Wa Sarabyin: Yesu A Sape Ni Gaw Matsan Ma Ai, Raitim Kabu Gara Ma Ai ( 16 Feb, 2022 )

Vatican Post

Wa Sarabyin: Yesu A Sape Ni Gaw Matsan Ma Ai, Raitim Kabu Gara Ma Ai

February 13, laban shani, San Peter Shawa Pa hta, “Madu A Lamu Kasa Akyu Hpyi Ga” tsun ten, Wa Sarabyin Francis, “Yesu a sape ni gaw Alu Ma Ai hpa majaw nga yang shanhte ni matsan mayan rai ma ai majaw rai nga ai,” ngu hkaw tsun da ai.

Chyum Laika hpe dai shani hti ang ai Lk 6:20-23 hpe sumru woi da ai.  Alu lam lam hte seng ai lam rai nga ai. Dai Alu ai hta sape ni mung lawm ma ai lam Wa Sarabyin Francis sakse hkam da ai rai nga ai.

Shanhte gaw kaga masha ni a man e mau hpa atsam rawng ai ni, n-gun rawng ai ni hku mu mada yang mada hkrum na ma ai. Gara hku mi rai rai, shanhte gaw teng sha Alu ai hpung hta lawm ma ai, ngu Wa Sarabyin mahtai jaw da ai.

“Matsan mayan re ai ni gaw, Alu ma ai, kaning rai nme law sumsing mungdan gaw shanhte ni a mungdan rai nga ai”, ngu ai, Madu Yesu tsun ai alu ai lam hta  sape ni mung lawm nga ai hpe Wa Sarabyin sumru woi da ai rai nga ai.

Yesu Madu gaw shi a shawa masha ni hpe myu hpan lahkawng tsun dan ai: (1) Shanhte gaw shaman ai hpe hkam la lu ma ai hte matsan mayan rai ma ai, (2) shanhte gaw matsan mayan rai ma ai hpa majaw nga yang shanhte shaman hkam la lu ma ai.

Matsan mayan re ai gaw Hkristan masha ni a matu kabu pyaw lam hpe hkam la lu ai, shani shagu Karai Kasang kaw na kumhpa hpe hkam la lu ai, rai nga ai. Hpan da hkrum sak prat hta kahpu kanau, nau na myit majing gaw gap ai hta gumhpraw hte n re ai, kaga ja sut gan arung arai hte mung n re ai. Tsaw ra myit hte she rai nga ai.

Sape ni gaw shagrit shanem ai ni, myit masin hpaw malang da ai ni, n tsen n hten ai lam ni kaw nna tsan tsan kaw nga ai ni, myit ja nna galai shai n kam ai hpe n ra sharawng ai ni rai ma ai.

Petru gaw shi lu malu hpe kau da ai; ndai masa hte sape tai wa ai. Kadai raitim, tinang a myit hkan ai, tinang masing hpe manoi ai, tinang a shimlam hpe chyu sha myit ai rai yang gaw Yesu a hpang kaja wa sha hkan nang ai hta yak hkak lam ni hpe hkrum na gaw teng sha rai nga ai.

Alu ai ni gaw matsan mayan rai ma ai ngu ai gaw shanhte ni mungkan sut gan lam hta n lu n su ma ai, shanhte lu ai hpe mung ra kadawn ai ni hpe karum jaw karum ya ma ai, dai gaw kabu pyaw na lam rai nga ai.

Karai Kasang gaw, anhte a tinang hta madung kam hpa ai mayam prat kaw nna shalawt ya ai, dai zawn re ai n jaw n ang ai, myit ja ai hte hkap la hkam la shut ai myit ni hpe shading sharai ningmu jahpaw, myit masin jasan jaseng ya nna teng man kabu pyaw lam anhte hpe jaw ya ai.

Mungga ginchyum dat let anhte tinang hkum hpe sha madung da kam hpa ai rai kun, dai anhte a tinang a myit la hkam la ai n jaw n ang ai hta sha naw machyu nga ai kun, san let, Yesu a sape ni zawn alu ai kabu pyaw lamhta hkawm sa lu na matu Kanu Nu Maria akyu hpyi htinglu htinglai ya nga u ga, shi hta mung kam hpa nga ga, ngu Wa Sarabyin Francis, Madu A Lamu Kasa Akyu Hpyi Ga tsun ten mungga htawn da nga ai.

By Fr. Patrick Gawmaw Hkawng Yae

#vaticannews

#rvakachinservice

 

 

Add new comment

13 + 6 =