Wa Sarabyin A Shinggyim Matut Mahkai Nhtoi Mungga: “Madat Ai Gaw Man Hkrum Hkrum Shaga Ai Hta Ahkyak Dik Ai”

Lai wa sai shaning hta gaw Wa Sarabyin Francis a World Communications Day mungga hpe “teng ai mabyin hpe yu chye na hte dai hpe kaga hpu nau ni kaw hti shalai ya na” hpe madung da ai rai nna, dai ning 2022 shaning a matu gaw “madat chye na la ai atsam” hpe madung da ai rai nga ai. “Madat ai” gaw shinggyim matut mahkai hkrum shaga ai hta ahkyak ai.

Dai gaw shinggyim matut mahkai ai a “ga tara masa” jaw dik ai lam rai nga ai; hkrak re ai, n shut n shai ai, ahkyak dik galaw ra ai lam langai rai nga ai. Shada kam ai myit hpe gaw de hpang ai mung rai, matut manoi kam ai myit hpe shangang shakang ai mung rai nga ai.

Shinggyim masha ni hta “hpu nau ni hpe madat ya lu ai atsam” yawm hta yawm magang nga ai hpe masam maram lu ai Wa Sarabyin Francis gaw shada matut mahkai hkrum shaga ai hta “madat na la ai” hpe ahkyak da shaman la nna kyang lailen shatai la ra ai, ngu shadum da ai.

Myit masin Salum kaw nna madat ra ai

Dai ning na ‘shinggyim matut mahkai nhtoi’ hte seng ai Wa Sarabyin a mungga kumhpa gaw “salum na hte madat ai” lam rai nga ai hte maren, hkum hta kap ai na hte madat ai hta grau sung ai ‘madat ai’ lam rai nga ai. Dai zawn re ai teng man jaw ang ai madat ya ai lam gaw shada hku hkau kanawn mazum tsun shaga ai hta npawt ahkyak ai hpe gaw de ai mung rai nga ai; Karai Kasang hte shinggyim masha ni a lapran mung dai hte maren rai nga ai.

Makam mung madat ai kaw nna lu la ai re, ngu San Pawlu sakse hkam tsun da ai hpe Wa Sarabyin Francis anhte hpe bai hti tsun dan da ai. “Madat ai” gaw Karai Kasang hkum nan a shagrit shanem ai lai kasi rai nga ai. Karai Kasang gaw anhte hpe ga shaga ai hku nna mung madat ya ai hku nna mung shi hkum hpe shadan dan ai.

Shinggyim matut mahkai lam hta kaja ai mabyin masa sat lawat

Shinggyim matut mahkai hku hkau lam hta shada hkrum shaga ai shaloi  maga mi sha, shing n rai, marai langai chyu sha shaga nna, kaga masha hpe shaga na aten n jaw ai, ahkang n jaw ai gaw daini na aten na shinggyim matut mahkai masa lam shara law law hta byin nga ai gaw myit n pyaw hpa rai nga ai, ngu Wa Sarabyin madi madun da nga ai.

“Madat ai” gaw masan sa, ladat jaw, kaja ai hku shada tsun shaga matut mahkai ai hta ahkyak dik, n nga n mai ai npawt gaw de hpang ai lam re, ngu mung ngang gring ga hte tsun shadum sang lang da ai.

Madat ai lam n nga yang gaw kaja ai shiga hpe n lu la, n lu jaw ai. Madat ai lam gaw shinggyim masha ni hpe karan ginhka nna chye na lu ai hpaji hpe jaw ya ai, jai lang shangun lu ai. Nsen hpe jahtuk shatsawm ya lu ai, ngu mung tsun sang lang da ai.

Nawku Hpung Kata Madat Mara Ai Lam

Nawku Hpung masha ni tinang nawku hpung kata shada madat na la ya ai gaw ra ahkyak ai; anhte a aten hpe shawang myit hte wanglu wanglang jaw let kaga masha ni hpe madat na la ya ai gaw shawang myit hte karum ya ai mung rai nga ai.

Ya anhte galaw nga ga ai “KAHTAWLIK NAWKU HPUNG TING HTE SENG AI SASANA RAPDAW ZUPHPAWNG, SYNOD” hkrunlam hta mung “madat ya nna sumru hkam sha lawm nna akyu hpyi let rau hkawm sa ra ga ai, ngu Wa Sarabyin Francis saw shaga da ai.

Hpang jahtum mungga hta Chyoi Pra Ai Wenyi a garumm ya ai hte hpu nau ni a nsen hpe madat hkam sha sumru lawm let Nawku Hpung Nsen hpe shapraw sa wa ga, ngu n-gun jaw da ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

https://www.vaticannews.va/en/pope/news/2022-01/listening-is-essential-for-communication-says-pope-francis.html