Wa Sarabyin: Prat Ban Shagu Mahkri Shawn Rau Nga Pra Ai Gaw Nga Nan Nga Ra Ai

Pope Francis

Wa Sarabyin: Prat Ban Shagu Mahkri Shawn Rau Nga Pra Ai Gaw Nga Nan Nga Ra Ai

Ga Shaka Dingsa prat na kaji kaoi ni a laklai labau galu ai mabyin hpe sumru woi da ai hta, Wa Sarabyin Francis, prat hte prat na kawa ni gaw shanhte a kashu kasha ni hpe woi awn zinglum lai wa ma ai lam tsun dan da ai. “Ndai mabyin masa hta sung la ai lachyum rawng ai kumla ni rawng nga ai,” ngu Wa Sarabyin Francis, bat masum ya shani, hpung shawa masha ni hte hkrum shaga ai lamang hta sang lang da ai.

Shinggyim masha gaw Karai Kasang a hkrang sumla hte bung pre ai hku hpan da hkrum ai rai nga ai. Shawng daw na shinggyim labau hta yak hkak jam jau, chyam chya ai lam ni nga lai wa ai raitim, aten ladaw galu wa ai hte maren, mahkrum madup ni hpe lachyum htai lai nna, chye na yak ai prat hpe mahtai tam gaw de shatsawm la ma ai. Dai ten na masha ni gaw wenyi lam hpe shangan shakang ai hta mung gawng ngwi ma ai.

Prat ban shagu na shinggyim masha ni gaw shinggyim prat a lachyum hte seng nna ga san law law san chye ma ai rai nga ai.

Ga shaka dingsa prat na ji wa ni gaw, shanhte a prat ningnan hta hkrum katut ai mahkrum madut masa lam nnan ni hpe mahtai tam la nna sak hkrung nga lai wa ma ai. Anhte a prat hta mung sak kung mahkrum madup nga ai ni gaw prat masa lam hta hkan nna sims htuk manu ai hku sak hkrung woi ra ai, ngu Wa Sarabyin Francis shadum da ai.

Kaji Kawoi ni hte sak kung dinggai dingla ni a poi nhtoi masat galaw ai gaw ndai yaw shada lam mung lawm ai; ndai poi hpe, Yesu Madu a Kaji Kawoi yan rai nga ai, San Anne hte Joachim yan a poi hte ni dik ai, July shata a mali ngu na laban bat hta galaw na rai ga ai.

Asak naw ram ai ni hte sak kung sai ni lapran hku hkau makyit mahkai rau nga pra, magam rau gun hpai ga ai gaw myit mada lam hpe hkrang shacyaw ai, shabyin ai rai nga ai, ngu mung Wa Sarabyin Francis shadum da ai. Dai gaw, Karai Kasang a shinggyim masha ni a matu yaw sin da ai masing hpe hkan shatup ai hta garum ya na ra ai. Karai a man hta ginlum kahkyin gumdin nga ga, ngu matut shadum let, Chyoi Pra ai Wenyi gaw prat ban shagu shada matut mahkai rau rai nga ai lam hta myit-nyan atsam marai jaw bang ya let lam woi ya nna, pyaw ngawn ai shingni nsen ni hpe langai sha re ai mahkawn mangwi rau hkawn let Karai Kasang hpe shakawn nga lu mu ga ngu akyu hpyi da ya ai.

By. Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-03/pope-at-audience-alliance-of-generations-is-indispensable.html

Add new comment

2 + 1 =