Wa Sarabyin: Shinggyim Masha Hkum Shagu Hta Sari Sadang Nga Ai Hpe Dum Let Manu Shadan Ya Ga

Wa Sarabyin Francis gaw shingyim nau na shada ganawn mazum lam hte seng nna, Nawku Hpung a sharing shaga ai hta lakap nna, chyambra ana zingli Covid -19 tsin-yam hkrum masha ni hpe gara masa hku matut makai garum shingtau la ra ai lam sharing shaga da ai.

“Anhte shinggyim masha shada yu lakawn ai lam n nga ai rai yang, grau nna, tsin-yam kaba hkrum ai ni hpe yu lakawn ai lam n nga ai rai yang, anhte ni Mungkan ga hpe tsi shamai la lu na nrai ga ai,” ngu nna Wa Sarabyin Francis tsun ai.

Wa Sarabyin gaw, machyi masha ni hpe yu lakawn ai hta tinang hkum a hkam ja lam, hkra machyi hkra ap nawng nga ai ni a, htingbu wa hpe tsawra chye ai myit ni gaw dan dawng ai Hkristan masha ni sak jaw ap nawng lam nan re, ngu shagrau ga tsun da ai.

Chyambra ana zingli coronavirus gaw gasat kau ra ai ana zingli sha n rai nga ai. Dai gaw shinggyim wuhpung wuhpawng hpe mung hkra machyi kaba jaw nga ai.

Masha n-kau, masha laga ni hpe jai lang ngut jang kabai kau ai arai zawn galaw ma ai. Kaja wa dai zawn galaw ai gaw, masha ni a myi hpe nmu shangu ai tai nna, gat dut gat mari ai lam zawn shatai ma ai.

Raitim, makam masham hta lam woi hkrum jang, Karai Kasang gaw shinggyim la sha hte num sha hpe hpan da ai lam hpe anhte ni myit dum na rai ga ai. Gat rai hku n myit ai sha, Karai Kasang a hkrang sumla hte bung ai masha re ai hpe dum chye let tsaw ra lu na rai ga ai.

“Nau na ni a sak prat galu kaba lam hta tinang a sak prat hpe ap nawng let daw jau na matu Madu Yesu anhte hpe saw shaga nga ai re. Madu Yesu Myi kyaw ai ni hpe myi hpaw ya let shi hpang hkan nang ai sape shatai la ai. Dai gaw, masha shagu Karai Kasang a hkrang sumla hte bung ai shinggyim masha sari sadang hpe manu shadan ai lam rai nga ai,” nga nna Vatican Council kaw nna ahkyak la tsun shapraw nga ai lam hpe mung tsun da nga ai.

“Shinggyim ahkaw ahkang hte seng nna,” San Yawhan Pawlu II a ningmu hta, “masha ni a matu yak hkak dik ai hkrun lam langai rai taw nga ai”

ngu ai ga hpe lakap nna mung Wa Sarabyin Francis matut tsun da nga ai.

Wa Sarabyin Francis a sharin shaga lam ni hte shingran ni gaw chyambra ana zingli Covid – 19 tsin-yam makawp ninghkap ai hta laklai akyu rawng ai laika buk manang re lam mung chye lu ai.

Shinggyim sari shadang hpe jahten sharun, garan ginhka lam byin shangun ai chyambra ana zingli coronavirus kaw na tsi tsi hkam la na matu, mungkan ting a la nga ai ten hta, Makam masham gaw, dai zawn jahten sharun garan ginhka lam kaw nna, makawp maga la lu ai re lam mung tsun da ai. Makam masham gaw masha langai hpra hpe shamai ya ai zawn, wuhpung wuhpawng hpe mung shamai shatsai ya lu ai re ngu Wa Sarabyin tsun ai.

Madu Karai anhte a myi jahpaw ya u ga! Shaloi “shinggyim kun dinghku masha ni” ngu ai lachyum hpe chye na wa na ga ai. “Makam Masham gaw garan ginhka ai lam hpe gasat dang kau u ga” ngu nna mung Wa Sarabyin Francis myit mada lam tsun da ai.

Wa Sarabyin Francis, shawa masha ni hte hkrum shaga ai shaloi, ya na zawn chyambra ana zingli tsin-yam hkrum ten Christan masha ni Chyum mungga hta tsun da ai shinggyim sari sadang hte n htan sai ai lam yawng hpe gasat nna, shinggyim masha yawng a mungkan n-ta hpe gaw gap ga ngu n-gun jaw shadum da ai hpe Vatican Shiga Dap kaw nna ndau da nga ai.

12 August 2020, 10:07

Source : Vatican News