Wa Sarabyin Yawhan Pawlu II, October Shata Hta, Labau Ningnan Hpe Gaw De Shatsawm Da Lai Wa Sai

Wa Sarabyin Yawhan Pawlu II hpe Sarabyin lata ai nhtoi gaw shi a shangai nhtoi hta ang ai rai nna, Mungkan ting hta, Nawku Hpung kata, Wa Sarabyin hte seng ai poi lahkawng hpe gumprawn nna galaw ai labau shang nhtoi gaw 1978 October 16 ya shana daw maga aten nan rai nga ai.

Dai nhtoi hta “the Vatican Publishing House hte the Osservatore Roamno” a matut mung labau shang tai nga ai.

Lai wa sai 42 ning aten, 1978, October 16 ya gaw bat langai shani ang ai rai nga ai. Nsin mung sing wa sai aten, hkying 6:18 p.m., Sistine Chapel na wanhkut shadaw dumlawng kaw nna, wanhkawn achyang 7 lang shamawng ngut ai hpang, 8 lang ngu na hta wanhkut ahpraw mawng pru wa ai.

Dai hpang kade nna ai aten 6:45 p.m., hta Cardinal proto-deacon Pericles Felici kaw nna Cardinal Karol Wojtyla hpe Yawhan Pawlu II a mying hte, 264 ngu na Kahtawlik Nawku Hpung a Wa Sarabyin hte Roma a Saradaw, San Peter a tingyang hpe hkap la ai wa hpe ndau dat ya sai.

Shawng daw hta shi hpe Polan mungdan a kamhpa shara, San Stanilaus I a mying hkam la na matu bawng ban ma ai rai tim, Roma htung masa lam hte hkrak n htuk shi ai majaw Cardinal Wojtyla hkum nan Yawhan Pawlu II a mying hpe lata la ai rai nga ai. Dai zawn lata la ai yaw shada lam gaw shi Sarabyin tai ai hpang 33 ya hta n nga mat ai Albina Luciani hpe myit dum ai masat dingsat hku lata la ai re lam tsun da ma ai.

Lai wa sai 42 ning hta na mabyin hpe bai shingran shangun ai sumla dem sara L’Osservatore Romano hpe mung chyeju dum ai lam Nawku Hpung a malai tsun da ma ai (you can request the photos here).

Sarabyin lata la hkrum ai hpang kade nna yang, hkying 7:00 p.m, n htu shi yang, San Peter Nawku Htingnu pa hta lat nga ai hpawng kaba hpe shakram let shaman ai lam galaw ya ai. Shi a shawng na “Wa Sarabyin Pawlu I” nnga mat ai majaw myit yawn nga ai hpung masha yawng hpe shalan shabran mungga shaga la ya ai.

Sarabyin aya hpe hkam la na matu n grin dan ai ngu hkam sha ai, bai, hkrit tsang ai lam nga ai lam; raitim Madu Yesu hpe madat mara ai hte Shi a Kanu Chyoi Pra san seng dik ai Nu Maria hpe kamhpa myit kaba tawn da ai majaw sha Sarabyin aya hpe hkam la ai ngu mung matut tsun dan da ai.

"I do not know if I can well explain myself in your... Italian language. Correct me if I make mistakes. And so I present myself to all of you, to confess our common faith, our hope, our trust in the Mother of Christ and the Church, and also to begin again on this road of history and the Church, with the help of God and with the help of men." 

“Italian myusha ga hte nanhte hpe atsawm sha tsun dan lu na kun gaw n chye ai. Shut shai ai lam nga yang sharai la ya marit. Anhte yawng a bung pre ai makam masham, myit mada shara, hte Hkristu hte Nawku Hpung a Kanu “Nu Maria” hta kamhpa ai let, Karai Kasang a garum shingtau ya ai a marang e, shinggyim masha shada garum shingtau hkat let Nawku Hpung a labau hpe matut gaw de sa wa ga”

Dai shani hta mungkan shara shagu hta shi a shangai nhtoi poi hte Sarabyin nnan lata la lu ai poi lamang hpe hkyen lajang galaw ya nga ai majaw chyeju dum ai lam mung mungkan ting hpe tsun ndau da ai.

Shi hte hkrum shaga lamang (interview) galaw ai ni a ningmu hte maren Wa Sarabyin Yawhan Pawlu II gaw Mungkan ting na Hkristan masha ni hte Hkristan n re ai ni yawng hte matut mahkai galung kahkying ai hta tatut magam hta shakut ai Sarabyin re ai lam tsun da ma ai.

Polish mungdan kaw na Sarabyin tai wa ai Cardinal Wyszynski gaw “the third Millennium” “shaning hkying masum prat” hpe shachyan ya ai Wa Sarabyin rai nga ai.

Translated by Fr. Patrick Gawmaw Hkawng Yae

#vaticannews

#rvakachinservice

 (Translated from the Italian original)

https://www.vaticannews.va/en/pope/news/2020-10/pope-john-paul-ii-saint-election-1978-16-october-poland.html

16 October 2020, 09:50