Christmas Crib hte seng ai matsun laika Wa Sarabyin ndau shapraw dat nga ai shiga

Christmas Crib ngu ai Hkrismat aten hta anhte galaw lang ai Madu Yesu shangai wa ai dumsu lawng nta kaji hte seng nna shadum matsun ai ndau laika hpe Wa sarabyin Francis ndau shapraw dat nga ai. Dec praw 1, laban shani, Italy mungdan a bum ga mare kaji langai rai nga ai Greccio ngu ai shara de sa du nga ai aten ndai ndau laika hpe Wa Sarabyin ta masat htu nna ndau shapraw dat ai lam rai nga ai. Ndai Greccio ngu ai mare kaji gaw, lai wa sai 1223 ning hta San pra ai Francis Assisi kaw nna Christmas Crib hpe shawng nnan galaw lang hpang ai mare shara re, nga ai.

“Christmas Crib ngu ai ngu ai Hkrismat aten hta anhte galaw lang ai Madu Yesu shangai wa ai dumsu lawng nta kaji hte dai hta mu lu ai ai sumla ni yawng gaw anhte a myit masin hpe kabu pyaw shangun ai lam ni hkrai rai nga ai, Kabu gara ai shiga hta na Madu Yesu shangai chying hkai wa ai mabyin lam ni hpe myit dum shangun, shinggyim masha hte hkrum zup lu hkra anhte hte rau nga nga lu hkra shagrit shanem ai myit hte shinggyim hkum shan dagraw la ai lam gaw tsawra myit kaba dik ai lam rai nga ai, ndai lam ni hpe sumru yu ai lam ni gaw anhte a makaam masham hkrun lam nan mung rai nga ai” nga nna Wa Sarabyin a ndau laiak hta tsun dat nga ai.

Ndai Christmas Crib gaw Madu Yesu a prat a mung sung lam ni law law hpe myit dum shangun ai, dai mung sung lam ni anhte a shani shagu na prat hte grau ni htep wa shangun ai, Madu Yesu shangai wa ai Bethlehem mare kaji hpe myit dum shangun ai, lai wa sai 1223 ning Greccio ngu ai mare kaji hta, San pra ai Francis Assisi kaw nna ndai Madu Yesu shangai wa ai dum su lawng nta kaji Christmas Crib hpe shawng nnan galaw da ai shara de, Dec 25 Hkrismat shani dai mare kaw nna masha kaji kaba yawng kabu gara ai hte, nam pan ni lang rai nna sa du lai wa ma ai. Lu su matsan, arawng aya lu ai nlu ai n gying hka ai sha yawng maren sa du lai wa ma ai, ndai gaw Christmas Crib shawng nnan lang hpang wa ai labau mabyin rai nga ai. Christmas Crib gaw si mani ai, shagrit shanem ai lam a kumla re, Christmas Crib hta hten bya nga ai lam ni hpe mu lu ai, dai gaw hten run nga ai shinggyim masha a mabyin, dai hpe gram lai na matu Madu Yesu du sa ai ngu ai lam hpe shadum ya ai, Sagu rem ni a sumla ni gaw, sut su ai ni nrai grai mastan ai masha ni shawng shangai wa sai Madu hpe sa du hkalum ma ai lam hpe myit dum shangun ai.

Maria gaw shi a kasha hpe yu nna myit aru yu nga ai, dai ma hpe shi a matu chyu zing kyem da ai lam n galaw ai sha sa du ai ni yawng hpe dai ma hpe madun ya nga ai. Yawsep gaw kanu hte ma hpe makawp maga ya nga ai. Ma chyangai Yesu a sumla hpe wu shat wa kang hta bang da ga ai majaw Madu Yesu shangai wa ai lam mabyin hkum zup ai masa mu lu nga ai. Karai kasang hpe ma chyangai zawn mu mada na matu nmai byin na re ngu nna myit nga ga ai raitim Karai kasang hpe ma kaji langai zawn anhte mu lu nga ga ai, dai gaw teng man ai lam nan rai nga ai. Sinpraw mung na hkaw hkam masum hpe mung mu lu ga ai, dai kabu gara ai shiga hpe shachyam shabra na lit anhte yawng hta nga nga ai, ngu ai hpe myit dum shangun nga ai, nga nna Christmas Crib hta mu lu ai lam ni yawng langai hpang langai a sung htum ai lachyum ni hpe sang lang da nga ai lam Wa sarabyin a matsun ndau laika hta ka shaleng da ai, nga nna Vatican shiga dap kaw nna shana dat nga ai.            

https://www.vaticannews.va/en/pope/news/2019-12/pope-francis-apostolic-letter-nativity-scene-meaning.html