Wa Sarabyin: Yesu Hpe Madat Ga, Shaloi Ra Mara Lu La Na

image from Vatican website

July 17, laban shani, San Peter Shawa Pa hta, “Madu A Lamu Kasa Akyu Hpyi Ga” tsun ten, Wa Sarabyin Francis, nawku daw jau hkrang a lam sumru woi da let dai hpe jai lang ai  nna Madu Yesu a mungga ni hpe madat la chye ra ga ai; dai zawn galaw ai hpe anhte a matu ahkyak dik lam langai re ngu myit la hkan shatup ga ai rai yang, kaga anhte ra kadawn ai lam ni yawng hkam la lu na lam madun ya na ra ai, ngu tsun dan da nga ai.

Dai shani hti ang ai, Chyum Laika hta na, Martha hte Maria yan nau Madu Yesu hpe hkap hkalum daw jau ai lam hpe sumru woi let Wa Sarabyin sharin shaga da ai rai nga ai.

Martha gaw lusha hte daw jau ai; Maria gaw Madu Yesu a makau kaw dung nna Shi a ga madat let nga nga ai.

Martha gaw shi hpe garum na matu Maria hpe tsun ya na matu Yesu hpe tsun ai. Anhte mung Martha tsun ai jaw ang ai ngu hkam sha na ga ai n rai ni?

Raitim Yesu Madu a mahtai gaw “Martha, Martha, nang gaw amu law law a majaw, myit ru nna tsang nga ndai. Rai ti mung, ra grau ai lam gaw langai sha rai ng aai, Mari gaw jaw ai lam lata la nu ai rai nna, Dai hpe shi kaw na shaw la kau ya lu na n rai,” (Lk 10:41-42) ngu ai rai nga ai.

Yesu Madu gaw Martha a shawang myit hte daw jau ai magam hpe masat masa galaw hkap la ya ai raitim, Mari galaw ai gaw kaja grau ai lam rai nna, dai hpe shi kaw na saw la kau ya n lu ai, n mai ai, ngu Madu tsun shadum sharin shaga ai rai nga ai.

Kaja grau ai hpe galaw nga ai wa hpe dai hta grit ai hpe kadai galaw shangun na rai ta? Kaja grau ai hpe matut galaw shangun na sha rai na ga ai n rai ni?

Martha sawn sumru ai hpe maram yang bungli gaw madung re, hkring sa pyaw na gaw hpang de she re ai. Manam daw jau ai ngu ai hta lu na sha na daw jau ai hpe sha tsun ai n rai nga ai, grau nna gaw manam wa hta ra kadawn nga ai hpe jahpring ya ai hkrum ai ngu hkam sha shangun ai gaw kaja dik hkap hkalum daw jau ai lam rai nga ai.

Madu Yesu gaw dai lam hpe hkrak chye na hkawn hkrang da ai wa rai nga ai. Martha atsam dat galaw daw jau ai hpe mung manu shadan ya ai. Raitim ra ahkyak grau ai daw jau lam ningnan Martha hpe shachyan ya ai. Dai gaw Karai Kasang hpe madat ai lam rai nga ai.

Madu Yesu a ga gaw nsam n rawng ai nbung ga n re ai; anhte a myit masin hpe hkra nna hkam sha shangun nna prat galai shai ya shangun lu ai ga rai nga ai; n kaja ai lam ni kaw na koi yan shangun lu ai; myit dik lam jaw ya ai; kabu pyaw lam jaw ya ai; kaja ai hta na grau kaja ai lam de woi sa ya ai. 

Mari gaw kaga lam ni yawng hpe rap tawn da nna Yesu hpe madat ai. Shi tawn da ai lam ni yawng gaw, Yesu hpe madat ai a marang e, she kaw bai du na ra ai.

Anhte a aten ni hpe akyu jashawn jai lang chye ra ga ai. Mungkan lam ni hpe tawn da nna, Yesu hpe madat na aten jaw ra ga ai.

Yesu hpe madat ai aten ni hta, akyu hpyi ai aten ni hta, bungli bungsi ni hte seng ai lam ni hpe rap tawn da ga ai kun, anhte tinang hkum bai san jep la ga, ngu saw shaga let, anhte kaw na la kau ya n lu ai Kaja grau ai lam hpe lata la chye na matu Kanu Nu Maria sharin ya nga u ga, Wa Sarabyin Francis hpang jahtum hta akyu hpyi htinglu htinglai da ya nga ai.

 

Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-07/pope-francis-angelus-martha-maria-hospitality-duty.html

 

Add new comment

20 + 0 =