Wa Sarabyin: Yesu Madu Hpe Sak Prat A Lusha Hku Hkap La Ga Nga Tsun Ai

Wa Sarabyin: Yesu Madu Hpe Sak Prat A Lusha Hku Hkap La Ga Nga Tsun Ai

  August 1, laban ya shani, San Peter pa hta, “Madu A Lamu Kasa Akyu Hpyi Ga” tsun ten, Wa Sarabyin Francis mungga shaga ai hta, anhte a mungkan lam hta ra kadawn ai hpe sha ahkyak madung hkum da ga; raitim, dai lam ni hpe tam bram ai a yaw shada ai gaw Karai Kasang hte nihtep hku hkau lam tam na matu rai u ga ngu n-gun jaw da nga ai.

  Dai shani a Kabu Gara Shiga Ja Chyum daw hpe sumru woi let hpung shawa masha ni hpe hkaw tsun ai rai nga ai. Madu Yesu muk tawng ni hpe akyu hpyi shalaw let shawa masha ni hpe dau jau ai hta lawm ai shawa masha ni sakse hkam let Madu Yesu a hpang hkan nang wa ai lam sumru woi da ai rai nga ai.

  Yesu Madu hpa galaw ai hpe shawa masha ni atsawm n chye na shi ma ai. Kaja wa shanhte a matu mungkan hte seng ai, hkum hkrang hte seng ai hpe sha Madu Yesu jahpring shatsup ya ai hpe madung hkam la chye na ma ai. Dai lam a matu madung da nna Yesu hpe tam ma ai.

  Anhte mung dai shawa masha ni zawn myit grip hku sumru, myit la, hkam la chye ga ai.  Mungkan lam, hkrang mu hpara sumla ni hpe madung da chye ai gaw teng man Karai Kasang hpe tam ai hta dingbai dingna byin chye nga ai, agung alau tai chye nga ai. Karai Kasang hpe anhte a akyu matu chyu sha, anhte ra yang na matu chyu sha jai lang chye ga ai.

  Anhte Karai Kasang hpe hpa majaw tam nga ga ai kun? Anhte ra kadawn ai shaloi Shi hpe myit dum ga ai raitim, anhte myit dik myit pyaw lam lu ai shaloi Shi hpe malap kau chye ga ai.

  Karai Kasang gaw anhte hte rau nga nga na myit ra ai. Anhte hpe mung  Shi hte rau nga nga na hpe myit ra ai. Tsawra myit hta matut mahkai nga na hpe myit ra ai. Karai Kasang gaw anhte a akyu hpyi ga hpe madat ya let, anhte myit mada da ai hta law jan hkra jaw ya nga ai. Tengman tsawra gaw Karai Kasang a chyeju kumhpa rai nga ai. Karai Kasang, Shi jaw ya ai dai tengman tsawra a matu lama ma bai myit mada lam galoi mung n tawn da ai. Karai Kasang hte matut mahkai ai lam gaw logic masa hku myit lawm myit shang sha lam hte masat shadang ni tawn da ai lam hku n mai rai nga ai.

  Dai shani na Kabu Gara Shiga hta, shawa masha ni, “Karai magam hpe jahkum shatsup lu na matu anhte hpa galaw ra na rai ta?”, ngu Yesu Madu hpe san ma ai. Shanhte dai zawn san ai ga hta, ya ya ra marin taw ai shanhte a mungkan lam, hkumhkrang lam hta ra kadawn ai hpe hkam la lu hkra Karai Kasang hpe gara hku shapyaw ra na, gara hku aput ra na, gara hku myit dik shangun ra na ngu ai masa rai nga ai, ngu Wa Sarabyin sang lang da nga ai.

  Karai Kasang a magam hpe hkan shatup ai gaw Kawa Karai Kasang shangun dat ai Kasha shingtai hpe hkap la na matu rai nga ai; dai gaw shi hkum nan hpe rai nga ai. Tsun mayu ai ginchyum dat ga kaba gaw Yesu Madu hpe anhte a prat hta hkap la ai rai yang, Shi hte rau tsawra myit hta gyi hkang da let sak hkrung nga lu na, ngu ai rai nga ai.

  Yesu Madu chyu sha anhte a makam hpe jasan jaseng ya lu ai, shangang shakang ya lu ai, shi hta tsawra matut mahkai hku hkau shangun lu ai rai nga ai. Anhte hpa lam hpe mung garai n galaw shi yang shawng galaw ra na gaw Yesu Madu hpe tsaw ra na lam rai nga ai.

  Anhte shinggyim prat hkrun lam hta mung, shinggyim hku hkau masa lam hta mung dai hte maren rai nga ai. Hpu nau ni hpe anhte a myit ra ai hta hkan nna sha n mai kanawn mazum ga ai. Shinggyim wuhpawng a matu, yawng a akyu ara matu myit ra ga ai. Yawng myit ra, myit sharawng ai hpe madung da ra ga ai.

  Hpang jahtum mungga hta “Yesu Madu hpe anhte sak prat lusha hku hkam hkap la ga. Anhte maga hku Shi hpe hku hkau hpang la ga. Shada da tsaw ra hku hkau lam hpe sharin hkam la ga. Kanu Nu Maria a kasi ningli hpe yu nna sharin hkam la ga. Shi gaw Karai Kasang hte tsaw ra matut mahkai ai hta kasi kaja dik madun ai wa rai nga ai. Dai chyeju hpe hkam la lu na matu shi anhte hpe garum ya lu ai,” ngu shadum n-gun jaw da nga ai hpe Vatican Shiga Dap kaw nna ndau da ma ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice