai lam,Chyum laika ga si ni gaw anhte marai hkum shagu a matu rai nna, Karai Kasang a mungga hpe anhte marai hkum shagu hpang de gun sa ya ai Chyum Laika re,Ndai mahkrum madup gaw kam sham ai ni yawng hta hkrum yu ai mahkrum madup rai nga ai lam Wa Sarabyin tsun ai.

 Chyum Laika daw ni hpe anhte ni law law lang na yu shaga ai hte dai chyum daw ni anhte hta sak hkrung nga ai rai nna, anhte ni sawn sumru dinglit yu let sak hkrung nga lu na matu chyam dinglit ai lam law law galaw ya nga ai.

Dai chyum daw hte maren, dai shani, sak hkrung na lu hkra shakut na gaw ngai a matu ahkyak dik ai rai ngai ai ngu myit la chye na matu mung shadum da ai. Dai gaw anhte a prat hta nli tum gat hkai da ai zawn rai nga ai.

Hkristan masha ni gaw Madu Yesu shanu nga ai nawku tawn ni rai ga ai. Akyu hpyi ga hta Karai Kasang a Mungga shinggyim hkum hkrang dagraw la nga ai. Dai gaw anhte hta  Karai Kasang a Mungga hpe ningnan bai dagraw la ai lam rai nga ai. Anhte ni hta Madu Yesu shanu nga ai nawku tawn ni tai nga ai rai yang, dai nawku tawn e, anhte hkap la hkan sa ai hta hkan nna Karai Mungga gaw mungkan masha ni nga ai mungkan ga de sa du nga na rai nga ai.

Kam sham ai masha ni gaw Chyum laika hpe myit sawn hpaji lam hte shinggyim kyang lai masa a matu hpaw hti ai ngu ai hta, shanhte ni Karai Kasang hte hkrum shaga lu na myit mada lam nga ai a majaw hpaw hti ai rai nga ai. Chyoi Pra Chyum Laika hta rawng ai Mungga shagu gaw Chyoi Pra ai Wenyi a marang e ka da ai re ai hpe kam sham ai masha ni yawng chye na hkap la ma ai.

Anhte nga ai shara hta, makau grupyin hte anhte hta byin nga ai lam ni hta hkan nna dai chyum daw ni anhte hpe shadum ya ai hpe myit dum sumru la lu ai gaw Karai Kasang a chyeju nan rai nga ai.

Hkristan ni gaw Chyum daw ni hpe hti sumru ai hta, hkaikye u zawn matsin la na matu hti ai hku n re ai sha, Karai Kasang hte hkrum shaga lu na matu hti sumru ra ai.

“Lectio divina” ngu ai ga si gaw Latin ga rai nga ai. Lachyum gaw english ga hku “Divine Reading” ngu ai rai nna, anhte Jinghpaw wungpawng ga hte “Chyoi Pra Chyum laika hti sumru ai lam,” ngu yang manu na re.

Wa Sarabyin Francis ndai Lectio divina hte seng nna mung nawku hpung labau hta nawku hpung kanu kawa ni woi galaw hkrat wa ai chyum laika hti sumru ai ladat hte maren chyum laika hti sumru shakut na matu n gun jaw da ai.

Chyum laika hta na chyum daw hte ga shaga hpang ai gaw dai chyum daw a marang e, myit sumru akyu hpyi na matu anhte hpe ga hte tsun shadum nga ai rai sai.

Chyum laika hti ai a marang e hpang jahtum lu la ai gaw tsaw ra na matu lam hpaw ya ai rai nga ai.Chyum laika ga si ni gaw shingna madun ai jamna (pat) zawn hkum zup ai wa a hkrang sumla hpe hpring tup madun ya lu ai rai nga ai.

Shi a tara laika sharin ai hpang jahtum mungga hta “Akyu hpyi ga a marang e Karai Mungga anhte hta shanu nga u ga hte anhte mung dai Mungga hta shanu nga ga. Dai mungga gaw anhte hpe ngwi pyaw simsa lam jaw ya ai,” ngu Wa Sarabyin Francis tsun shadum da ai hpe Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice