Wa Sarabyin: Teng Man Ai Hkristan Masha Gaw Shani Shagu Hkrum Ang Ai Agung Alau Lapran Mai Kaja Ai Hpe Lata La Chye Ai

27 9 2020 Angelus Akyu Hpyi Nga ai Wa Sarabyin

September 27, laban shani na “Madu A Lamu Kasa Akyu Hpyi” ngut ten, Wa Sarabyin Francis gaw kam sham ai hpung masha ni yawng hpe Vatican, San Peter Pa kaw na shadum Mungga htawn ya ai.

“ Hkristan prat ngu ai gaw tsawm htap ai yup mang shingran hte sha n ngut shi ai. Ta tut magam ngu ai naw ra ai.Lata tut magam ngu ai hta Karai Kasang myit ra ai hte maren nau na ni hpe tsaw ra ai lam rai nga ai.”

Dai shani hti ang ai Mahte 21: 28-32 hta Madu Yesu a “shadang sha lahkawng” ga shadawn hpe lakap nna shi a mungga hpe hkaw tsun ai. Kasha kaba wa gaw Kawa shangun ai hpe n hkap la ai rai tim, mai kaja lam re hpe myit la lu ai majaw tsabyi sun de bungli sa galaw ai. Kasha kanau wa chyawm gaw kawa shangun ai hpe “mai sa” ngu hkap la ai rai tim, ta tut hta tsabyi sun de bungli n sa galaw ai.

Madat mara ai ngu ai gaw “Mai Sa” ngu ai ga hte n ngut ai. Ta tut magam nan lawm ra ai. Ndai ga shadawn gaw makam masham hpung a sharin shaga ai tara lam ni hpe hkan let ta tut magam hta kaja wa ra kadawn nga ai ni hpe garum shingtau ai lam galaw shakut ai lailen kaja hpe hkan shatup na matu shadum ya ai.

Hking jawng ni hte salang ni a sat lawat hpe Madu Yesu n ra sharawng ai rai nga ai. Shanhte gaw makam masham lam hta hkawm sa ma ai raitim, ra kadawn ai ni hpe garum shingtau ai lam hta ningra nga ma ai.

Madu Yesu ra sharawng ai ni gaw, Kang hta ai ni hte mara lu ai shawa num ni rai ma ai. Hpa majaw ta? Shanhte gaw mat mat ai sagu ni zawn rai ma ai hte, kaja wa nan mung myit malai lu ai ni rai ma ai majaw rai nga ai.

Madu Yesu gaw yawng a matu myit malai lu nna shi hpang de gayin wa na hpe chyeju chyinghka hpaw da ya sai re. Mara lu dum ai ni gaw Yesu Madu a mungga hpe na la ai hte myit malai lu gayin wa ma ai.

Anhte hpe myit malai lu nna Karai kasang hpang de gayin wa na matu tsun ai shaloi, shi hkum nan myit galu kaba ai hte tsun ai rai nga ai. Anhte ni galai shai wa na matu mung myit galu kaba hte ala taw nga ai. Anhte hpe la nga ai majaw pu ba ai lam nnga ai. Anhte ni myit malai lu n kam ai ngu ai hpe shi n ra sharawng ai. Anhte ni mara galaw nna shi hte hka mat lu ai ahkaw ahkang mung jaw da ai. Raitim, shi gaw anhte ni “mai sa” myit malai lu saga ai ngu hkam la nna shi hpang de gayin wa na hpe gaw myit galu kaba ai hte, Kawa langai mi a lata hte ahpum apup la na matu jarit masat nnga ai tsaw ra myit hte ala ding yang rai nga ai.

Karai Kasang hpe kam sham ai ngu gaw, n kaja ai lam ni hpe kau da, mai kaja ai lam ni hpe lata hkan sa, masu magaw ga hpe koi gam, teng man ga hpe tsun, tinggyeng myit hpe la kau, htingbu wa hpe tsaw ra chye ai rai nga ai.

San Luka a Kabu Gara Shiga hta na chyum ga hte maren, myit malai nna Madu Yesu hpang de gayin wa na lam hpe lata la ai ni gaw, Karai Kasang a Ja mungdan hpe shawng hkam la lu na ni rai ma ai. “Myit malai lu shara n nga dum ai masha jahku shi jahku a majaw kabu gara ai hta, myit malai lu ai yubak kap ai wa langai mi a majaw, sumsing lamu kata e, grau nna kabu gara rai na ra ai,” Luka 15:7.

Myit malai lu nna galai shai na matu grai nan yak ai hte, hkra machyi ai zawn hkam sha ai rai nga ai. Raitim dai gaw lam kaja hpe lata la ai rai nga ai, ap nawng ai lam rai nga ai; Ngwi pyaw ai lam hpe lu la ai rai nga ai.

Mungga jahtum hta Chyoi Pra ai Wenyi hpe hkam la let anhte a myit ja ai kyang lailen kaw nna myit malai lu galai shai wa u ga Kanu Nu Maria akyu hpyi garum ya na matu shi hpe kam hpa nga ga ngu n gun jaw jahtum da ai.

Vatican Shiga Dap Kaw nna ndau da ma ai.

Shiga madat ni yawng hpe Karai Kasang shaman ya u ga!

 

Source : Vatican News

 

Add new comment

5 + 1 =