Wa Sarabyin: Nden Marai Ja Ai Na Myit Masin Mahkra Hte Karai Kasang Hpang De Yin Wa Mu!

October 24, laban shani, “Madu A Lamu Kasa Akyu Hpyi Ga” n tsun shi yang, dai shani na Chyum Mungga hte seng nna myit sumru na lam hpe Wa Sarabyin Francis tau nau tsun da nga ai. “David a kasha Yesu e, ngai hpe matsan dum la e law” ngu myi kyaw ai Bartimaeus a hpyi jahtau nsen na ai hte rau hkawm sa nga ai Yesu Madu kalang lata nan hkring nna shi hpe shaman ya ai lam rai nga ai.
Karai Kasang gaw matsan mayan ni a hpyi jahtau ai nsen hpe galoi raitim madat ya ai hpe madun dan ai. “Na a makam masham gaw nang hpe shamai ya nit dai” ngu Madu Yesu hkang da ai lam hpe mung mu lu nga ai.
Bartimaeus gaw Yesu Madu hpe Messiah hkyela Madu re ai hpe chye na hkam sha ai majaw shi a masin salum kaw nna nan “Messiah” ngu shaga let shi hpe matsan dum na matu hpyi shawn ai rai nga ai; Shi hta ra kadawn ai lam mahkra hpe jaw ya lu ai wa kaw kam hpa myit hte hpyi shawn ai rai nga ai ngu Wa Sarabyin Francis sang lang sakse hkam da nga ai.
Myi jahpaw ya na matu hpyi shawn ai hte maren hkum hta na myi hte rau masin salum myi hpe mung hpaw ya ai, hkam sha yak ai dam ana kaw nna, hten run mat ai yup mang shingran kaw nna, myit kaji kadun nga ai kaw nna, shut shai kaba kaw nna teng man dinghpring hkam ja zet let rawt jat ai yup mang shingran kaba hpe asak bai bang ya ai, ngu Wa Sarabyin Francis matut sang lang da ai.
Bartimaeus zawn sha Madu Yesu hpe David a kasha ngai hpe matsan dum la e law, ngu kahtap kahtap nna hpyi shawn nga ga ngu hpaji jaw shaw shaga let Kanu Nu Maria gaw Karai Kasang hpang de anhte gara hku gayin sa wa lu na lam hpe sharin ya u ga, shi hta kam hpa nga ga ngu mung shadum n-gun jaw da nga ai.

By Fr. Patrick Gawmaw Hkawng Yae
#vaticanews
#rvakachinservice
https://www.vaticannews.va/en/pope/news/2021-10/pope-be-courageous-and-t...