Wa Sarabyin: Byin Nga Ai Masha Hta Hkan Nna Shada Hkrum Shaga Ai Masa Lam Hku Matut MaHkai Hkat Ra Ai.

(55) lang na Mungkan Shinggyim Matut Mahkai Masat Nhtoi hta Wa Sarabyin Francis gaw Madu Yesu a saw shaga da ai ga “Sa nna, mu la nna chye la mu” ngu ai mahkrun lam hte Hkristan makam hpe shachyan ya ga ngu tsun da ai.

“Sa nna, mu la nna chye la mu,” ngu saw shaga ai gaw shinggyim masha shada teng man jaw ang ai hku matut mahkai hkat ai lam rai nga ai, nga nna Wa Sarabyin Francis, January 23, bat kru (6) ya shani, (55) lang na Mungkan Shinggyim matut mahkai masat nhtoi hta shang lang da ai.

“Daining gaw Madu Yesu saw shaga da ai ga “Sa nna, mu la nna chye la mu” ngu ai ga hte mungkan masha yawng shinggyim matut mahkai ai masa lam hta jai lang nna shada daw jau hkak ga ngu mung Wa Sarabyin Francis saw shaga da ai.

Madu Yesu a saw shaga ga ndai gaw shawng na sape ni hte hkrum shaga ten shi a hpang hkan na matu saw shaga ai ga rai nga ai. Dai gaw shi hte rau hku hkau wa nna, shi kaw na sharin la let shi a sape ni tai, manang tai wa nna shi a magam gun hpai chyeju hkam la na matu rai nga ai. Hpang daw hta shi hte hkrum nna sape tai wa ai San Philip gaw Yesu Madu shi hpe tsun ai ga “Sa yu nna mu la chye la mu” ngu ai ga tsun ai wa gaw “Messiah re ai lam Nathaniel hpe tsun dan ai.

Ndai masa lam gaw Hkristan Makam hpe hpang wa ai lam rai nga ai. Bai Hkristan ni a matut mahkai hkrang masa lam rai nga ai. Masha langai a matu lama ma hpe yu la mu la sumru la ai shaloi de a teng man jaw ang ai lam hpe chye na la na matu kaja dik ai lam mung rai nga ai. Kadai raitim, “Ngai shaga nga ai a makau kaw madat hkam la taw ai wa ngai sakse hkam ai lam hpe chye na hkawn hkrang nna hkam la lu nna kaga masha ni hpe sakse hkam sa wa lu ai rai u ga matu” tsun shaga ra ai.

Shiga shapoi shachyam shabra ai lam hta shayawm kau dawm kau ai hpe n ra sharawng ai lam Wa Sarabyin Francis hpe tsun da ai. Anhte gaw lam ntsa ni hta shiga ni hpe ndau shachyam shabra lam hpe grau pyi n-gun dat shakut ra ga ai. Dai zawn galaw shakut ai gaw n-gun grai kaba ai lam re.

Shiga ndau shachyam shabra ai gaw shiga ni aten shagu na masa lam yawng chye ra wa shangun ai lam rai nga ai.

Shiga ndau shabra ai ni a nden marai hpe Wa Sarabyin Francis shakawn da ai. Shiga ndau ai ni gaw kadai n sa gwi ai shara ni hta sa gwi ai; kadai n mu lu ai lam ni hpe mu lu hkra shakut nna yawng mu lu chye la hkra shakut ma ai. Shinggyim masha ni hta na n tara ai lam ni hpe tara lam de hkawm sa lu hkra ndau ya ma ai. Matsan mayan rai yak hkak jam jau hkrum nga ai ni hpe garum shingtau gaw sharawt ya lu na matu shiga ni hpe jaw ya ma ai. Majan byin ai lam ni hpe ndau ya ma ai a majaw majan n byin hkra ladat tam na matu lam hpaw ya ai.

Shiga ndau ai lam ni nnga yang shinggyim wuhpung wuhpawng a matu hte democracy a matu hkrat sum kaba byin shangun ai tai ai. Dai zawn rai jang gaw anhte shinggyim kun dinghku ting hpe matsan jam jau shangun ai lam byin shangun ai.

Daini na prat hta byin nga ai masa lam ni yawng hpe “sa nna yu la mu la chye la mu” ngu shinggyim masha hkum shagu hpe saw shaga hkrum saga ai. Anhte ni hta na masha law malawng gaw mungkan hta sut su nga mai ai shara ni hte masha ni hpe sha sa yu la chye ma ai. Ndai masa lam gaw anhte ni lu la ai shiga hte mabyin lahkawng lapran hpai shai ai lam kaba byin shangun nga ai.

Wa Sarabyin Francis gaw Internet a akyu ara hte dingbai dingna hpe anhte ni dum chye da ra ai lam hpe mung shadum da ai.

Social Media lam law law hpe hpaw ya ai Internet gaw shiga htinglet ai hta, shada matut mahkai garan gachyan ai lam ni hta, mungkan masha ni a matu shatsaw sharawt ya ai. Ndai gaw shinggyim masha ni a mabyin masa lam ni hpe garan gachyan ya lu ai hte mu la na la ai lam ni hpe myi chyaw mu la na la ai hku sakse hkam lu shangun ai.

Maga mi hta n jaw n ang ai shiga ni hpe mung ndai social media lam ni hku nna masha law law hpe mu la na la shut shangun ma ai. Ndai zawn re ai lam ni hpe n galaw na matu Wa Sarabyin Francis sadi jaw da ai.

Anhte shinggyim masha ni jai lang ai Internet gaw grai nan n gun kaba ai majaw dai hpe anhte ni a matu jai lang ra ai. Shiga gin shalat shapraw shapoi ai ni hte shiga madat hkam la ai ni lahkawng maga na masha ni a matu grai nan ahkyak ai.

N-jaw n-teng ai shiga shadam shapoi ai lam ni hpe anhte ni sawk sagawn shapraw nna hting hkang shamat kau na lit anhte hta nga ga ai. Anhte yawng gaw teng man shiga sakse ni tai ra ai; dai hta hkawm sa ra ai; teng man shiga hpe mu ra ai, garan gachyan ra ai.

Anhte hkum nan mu lu na matu anhte a myi hpe hpa hte mung malai bang la n lu ai.

Shinggyim matut mahkai lam hta lama ma hpe tinang hkum nan mu lu na matu anhte a myi hpe hpa hte mung malai bang la lu na n re ai. “Mahkrum madup hte sha sharin la lu ai.”

“Mungga gaw masha tai wa sai,” ngu ai gaw n mu mada lu ai Karai Kasang hpe mu mada lu shangun ai; shi a nsen hpe na lu shangun ai; shi hpe ahtawk hkra lu ai ngu ai hpe chye na hkam sha shangun nga ai.

Anhte ni masha kaga ni hte matut mahkai tsun shaga ai mahkrum madup hte tsun shaga hkat ai lam ni yawng gaw shinggyim matut mahkai ai lam hte seng ai rai nga ai.

Madu Yesu hte hkrum lu ai mahkrum madup hte San Pawlu a mungga hpe na la lu sai ni a hkrum shaga ai lam ni hpe sakse hkam ai lam yawng gaw Kabu Gara Shiga hpe ndau shachyam shabra ai lam rai nga ai. Dai rai nna Kabu Gara Shiga gaw ndai prat hta anhte ni a lapran sak hkrung nga ai rai nna, anhte ni sakse hkam ai a marang e Madu Yesu hte hkrum shaga shangun ai tai nga ai.

Daini anhte dum ra ai gaw “masha ni nga ai shara hta shanhte ni rai nga ai hte maren matut mahkai hkrum shaga ra ga ai,” ngu Wa Sarabyin Francis (55) lang na Mungkan Shinggyim Matut Mahkai Masat Nhtoi a matu mungga shaga da ai lam Vatican Shiga Dap kaw nna ndau da ma ai.

Wa Sarabyin Francis ndai akyu hpyi ga hte mungga hpe shangut da ai.

Madu e, anhte chye na ai hta grau ai lam hpe sharing ya nna teng man ai hta hkawm sa lu shangun rit.

Pru sa nna yu la mu la chye la hkra sharing ya rit.

Madat hkam la chye hkra sharin ya rit.

Nju ndawng myit masin hpe la kau ya rit.

Kadai nsa gwi ai shara de sa gwi sa lu na lam woi ya rit.

Chye na hkawn hkrang lu hkra aten hpe jaw ya rit.

Ra kadawn ai ni hpe myit maju jung ai hte madat ya lu na garum ya lu na sharin ya rit.

Hpring zup hkum zup sai ngu myit la hkam la ai hku n re ai sha teng man ai lam hpe grau grau shadan shalen lu na matu lam woi ya rit.

Nang Madu ndai mungkan shara shagu anhte hte rau nga nga ai hpe dum chye lu ai chyeju jaw ya let anhte sa nna mu la chye na lu ai lam yawng hpunau ni a matu tsun dan hkai dan lu na chyeju jaw ya rit.

Anhte a Madu Hkristu a marang e hpyi nem ga ai. Amen.

Source : Vatican News