Wa Sarabyin: Tsawra Ai Hta Gawng Kya Ai Majaw Hkra Machyi Chye Ai Salum Ana Hpe Madu Yesu Shamai Ya Nga

June 27, Pranwan Ladaw hta 13 ngu na laban shani, San Peter pa hta, “Madu A Lamu Kasa Akyu Hpyi” ten, Wa Sarabyin Francis, Madu Yesu gaw anhte a myit kraw kata lai sai ten na shut shai ai lam ni a majaw manoi nga ai n ra sharawng ai lam ni hte shut hpyi mara ni a majaw hkra machyi taw ai anhte a salum ana ni hpe shamai shatsai ya ai ngu, n-gun jaw da nga ai.

Kabu Gara Shiga hpe dai shani hti ang ai Chyum daw hpe Mk 5:21-42 kaw na, shaning sumshi (30) ning machyi taw ai hpawmi myu shayi hte Jairus kasha hpe sharawt la ai lam hpe lakap nna hkaw tsun ai. Ndai mabyin hta si hkrung si htan lam hte ana zingli lam lahkawng lawm nga ai.

“Madu Yesu gaw anhte a nni nkri, nchyi nmu, jamjau jamhkau, aru ara byin ai lam ni, bai, si hkrung si htan lam hpe Shi hta hkra shangun ai. Shi hpe hkra ai a marang e dai nni nkri, nchyi nmu, jamjau jamhkau, aru ara byin ai lam ni shamai ya nna si hkrung si htan lam gaw jahtum ngu ai lachyum n rai nga ai hpe madun dan ya ai.

Hkamja lam hte myit hta matsan dum tsawra lam ni

Chyam bra ana tsin-yam hta nga dingyang re ai majaw anhte a myit hta machyi makaw ai lam gaw naw nga dingyang rai nga ai. Sai htaw ana hpe 12 ning tup hkam sha taw ai num sha langai hpe Madu Yesu shamai shatsai ya ai lam hpe, Wa Sarabyin Francis sumru woi da ai.

Shi hpe hkamja lam bai jaw ya ai hta grau ai matsan dum tsawra ai hpe dai num sha hkam la lu ai rai nga ai. Dai num sha ga sai htaw ai majaw shi hta rawng gring ai sai ni hpe jahkaw jasum kau ai hte dai aten na masha ni a ningmu myit masa hta shi gaw n san n seng ai wa rai nga ai.

Ndai zawn re ai masa hta nga ai majaw shi gaw masha ni ahkyak n la kau da ai hkrum ai wa, ningrum ningtau hte kun dinghku masha n lu ai wa rai nga ai. Salum ana mung lu, shingtai mung hkam sha rai nna nga ra ai prat hta rai nga ai.

Prat hta hkra machyi dik htum ai gaw tsawra myit hpe n lu la ai majaw machyi hkam sha ai lam rai nga ai; tsawra myit hpe galoi mung n lu la ai majaw rai nga ai.

Ndai sai htaw ai num sha gaw mying n dan hkrung ai wa; kadai mung shi a mying hpe myit n law ai; shi a mying hpe n chye ma ai; n tsun dan ai hpe mu lu ai.

Shi a ana mai tsai wa na matu gumhpraw law law ma hkam nna tsi tsi lajang ai lam ni hpe shi galaw lai wa ai raitim, myit mada shara n nga grau grau sawng grau wa ai.

Anhte mung tsawra myit n lawm ai, akyu n pru tsi lajang ai lam ni hte, akyu n pru awngdang lam ni hte mungkan sutgan tam ai lam ni hta tinang a hkum hpe aten shama chye nga ga ai, ngu Wa Sarabyin Francis myit n pyaw ai hte madai let tsun da nga ai.

Dai num sha gaw hpang jahtum hta hkum hkrang wenyi hpe shamai ya lu ai Yesu Madu hpe mu tam la nna shi hpe lata la nu ai.

Karai Kasang gaw anhte hpe Shi hte matut mahkai nga na hpe ala nga ai; anhte a masin salum ni hpe shi hpe hpaw dan na matu la nga ai; dai num sha zawn anhte mung shi a palawng hpe hkra la nna shamai hkam la na hpe Madu myit ra nga ai; hpa majaw nga yang Yesu Madu hte ni htep magang Shi a matsan dum lama ai tsawra ai hte shamai shatsai ya ai hpe hkam la lu magang rai nga ai.

Yesu Madu a shamai shatsai ya ai myi hpe tam nga ga!

Dai num sha hkra ai hpe dum ai hte Madu Yesu nhtang yu dat ai shaloi, masha hpawng lapran Shi a shamai shatai ya ai hpe tam nga ai num sha langai hpe mu ai; dai num sha Madu Yesu hpe shi a myi hte yu yang she yu na re; raitim kamsham myit hte Madu Yesu a shamai shatsai ya lu ai myi hpe shingran kaw nna mada yu nga ai. Dai num sha masin salum hta kamsham myit ni hpring tup rai nga ai.

Madu Yesu gaw anhte a lai sai ten na shut shai ai lam ni a majaw myit kraw kata manoi nga ai n ra sharawng ai lam ni hte shut hpyi mara ni hta n jahkring da ai; dai shut hpyi mara a majaw hkra machyi kaba hkrum nga ai salum ana hpe shamai ya ai.

Yesu Madu gaw dai num sha a makam hpe shakawn let “Ngai sha e” ngu shaga ai.

Tsara myit langai chyu sha prat hpe shamai shatsai ya lu ai. Dai majaw “Tsawra rai nga ai Madu Yesu anhte a masin salum hpe yu ya nna shamai ya shangun ga.

Anhte ni Madu Yesu a matsan dum tsawra myit hte azi yu ai hpe hkam sha yu ai mahkrum madup nga ai ni anhte mung, anhte a makau grupyin hta tsawra lam n lu la ai majaw salum machyi ana hkam sha nga ai ni hpe dai Madu Yesu a tsawra matsan dum lama ai hpe garan gachyan ya nga ga.

Madu Yesu a azi yu ai myi gaw anhte hpe jeyang dawdan na matu n rai nga ai; anhte hpe hkap hkalum nga ai myi rai nga ai; Shi a tsawra myit hte sha anhte a prat hpe shamai ya, jasan jaseng ya lu ai, ngu Wa Sarabyin Francis, laban shani na “Madu A Lamu Kasa Akyu Hpyi Ga” tsun ai ten mungga hpe hkaw tsun da nga ai.

Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

27 June 2021, 12:11

https://www.vaticannews.va/en/pope/news/2021-06/pope-francis-angelus-catechesis-suffering-death-healing.html