Wa Sarabyin: Shi A Lata Hte Nu Maria Anhte Hpe Woi Lakawn La Ai Hta Kabu Pyaw Gara Na Ga

August 15,"Nu Maria Sumsing Lamu De Woi Shalun La Hkrum Ai Laban" shani, Madu a lamu kasa akyu hpyi ga tsun ten, Wa Sarabyin Francis, Chyoi Pra ai Nu Maria masha hkum shagu hpe shi a lata hte woi lakawn la ai hta kabu pyaw nga na hte shi hta kam sham kam hpa nga na matu hpung shawa masha ni hpe saw shaga da nga ai.

Nu Maria gaw anhte a lata hpe jum tek da nna anhte hpe manang tai ya let makawp maga bau sin ya nga ai. Dai hta myit dik myit pyaw nga na matu mung Nu Maria anhte hpe saw shaga nga ai.

Kam sham ai hpung masha ni, Nu Maria lupu akyu hpyi shara ni hta sa du akyu hpyi let hpyen tsin-yam hkrum Ukraine masha ni hte kaga tsin-yam hkrum masha yawng a matu myit akyu hpyi htinglu htinglai ya na matu mung Wa Sarabyin Francis saw shaga da nga ai.

 Nu Maria gaw anhte hta myit mada lam tawn da ai. Shi gaw anhte a lata hpe jum da ai. Dai hta kabu pyaw nga ra ai, nga nna Wa Sarabyin Francis tsun ai rai nga ai.

Nu Maria gaw hpan da hkrum nga yawng nga pra hta shawng ningnan hpan da hkrum ai wa re; hkum hkrang hte wenyi nawng hpawng da hkrum ai wa re. Sumsing mungdan hta tsaw htum ai hku shagrau hkrum ai shinggyim masha rai nga ai.

Sumsing mundan gaw anhte du lu mai ai shara re ai hpe madun ai wa mung shi rai nga ai. Anhte mare n galaw shut ga ai rai yang, anhte shinggyim prat hta shagrit shanem myit hte Karai Kasang hpe shakawn kungdawn ga ai rai yang, anhte a hpu nau ni hpe daw jau ga ai rai yang, anhte ni sumsing mungdan hta ningngai nga lu na teng sha rai ga ai. Sumsing mungdan a lam sumru woi let dai sumsing mundan madu lu na matu Nu Maria hkum nan anhte hpe ta gindun manang tai ya nna lam woi ningshawng ya nga ai.

Tsawm htap ai "Ave Maria" akyu hpyi ga hte de a hpung dagu atsam 

"Ave Maria, Chyeju hte hpring nga ndai; Nang hte Karai Wa nga ai; Num mahkra hta nang a lu ndai: Na hkritung na kasha Yesu mung a lu nga ai.

Chyoi Pra ai Maria, Karai a Kanu, ya mung, si na aten hta mung, anhte shut hpyit ai ni a matu akyu ara hpyi ya rit. Amen."

Shani shagu anhte akyu hpyi ga ai ndai akyu hpyi ga gaw grai nan tsawm htap ai akyu hpyi ga rai nga ai; anhte law malawng lu ai akyu hpyi ga mung rai nga ai.

Ndai akyu hpyi ga tsun shagu, anhte mung San Elizabeth zawn Karai Kasang hte Nu Maria hpe shakawn kungdawn, shagrau sha-a, akyu hpyi htinglu htinglai ga ai rai nga ai.

Nu Maria gaw Yesu Hkristu hpe anhte hpang de woi sa ya ai wa rai nga ai.

Nu Maria a shakawn shagrau ai ga gaw labau shang ai ngu na hta grau ahkyak ai hpe mu chye la ra ga ai. Karai Kasang gaw shi hta labau shang ahkyak ai magam lit ap jaw let hkrak teng man jaw ang ai, ningnan mung re ai gaw da tara lam hpe shachyaw gaw de da ai rai nga ai.

Nu Maria gaw, kaji htum ai hku nga lai wa ai; shagrit shanem ai hku nga lai wa ai. Dai majaw mung tsaw ai hku shagrau sha-a hkrum ai rai nga ai.

Nu Maria a myihtoi ga nsen gaw sumsing lam hpe madun ya ai. Shi hpe yu dat yang shi a hpung shingkang hpe mu lu na nna teng man hpung dagu gaw daw jau ai lam re ai hpe mung, dai gaw up hkang lu na hte tsaw ra chye na lam mung rai nga ai hpe chye na hkap la lu wa na ga ai.

Nu Maria hpe shagrau sha-a, shakawn kungdawn, shi kaw na akyu hpyi htinglu htinglai hkam la let shi a myihtoi ga rai nga ai sumsing lam hta hkawm sa lu hkra shakut sa wa ga, ngu hpang jahtum mungga ginchyum dat hku nna Wa Sarabyin Francis, Nu Maria sumsing lamu de woi shalun la hkrum ai poi laban shani, hpung shawa masha ni hpe hkaw tsun sharin shaga da nga ai.

By Fr. Patrick Gawmaw Hkawng Yae

#vaticannews

#rvakachinservice

#popefrancis

https://www.vaticannews.va/en/pope/news/2022-08/pope-francis-angelus-address-on-feast-of-assumption-of-mary.html