Wa Sarabyin: Sak Kung Prat Gaw Hkristu Hpe Sakse Hkam Nna Kaja Dik Apu Asi Pu Si Ten Re

image from Vatican website

August 10, bat masum ya shani, San Pawlu VI hkaw hta galaw ai "Hpung Shawa Masha Ni Hte Hkrum Ai Lamang" hta, Wa Sarabyin Francis, sak kung prat ten na sari manu lam hte seng nna hkaw tsun da nga ai.

Chyum daw hpe gaw Yawhan 14:1-3 hpe la da ai. Hpang jahtum dawsha poi hta Madu Yesu shi a kasa ni hpe ga sadi tawn da ai lam rai nga ai.

Shinggyim masha yawng gaw asak kung kaba wa ai shaloi na mayak lam ni hte hkrum na teng ai, dai hpe lai di ra na teng ai raitim, dai aten, shanhte laklai lam gaw myit kahpra, mau na zawn re ai makam masham chyeju kumhpa hkam la lu, shaman shalai ya lu ai ten rai nga ai.

Sak kung prat na shaman chyeju

Sak kung prat hta shanhte ni si mani ai, hkrum ang ai prat hpe manu shadan hkungga ai. Nawku hpung woi ni hte hpung masha ni a shut shai dumhprut ai lam ni hpe mung myit galu kaba ai hte hkam sharang, shading sharai, makawp maga ya lu ai.

Karai Kasang kaw na shaman chyeju ni hpe mung sak kung prat hta htinglu htinglai ya ai lam grau galaw lu ma ai.

Htani Htana Asak hte seng ai sharin sara ni mung rai ma ai. Dinghta mungkan hta nga pra ten gaw htani htana hkam la lu na lagaw lahkam hpang ai sha naw rai nga ai. Karai Kasang hta sha hkum tsup ai htani htana asak hpe tam la lu ai. Hpang ai hta kaja jang, jahtum mung kaja na ra ai; hpang ai shaloi n kaja jang, jahtum hta mung n kaja ai hte jahtum wa na tsang ra ai; n kaja ai hta manoi nga n mai ai.

Sak kung prat gaw aten a lachyum hpe grau chye na ai; anhte hpe mung aten a lachyum, manu dan ai lam hpe grau chye na shangun lu ma ai. Makam masham lam hpe azi yu, hka ja, hkam la, hkan sa shatup, garan kachyan sa wa na matu lam woi ya lu ma ai.

Sak kung prat gaw sakse hkam kaja dik aten rai nga ai; Hkristu hta kam sham ai makam shanhte a makau grupyin masha ni hpe sakse hkam sharin shaga lam matsun ya lu ai aten rai nga ai, ngu Wa Sarabyin Francis hkaw tsun da nga ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/pope-francis-general-audience-old-age-bear-witness0.html

 

Add new comment

4 + 7 =