Wa Sarabyin: Ukraine Mungdan Simsa Lam Hte Shinggyim Hkye Mawoi Magam Galaw Na Matu Hpyi Shawn

Wa Sarabyin: Ukraine Mungdan Simsa Lam Hte Shinggyim Hkye Mawoi Magam Galaw Na Matu Hpyi Shawn

March 6, laban shani, “Madu a Lamu Kasa Akyu Hpyi Ga” tsun ten, San Peter shawa pa hta, buhkawm akyu hpyi masha 25,000 hpe, Wa Sarabyin Francis, ya ten majan byin nga ai Ukraine mungdan simsa lam lu na matu, myit masin kraw lawang kaw nna nan, shang lawm na hte shinggyim hkye mawoi lam hpaw ya na matu hpyi shawn da nga ai.

“Tsawra ai hpu nau ni e,

Wan langai a lahta de re ai Ukraine mung masha ni makau grupyin mungdan ni hta hprawng yen hkawm ma ai.

Ukraine mungdan hta sai myipri hka lwi yawng nga sai; Ndai gaw hpyen dap a majaw sha n rai sai; majan a majaw rai nga ai; dai majan gaw si hkrung si htan lam hpe shabyin ai, hten run lam hpe shabyin ai, matsan mayan rai myit yawn hpa kaba rai nga ai. Tsin-yam hkrum masha gaw law hta law jat magang rai nga ai. Mung shawa masha ni hprawng yen hkawm ra ma ai; grau nna ma kanu ni hte ma kaji hprawng yen hkawm nga ra ma ai.

Shinggyim hkye mawoi bungli galaw na matu mung yak hta yak rai wa ai. Shinggyim hkye mawoi bungli hpe shim lam nga ai hku amahkam nga ai hte galaw sa wa lu na ra ahkyak nga sai. Anhte a hpu nau ni bawm tsin-yam lapran hkrit tsang nga ma ai. Shanhte hpe hkye mawoi la na matu masin salum kaw nna nan hpyi shawn mayu nngai.

Shinglum ai shara hta du lu hkra lam hpaw shakut nga ai ni hpe chye ju dum nngai; laknak hte gasat nga ai lam shagu hpe ya ya jang jahkring na matu seng ang ai ni hpe hpyi shawn mayu nngai; mungdan shagu, mungdan kata na tara lam ni hpe manu shadan let shinggyim hkye mawoi lam hpe galaw na matu mung hpyi shawn nngai.

Shanhte a asak hpe n lahpawt ai sha shi la shi shalai ya nga ai shiga la shiga shapoi ya ai ni hte shiga dap ni hpe mung chyeju dum nngai; Ndai zawn ap nawng shakut ai gaw n hkru ai majan hpe shazim na matu yaw shada ai rai nna, dai masa hta galaw shakut nga ai ni hpe chyeju dum ai rai nngai.

Ukraine mungdan a matu myit mang langai hte rau sha akyu hpyi ya nga ga! Anhte a shawng kaw tinang mungdan hte seng ai, tinang a makam hte seng ai masat dawnghkawn nga ai. Anhte a hkawhkam jan, Ukraine mungdan a hkawhkam jan rai nga ai Kanu Nu Maria kaw, kahpu kanau, nau na myit masin hte rau akyu hpyi ga!

Sarabyin rung kaw nna gaw simsa lam a matu rai yang hpa lam raitim galaw na jing jing rai nga ga ai. Ndai nhtoi ni hta, Cardinal lahkawng Ukraine de sa nna mung shawa masha ni hpe daw jau nga sai. Shan gaw Cardinal Krajewski, the Almoner hte Cardinal Czerny rai ma ai.

Cardinal Krajewski gaw ra kadawn ai ni hpe garum shingtau ya na matu du sa ai rai nna, Cardinal Czerny gaw interim Prefect of the Discastery for Promoting Integral Human Development a dat kasa rai nga ai. Ndai lahkawng gaw Sarabyin a malai hku sa ai sha n rai ma ai. Hkristan masha ni yawng a malai sa ai rai ma ai. Ukraine mungdan hta jamjau nga ai ni yawng hte ni htep ai hku garum ya na matu rai nga ai.

Majan shabyin ai gaw shinggyim myit n rawng ai mana bungli re! Gumshen hkrum ai lam ni hpe mada yu nna dai majan hpe ya ya jahkring kau da ga,” ngu laika ga hte hpyi shawn da nga ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-03/pope-appeals-for-peace-in-ukraine-and-open-humanitarian-corridor.html