Wa Sarabyin: Sak Hkrung Makam Masham Mahkrum Madup Hpe Garan Kachyan Mu!

Dicastery for Evangelization, kaw zinglum galaw woi ai Third International Congress on Catechesis, (3) lang ngu na mungdan shagu na Tara Hkaw Sara/Tara Laika Sharin Sara ni a hpawng kaba hta shang lawm ai ni hpe, Wa Sarabyin Francis,  September 10, bat kru ya shani, n bung ai mungdan kaw na kam sham ai masha ni, sak hkrung makam masham mahkrum madup hpe garan kachyan mu, nga nna htet da ai hpe Vatican Shiga Dap kaw nna ndau da ma ai.

Tara Hkaw Sara/ tara laika sharin sara ni gaw Nawku Hpung kata grai nan ahkyak ai lit magam hpe gun hpai nga ai ni rai ma ai; Nawku Hpung a lit magam, masha law law gun hpai lu ai kumla tai ai ni mung rai ma ai; sasana ma ni, ramma ni, sak kung sai ni yawng gaw makam masham lam hta hkawm sa mayu ai myit hpe jaw bang ya ai ni rai ma ai; Hkristan wuhpung wuhpawng hta Tara hkaw Sara/ Tara Laika Sharin Sara ni Nawku Hpung kata daw jau magam ni hpe gaw de da ai gaw shanhte ni a kaba la ai lit magam ni hpe gun hpai sa wa lu na matu rai nga ai, nga nna Wa Sarabyin shang lang da ai.

Hpung masha ni hte hkrum zup ai lamang hta, Wa Sarabyin Francis gaw, Hkristan masha shagu: Saradaw, Jau, Sasana hpung hta lawm ai ni yawng mung Tara Hkaw Sara/Tara Laika Sharin Sara ni hkrai rai nga ai; Karai Kasang anhte marai hkum shagu hpe saw shaga nga ai gaw, masha hkum shagu a masin salum hta Shi a Kabu Gara Shiga nsen htawn bang ya na matu rai nga ai, nga nna sharin shaga da ai.

Tara Hkaw Sara/Tara Laika Sharin Sara tai nga ai hta galoi mung hkum pu ba dum mu; Prat bang shagu na masha hkum shagu hpe tinang a makam masham hta sak hkrung nga ai mahkrum madup ni, garan kachyan ya mu, nga nna Wa Sarabyin Francis n-gun jaw da ai.

Ndai prat hta Tara Hkaw Sara/ Tara Laika Sharin Sara ni a matu mayak lam (challege) law law nga nga ai; asak n bung shai hkat ai wuhpung hte wuhpung ni hpe makam masham lam shachyan ya na, sharin ya na, sak hkrung woi na matu kaja dik ladat lam ni hpe tam galaw shakut ra ai gaw grai yak ai mayak langai rai nga ai, nga nna Wa Sarabyin sang lang jahpra dan da ai.

Ahkyak dik gaw salum hpe hpaw da nna, Kabu Gara Shiga hpe madat na la na hte Hkristan prat hta sak hkrung kung hpan galu kaba wa hkra saw shaga lam woi zinglum la ra ai; Jau Ginwang Madang hta, Saradaw Ginwang Madang hta Tara Hkaw Sara/ Tara Laika Sharin Sara ni hpe wunkat gara hku bai jaw na ngu ai matsun lam ni grai ahkyak ai, nga nna mung Wa Sarabyin sadum da ai.

"Anhte, Yesu Hkristu hta kam sham ga ai rai yang, Shi a mungsung lam ni hta hkawm sa ra ai, Shi a tara lam ni hta hkan sa ra ai; Hkye la Madu hkum nan anhte kaw du sa ai gaw anhte hpe tsaw ra na matu, Shi a Kawa hpe tsaw ra na matu, Shi a hpu nau ni hpe tsaw ra na matu rai nga ai; Shi gaw Chyoi Pra ai Wenyi a marang e, shinggyim hkum sa la ai, anhte hte rau nga nga ai, anhte a magam bungli ni hta sak hkrung nga ai, nga nna Wa Sarabyin Francis, Catechism of the Catholic Church, n.2074 hpe mahta nna mung sharin shaga da ai.

"Ngai nanhte hpe tsaw ra made ai zawn, nanhte shada da mung tsaw ra nga na rai myit dai."

Hkristu a tsaw ra myit gaw teng man ai, sak ningnan hta hkawm sa shangun ai tara rai nga ai, Hkristan masha ni hpe Chyoi Pra ai Wenyi a garum ya ai hte, shani shagu na hkrunlam hta n hkring sa mat ai sha matut manoi hkawm sa shangun ai, rai nga ai, nga nna mung sharin shaga da ai.

"Ndai tsaw ra myit hta na galoi hkum kayin mat mu! Dai gaw myit ngwi myit pyaw lam hpe jaw ya ai; tsaw ra myit hta machyu jung nga yang mahkra hta kabu pyaw lu ai; Kashin Kamun hkam la ai nhtoi hta anhte hkam la ai chyeju ni hte anhte hkap la ai lit magam ni hpe gun hpai sa wa let apu asi pu si nga na ahkyak ai," nga nna hpang jahtum n-gun jaw ga hte Wa Sarabyin Francis shi a mungga hpe jahtum da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-09/pope-to-catechists-share-a-living-experience-of-the-faith.html