Wa Sarabyin: Tsawra Ai Ngu Gaw Hpu Nau Ni Hpe Daw Jau Ai Lam Rai Nga Ai, Shanhte Hpe Hting Hkang Ai Lam N Re Ai

May 9, Paska Ladaw hta kru (6) ngu na laban shani na “Regina Coeli” akyu hpyi ngut ten, dai shani na Kabu Gara Shiga hpe sumru let “tsawra ai ngu ai gaw hpu nau ni hpe daw jau ai lam rai nga ai, shanhte hpe hting hkang ai lam n re ai” ngu Wa Sarabyin Francis mungga htawn da ai lam Vatican Shiga Dap Kaw nna ndau da ma ai.

Yawhan 15: 9-17 hta na Madu Yesu a Mungga hpe lakap nna “Hkristan masha ni Madu Yesu a Tsawra ai hta machyu jung nga ai rai yang apu asi law law si lu na re”.

Yesu Madu a saw shaga ai hte maren Shi a tsawra ai hta manoi nga ga ai rai yang, Shi a ngwi pyaw simsa lam gaw anhte hta anga nga na rai nna anhte a kabu pyaw lam mung hpring tup wa na ra ai.

Kawa Karai Kasang a Tsawra Myit Hpe Chye Chyap Ai Lam

Tsawra Kawa Karai Kasang gaw tsawra ai lam a ningpawt ninghpang rai nga ai; dai tsawra myit gaw Shi a Kasha shingtai Yesu Madu a marang e anhte hta mali hkanu zawn lwi yu wa ai.

Yesu Madu jaw ya ai tsawra myit gaw Karai Kasang Shi hpe tsawra ai tsawra myit sha rai nga ai: san seng chyoi pra ai, shadawn shadang n nga ai, masat shadang mung n nga ai, shang lawt ai myit hte jaw ai tsawra myit rai nga ai.

Dai tsawra myit anhte hpe jaw ya ai majaw, Yesu madu anhte hpe manaw manang zawn hku hkau ai; kahpu kanau zawn hku hkau ai; Kawa Karai Kasang hpe hkau chyap shangun ai; Shi hkum nan mung anhte hpe ndai mungkan prat na Shi a sasana magam hta shang lawm shangun ai.

Anhte ni Yesu Madu a hkang da tara ni hpe hkan shatup ai a marang e Shi a tsawra myit hta manoi nga ga ai.

Nanhte Shada Tsaw Ra Nga Mu!

“Ngai nanhte hpe tsaw ra made ai zawn, nanhte shada da tsaw ra nga mu” ngu Madu Yesu ga matsun da ai. Hkristu Madu zawn tsaw ra ai ngu ai gaw Yesu Madu kasa ni a lagaw ni hpe kashin ya ai zawn anhte tinang hkum nan a matu hta lai nna hpu nau ni hpe tsaw ra ai rai nga ai; Ra kadawn grau ai ni a matu lam hpaw daw jau garum ya ai gaw Hkrist Madu zawn tsaw ra chye ai rai nga ai. Tsaw ra ai ngu ai gaw ga sha tsun ai n rai nga ai, ta tut magam bungli hte tsaw ra ai she rai nga ai.

Daw jau ai gaw dawsa ai lam hte gumshen ai lam n re ai, hting hkang ai lam mung n re ai

Hkristu Madu zawn tsaw ra lu na matu mungkan e jaw ai tsaw ra ai lam n re ai; ja gumhpraw, awng dang lam ni, hte arawng power ni hpe tsaw ra ai lam ni mahkra hpe tawn kau da ra ai.

Ndai mungkan hte seng ai tsaw ra ai gaw Karai Kasang a tsaw ra ai hte tsan gang shangun ai; tingkyen myit kaba jat shangun ai; nanghpam tsi mawan ni hpe tsaw ra ai myit kaba shangun ai; gawng ba myit ni law wa shangun ai. Gawng ba ai myit gaw tsawra myit ni hpe jasum kau shangun ai; hpu nau ni hpe n jaw n ang ai hku shut shai ai, roi sha ai lam byin shangun ai; anhte tsaw ra ai ni hpe hkra machyi kaba byin shangun ai.

N tsawm n htap ai dai tsawra myit ni gaw gumshen ai lam hpe shabyin shangun ai; dai zawn byin shangun ai tsawra myit gaw tsawra myit majing n re ai. Myu shayi law law dai zawn re n tsawm n htap ai tsawra myit ni a majaw hkra machyi hkrum nga ma ai.

Karai Kasang tsaw ra ai zawn tsaw ra ai ngu gaw makau grupyin masha ni hpe myit dik myit pyaw lam jaw ya ai; shanhte a shawng lawt ai hpe hkungga ya ai; shanhte rai nga ai hte maren shanhte hpe manu shadan tsaw ra chye ai rai nga ai.

Tsawra myit majing gaw hpu nau ni hpe hting hkang na yaw shada ai madang hpe tawt lai lu ai rai nna, tinang hkum hpe hpu nau ni a matu ap nawng daw jau lu ai.

Kabu pyaw lam hpe sakse hkam ra ai

Hpang jahtum mungga hta Hkristan masha ni Yesu Madu a tsawra myit hta manoi nga ai rai yang anhte a kabu pyaw lam hpring tup wa na ra ai ngu shadum sharing shaga let dai lam hta hkawm sa na matu Hkristan masha ni hpe saw shaga da ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-05/pope-francis-regina-coeli-abide-in-love-service.html