Wa Sarabyin, Sri Lanka, Libya, Ukraine Mungdan Ni A Matu, Hpyi Shawn Da Lam Galaw

Pope Francis

July 10, laban shani, San Peter Shawa Pa hta, Wa Sarabyin Francis, Sri Lanka, Libya, Ukraine Mungdan ni hta simsa lam hte seng nna man hkrum hkrum shaga bawng ban htingram lam galaw na matu hpyi shawn da nga ai.

Sri Lanka

Sri Lanka Mung shawa masha ni, mung masa lam hte sut masa lam masan n sa ai majaw, yak hkak jam jau nga ma ai. Shanhte hte rau Wa Sarabyin hkam sha myit n pyaw lawm ai lam, laban shani, Madu a Lamu Kasa Akyu Hpyi Ga tsun ngut ai hpang tsun shapraw da nga ai.

Bat kru ya shani, Sri Lanka, mungdan gumsan magam, President Gotabaya Rajapaksa hpe shi a tingyang magam kaw na hkring sa ya na matu, mung shawa masha ni Mungdan gumsan magam hkaw wang shawng hta, shawa n-gun madun ninghkap ai lam galaw lai wa ma ai rai nga ai.

Mungdan gumsan daru magam, President Gotabaya Rajapaksa hte Prime Minister Ranil Wikremesinghe yan hkring sa na myit hkrum sai raitim, tara shang galai shang na ni du shang wa ai aten du hkra mungdan gumsan daru magam hkaw wang kata kaw naw nga na rai ma ai lam, mung shawa n-gun madun ningbaw ni tsun ai a marang e chye lu ai.

Laban shani hta gaw Mungdan Gumsan magam hpung ni (Asuya) ningnan lata san la lu na matu mung masa shingjawng wuhpung (parties) ni hkrum zup bawng ban na na re lam chye lu ai.

Wa Sarabyin Francis gaw dai mungdan na Saradaw ni hte rau mungdan simsa lam hpyi shawn da ai. Mungdan ningbaw ningla ni hpe mung, mung shawa masha ni a hkrap nsen hte shanhte a ra kadawn ra ahkyak ai hpe hkum malap da ya mu, ngu Wa Sarabyin shadum da nga ai.

Libya

Libya mungdan hta mung sut masa lam hte shinggyim bawng ring masa lam manghkang ni nga ai majaw, shawa masha ni, grau nna ramma ni hta yak hkak ai lam ni nga taw ma ai. Dai manghkang ni hpe hparan mahtai shapraw nna shanhte hpe garum lu na matu mungdan kata shada hkrum shaga bawng ban, prinem htingram lam gaw de sa wa na matu Wa Sarabyin hpyi shawn da nga ai.

Libya mungdan gaw 2011 shaning hta mungdan a ningbaw rai nga ai Muammar Gaddafi hpe gasat shamyit kau ai hpang raitim, mungdan kata majan ni matut manoi naw byin lai wa ai rai nna 2020 shaning hta gaw gap hkat jahkring myit hkrum lam nga hpang wa ai rai nga ai.

Mungdan gumsan magam ra lata lamang hpe 2021 December shata hta galaw na hkyen lai wa ai raitim, 2022 shaning hta pyi n lu galaw shi ai rai nga ai.

Dai majaw mung shawa ni, Sinpraw Tobruk, dakkasa ni nga ai nta shawng hta shawa n-gun madun ra sharawng lam hpe shapraw lai wa ma ai. Dai shara na dum nta nkau ni hpe wan nat jahkru ma ai rai nna, mungdan shara shagu hta mung, mung shawa n-gun madun rawt malan ai lam chyam bra wa ai rai nga ai.

Ukraine

Ukraine mungdan a lam hte seng nna mung, Wa Sarabyin Francis gaw, majan hpe lawan jahkring mu ngu hpyi shawn da nga ai.

Ndai mungdan ni hta na mung shawa masha ni a matu, Wa Sarabyin Francis, shi a akyu hpyi kaw shalawm nga ai lam tsun let majan hpe lawan jahkring na matu hte mungdan simsa lam a matu man hkrum hkrum shaga bawng ban jahkrum, htingram prinem lam lawan la nna, simsa lam hte bawngring lam hpe lawan gaw de sa wa ra ai lam tsun shadum da nga ai.

 

By Fr. Patrick Mawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-07/at-angelus-pope-makes-appeals-for-sri-lanka-libya-ukraine.html

 

Add new comment

1 + 0 =