Wa Sarabyin: Shimlum Lam Tam, Htawt Sit Nga Hkawm Ai Ni Hpe Hkalum La Ai Gaw Shawng Lam Myit Mada Shara Kaba Re

March 18, bat kru ya shani, Wa Sarabyin Francis, 'Humanitarian Corridors' project' shinggyim masha shada matsan dum lama  masing hte Europe Dan kata de shimlum lam tam, htawt sit shang wa ai ni hpang de madi nna mungga shaga da nga ai.

Shimlum lam tam htawt sit nga pra hkawm ai ni a sari, ahkaw ahkang hpe makawp maga ai gaw ginhka jahka ai madim hpe run kau ai, shawng lam myit mada shara hpe hpaw malang ai rai nga ai, nga nna Wa Sarabyin sang lang da ai.

2016 shaning hta gaw de hpang ai "Humanitarian Corridors" gaw, htawt sit nga pra hkawm ai ni hpe shinggyim lam yan hku nna shimlum lam tam ya, lajang ya ai ni rai nga ai; Mediterranaen Sea ginra ni hta shanhte a magam bungli law jat chyam bra wa ai re lam chye lu ai; shinggyim mayak mahkak lam ni kaw nna shimlum lam de woi zimlum awn la ai magam bungli gaw shanhte a yaw shada lam kaba re lam chye lu ai.

Ya du hkra rai yang, Sant'Egidio wuhpung hku nna woi awn lakawn la ai hte, Europe Dan kata, mungdan shara shagu hta, hpyen yen yen shang wa ai Ukraine masha 1,800 hte shimlum lam tam htawt sit shang wa ai 5,300 re ai sai lam chye lu ai.

"Humnitarian Corridors" gaw Europe Dan a matu mung mungdan ting a matu mung shawng lam myit mada shara kaba hpe gaw gap ai kasi kamang kaba rai nga ai, nga nna Wa Sarabyin shakawn shagrau lam matsun madun da ai.

"Nanhte gaw Europe Dan a tsawm htap ai myiman nsam hpe madun dan ai ni rai sai, nanhte a tsawm htap ai masin salum a matu chyeju kaba sai, ap nawng ai lam kaji kajaw sha n re ai, shawng lam myit mada shara kaba a matu kaba la ai masing rai nga ai," nga nna Wa Sarabyin Francis, chyeju dum ga hte rau n-gun jaw hpaji jaw da nga ai.

Shinggyim nau na myit hte karum shingtau hkat ai gaw Hkristan ni ginlung  kahkyin gumdin lam a kumla kaba rai nga ai; Hkristu hta kam sham ai makam hte dau jau nga ga, nga nna mung saw shaga da ai.

By Fr. Patrick Gawmaw Hkawng Yae