Wa Sarabyin: Sape Ni A Matu Akyu Hpyi Kasi La Shara Yesu Madu

June 2, bat masum ya shani, shawa masha ni hte hkrum shaga ai hta, “Yesu Madu gaw sape ni akyu hpyi na kasi la shara rai nga ai ngu Wa Sarabyin Francis sharin shaga da nga ai.

Yesu Madu sape ni hpe shaga la shawng kaw bum ntsa lung, lana mi tup akyu hpyi lai wa ai lam San Luka tsun da nga ai. Hpang jahpawt nhtoi htoi jang sape ni hpe lata la nna Shi a kasa ni ngu shamying la ai. Kawa Karai Kasang hte ga shaga ai hpe akyu hpyi ai ngu tsun ai rai nga ai ngu, Wa Sarabyin Francis sang lang da ai. Shi lata la ai ni gaw hkuk manu dik masha ni zawn gaw n rai ma ai, grau nna Yuda gaw hpang daw de Yesu hpe dut sha kau ai rai nga ai; Raitim, yawng gaw Karai Kasang masin jahkrat da sai re ai hpe chyum laika hta ka da nga ai, ngu Wa Sarabyin Francis matut sang lang da ai.

Yesu Madu gaw Shi lata la ai kasa ni shut hpyit lam ni gade law ma ai raitim, shanhte hpe shi a masin salum hta bang da nga ai; hpa majaw nga yang Shi shanhte hpe Kawa Karai Kasang kaw nna lu la ai rai nga ai; dai majaw Yesu Madu a prat hta shanhte a matu matut matut akyu hpyi ya nga ai.

Sara hku mung, manang hku mung, Yesu Madu gaw shanhte hpe myit galu kaba hkam sharang ya ai; kasa Peter hpe hpang jahtum da sha poi hta hkam sharang ya ai gaw sakse rai nga ai. Shi hpe nyet kau ai Peter shi hta makam hta hkrat sum ai lam n nga u ga matuYesu Madu akyu hpyi lai wa ai. Kasa ni n-gun yawm ai aten, makam yawm taw ai aten, Yesu Madu a tsawra myit gaw n hkring mat ai; Shanhte a matu tut nawng akyu hpyi ya nga ding yang rai nga ai.

Yesu Madu a tsawra myit hte akyu hpyi ai lam gaw mara kaba galaw ai ni hte n tsawm n htap dik ai masha ni a matu raitim, galoi mung n hkring mat ai. Kawa Karai kasang hpe shi a ningma ni hpe madun let anhte ni hkye hkang la hkrum lu na matu akyu hpyi ya nga ai.

“Yesu Madu a Sasana magam hpe galaw hpang shagu hte galaw ngut shagu akyu hpyi ai hpe mu lu ga ai. Makam chyam dinglik yu ai lam hpe kasa ni galoi mung hkrum sha lai wa ma ai. Dai zawn chyam dinglik hkam la ngut ai hpang she Yesu Madu a Sasana magam hpe gun hpai lu ma ai; Shi a nni nkri hkam si hkam ai hte bai hkrungrawt ai hta shang lawm lu ma ai, ngu Wa Sarabyin matut sharin shaga da nga ai.

Akyu hpyi ai lam gaw nhtoi hte n-gun atsam hpe jaw ya nga ai. Tsaw grau ai de lung magang akyu hpyi ra magang rai nga ai.

Yesu Madu ahpraw nsam galai ai shaloi, akyu hpyi na matu bum de lung wa ai hta Peter, Yawhan hte Yaku ni hpe shaga lung wa ai. Mawshe hta Elijah mung sa du nna shi hte rau sa nga let sa shaga ma ai. Dai gaw shi hte rau akyu sa hpyi ai ngu mung mai tsun nga ai.

Yesu Madu gaw akyu hpyi let Kawa Karai Kasang hte rau myit langai hta sha jawm pawng let tsawra a yaw shada ai hkye hkrang la ai lam hpe shadan shadawng ai.

“Ndai wa gaw ngai tsaw ra ai Kasha rai nga ai; Shi hpe madat mu,” ngu tsun dan ai nsen hpe dai kasa marai masum na lu ma ai.

Yesu Madu anhte a akyu hpyi ga hpe jahpring shatsup ya ai. Yesu Madu gaw anhte a matu galoi mung akyu hpyi ya nga ai hpe myit dum let chyahkring hkring akyu hpyi na matu Wa Sarabyin Francis Hkristan masha ni hpe n-gun jaw da nga ai. Lama na marai langai ngai jam jau jam hkau hkrum taw nga ai rai yang, “Yesu Madu ngai a matu akyu hpyi ya nga ai” ngu bai myit dum nga ra ai. Anhte shada hkam sharang myit galu kaba mara dat hkat lu na matu Yesu Madu anhte marai hkum shagu a matu akyu hpyi ya nga ai; Kawa Karai Kasang kaw shi a nma ni hpe madun let akyu hpyi ya nga ai.

Ginchyum dat mungga hta, lama na anhte a akyu hpyi ga ni n hkum n tsup ai rai tim, kamsham myit hte akyu hpyi ga ai re majaw Yesu Madu hta kamsham ai myit hpe galoi n jahkring kau da ga, ngu n-gun jaw da nga ai. Yesu Madu a akyu hpyi ga gaw sinkaw zawn rai nna anhte hpe sumsing lamu de woi shang wa ai, ngu mung tsun dan da nga ai.

By Fr. Patrick Gawmaw Hkawng Yae

#vaticannews #rvakachinservice

Source : Vatican News