“Global Rosary” Hti Ai Hta Jaw Bang Ai Alu Hpe Akyu Hpyi Sa Ai Ni Hpe Daw Jau Ya Ai “Mary’s Meals” Hta Jai Lang Ai

Mungkan Rosary hti hpung ni lu la ai alu ni hpe matsan jam jau ai bawda jawng ma ni hte kaga jawng ma ni, bai malu masha yak ai ni hpe daw jau ai hta jai lang ai rai ma ai.

Daining gaw chyam bra ana coronavirus a majaw mungkan ting nhti nhtang byin mat ai rai nna, jawng ni pat ai majaw mung, mungdan langai hte langai matut mahkai hkawm sa hkawm wa pat da ai majaw mung, dam lada ai hku daw jau sa wa n mai mat ai.

Mungdan ni hta hkawm sa akyu hpyi ai lam gaw n hkring ma ai; shara mi kaw na shara mi de htawt hkawm akyu hpyi nga ma ai. Dai majaw November 13 – 15 ya lapran akyu hpyi sa ai ni yawng hpe daw jau nga ai lam chye lu ai. Ndai hku galaw ai gaw 2020 shaning na shawng nnan na lang rai nga ai.

2017 shaning kaw nna, Medjugorje, Bosnia-Herzegovina, ni hta nga ai Chyoi Pra ai Maria Lungpu ni hta kam sham ai hpung masha ni sa du rau hpawng de let myit sumru akyu hpyi ai lam galaw hpang wa ai. Dai zawn rau hpawng de akyu hpyi ai ni kaw nna lu la ai alu ni hte matsan mayan ni hpe malu masha daw jau ai hpe “Mary’s Meals” ngu ai rai nga ai.

CEO - Mary’s Meals” hpe shawng gawde ai wa gaw Magnus MacFarlane-Barrow rai nga ai. Rosary jawm hti akyu hpyi ai hta shinggyim myu hpan ga law law hte rau jawm hti ma ai.

Daining gaw masha hkum nan rau hpawng de na matu nmai byin ai majaw online ntsa hta rau hpawng de let Rosary hti ai lam galaw nga ai.

Online ntsa Global Rosary hti ai Africa hte India kaw na sasana ma ni lawm ma ai hte, Roma, Poland, Myanmar hte Haiti mungdan na ni mung lawm ma ai lam chye lu ai.

Mary’s Meals hku nna garum ya nga ai hpe anhte Jinghpaw mungdaw hta mung Kahtawlik Nawku Hpung hpaji dap (DEC) kaw nna matut mahkai garum nga ai rai nga ai.

Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/world/news/2020-11/global-rosary-centrepiece-of-mary-s-meals-virtual-pilgrimage.html