Wa Sarabyin: San Yawseph A Kawa Myit Jasat Hpe Sumru Ai Gaw Karai Kasang A Si Mani Ai Tsaw Ra Myit Hpe Mu Lu Ai

January 19, bat masum ya shani, hpung shawa masha ni hte hkrum shaga ai ten, Wa Sarabyin Francis, kawa langai a lit magam ni hpe sumru woi let Karai Kasang a si mani ai mu tam la lu ai, ngu tsun da ai.

Hpung shawa masha ni hte hkrum shaga ai hkaw, San Pawlu VI masat dingsat hkaw hta hpung shawa masha ni hte hkrum shaga ten ya na zawn San Yawsep a kawa myit jasat, si mani ai lam hpe sumru woi da ai rai nga ai.

Madu Yesu galoi mung shaga ai “Wa” ngu ai ga si hta Kawa Karai Kasang hte Kawa a tsaw ra myit rawng nga ai ngu tsun ai rai nga ai. Kawa kaw na shi lu la ging ai sut gan hpe hpyi la nna wam dam mat ai kasha kanau wa bai htang wa ai shaloi, kawa a mara dat hkyam sa hte tsaw ra myit madun ai ga shadawn hte Madu Yesu tsun da ai hpe anhte chyum laika hta hkring hkring hti sumru yu saga ai.

Si mani ai hte tsawm htap ai lam gaw mungkan masa hta grau kaba, grau dam lada ai. Dai gaw kadai mung n myit mada da ai tara rap ra lam hpe madun dan ai. Dai majaw, anhte ni Karai Kasang hpe galoi n mai malap ga ai; anhte a mara, shut shai ai lam ni, hkrat sum ai lam ni a majaw Karai Kasang hpe n mai malap kau ga ai; anhte a pat da masin salum ni hte Shi a tsaw ra ai hpe n kam n sham ai, kam sham myit yawm ai masa lam ni hte mahtang Kawa Karai Kasang hpe jahkrit shama ai tai ga ai.

Wa Sarabyin Francis a Apostolic Letter, Patris corde, hta shi tsun da ai lam hpe mung bai sumru woi da ai. “Karai Kasang a tsaw ra myit hpe hkam sha ai mahkrum madup gaw si mani ai myit masin hte sat lawat hpe jaw ya ai; Kawa Karai Kasang a teng man tsaw ra myit Yesu hpe shawng shalai ya ai wa gaw San Yawsep hkum nan rai nga ai, ngu Wa Sarabyin a Apostolic Letter Patris corde hta tsun da ai rai nga ai.

Ndai gaw anhte hkum nan a si mani ai mahkrum madup hpe sumru ai hta nhtoi tai lam madun garum ya na ra ai; sakse hkam ga ai rai yang anhte hkum nan mung si mani ai San Yawsep kasi hpe hkam la lu na ga ai.

Si mani ai lam gaw myit a hkam sha ai lam hpe madung da ai n re ai; tsaw ra myit hpe hkam sha ai mahkrum madup mahtang rai nga ai; anhte a matsan mayan re ai prat masa hpe raitim Karai Kasang a tsaw ra myit hte galai shai la lu ai hpe hkap la kam sham ai rai nga ai.

Karai Kasang a tsaw ra matsan dum ai hpe hkam la lu na matu gaw, grau nna mara raw sakramentu kumla hta, bai kaga mai kaja ai lam ni hta mung, Karai Kasang a teng man ai si mani ai hte hkrum matut na gaw grai ahkyak ai. Karai kasang a teng man ai lam gaw anhte hpe mara hta jeyang na matu n re ai; hkap hkalum hkap apup la na, myit kalu kaba ai hte n-gun ban ya na hte mara dat hkyam sa ya na matu she rai nga ai.

Hpang jahtum hta, San Yawsep a kawa tsaw ra myit hte si mani ai kasi kamang gaw Kawa Karai Kasang a tsaw ra myit hpe shadan shadawng ya u ga; Kawa Karai Kasang anhte hpe mara dat hkyam sa na hpe myit malai majing hte kam hpa kam sham let akyu hpyi ya let anhte a matu mung San Yawsep kaw kam hpa kam sham ai akyu hpyi ga jaw da ai.

St Joseph, father in tenderness, teach us to accept that we are loved precisely in that which is weakest in us. Grant that we may place no obstacle between our poverty and the greatness of God's love. Stir in us the desire to approach the Sacrament of Reconciliation,
that we may be forgiven and also made capable of loving tenderly our brothers and sisters in their poverty. Be close to those who have done wrong and are paying the price for it;
Help them to find not only justice but also tenderness so that they can start again. And teach them that the first way to begin again is to sincerely ask for forgiveness. Amen.

By Fr. Patrick Gawmaw Hkawng Yae

https://www.vaticannews.va/en/pope/news/2022-01/pope-at-audience-joseph-s-paternity-reflects-god-s-tender-love.html