Wa Sarabyin: Myit Masin Hpaw Let Karai Kasang A Matsan Dum Lama Ai Hpe Hkam La Ga

March 27, laban shani, “Madu A Lamu Kasa Akyu Hpyi Ga” tsun ten, Wa Sarabyin Francis, dai shani hti ang ai Kabu Gara Shiga hpe lakap let anhte a myit masin salum ni hpe hpaw da nna Karai Kasang a matsan dum tsawra ai hpe hkam la ga, ngu mungga shaga da ai.

Kabu Gara Shiga gaw Madu Yesu a ga shadawn, Kawa hte shadang sha lahkawng a lam rai nga ai. Kasha kanau wa gaw kawa kaw na shi lu ging ai sutgan hpe hpyi la nna shut hpyit hkawm mat ai hpang myit malai lu nna kawa kaw bai htang wa ai lam rai nga ai. Kahpu wa gaw kawa hte rau nga ai raitim, kanau wa myit malai lu nna bai htang wa ai hpe n hkap la ya lu ai. Kawa chyawm gaw kasha kanau wa myit malai lu nna bai htang wa ai hpe hkap mu ai hte moi na zawn sha kasha majing hku hkap tau la ai.

Anhte ni hpe Karai Kasang a matsan dum tsaw ra myit hte mara dat hkyam sa ya let Shi a sali wunli hpe bai hkam la shangun ai, poi galaw let nan hkap tau hkap hkalum la ai. Kasha majing hku hkap la nga dingyang rai nga ai.

Anhte gaw dai dam mat ai kasha wa zawn rai nga ga ai hpe myit dum ra ga ai. Kawa gaw anhte hpe galoi mung tsaw ra ai, anhte hpe ala dingda nga ai.

Myit Masin Salum Hpe Hpaw Da Ga

Madu Yesu a ga shadawn hte sharin shaga ai mau mwi hta na kahpu ba wa gaw kanau bai htang wa ai hpe kawa e bai hkap la ai hpe n ra sharawng ai, pawt sindawng nga ai myit masa gaw mara dat hkyam sa n jaw lu ai, masin salum hpe n hpaw da ai rai nga ai, ngu Wa Sarabyin sharin shaga da ai. Kahpu wa a myit masa, kyang lailen gaw anhte ni hta mung nga chye ga ai. Agung alau hkrum ai lam rai nga ai. dai zawn re ai agung alau hpe kam sham ai masha ni awng dang kau lu ra ai. Pawt sindawng ai myit rawng ai rai yang gaw dai agung alau hpe tawt lai lu na n rai ga ai, ngu mung Wa Sarabyin shadum da ai.

Kabu hkinnum let awlaw nga ga

Ga shadawn hta na kawa gaw kasha kanau wa bai wa ai shaloi kabu gara let hkap hkalum hkap tau la ai. Dai hpe n ra sharawng ai kahpu wa hpe mung myit masin hpaw da let kanau hpe kabu gara myit hte hkap hkalum la na matu tsun shadum ya ai. Hpa majaw nga yang dai bai htang wa ai wa gaw na kanau majing rai nga ai, si mat sai kaw nna ya bai hkrung wa ai na kanau majing rai nga ai. Dai majaw gaw kabu gara let awlaw mai nga ai, ngu kasha kahpu wa hpe sharin shaga ai.

Kawa Karai Kasang gaw anhte hpe ndai zawn re hkrum katut ai aten hta myit masin hpaw malang da nna kabu hkinnum let awlaw nga na matu sharin shaga nga ai re, ngu Wa Sarabyin sumru woi da ai rai nga ai.

Myit malai ai ni hte nihtep ai hku nga lawm ya ga

Kabu gara shangun ai ngu ai gaw myit malai lu ai ni hte nihtep ai hku nga lawm ya ai lam rai nga ai. Shanhte a hkrit tsang ai lam ni kaw nna n-gun atsam hpe bai hkam la lu na matu hte mai kaja lam hta bai hkawm sa wa lu na matu gaw shut hpyit nna myit malai lu galai shai ai ni hte rau nga let n-gun jaw lam woi sa wa ra ai.

Myit masin hpe hpaw malang da let teng sha madat hkam sha lawm ai wa gaw myit masin tsawm htap ai, mani sumsai rai nna kaga masha ni hpe myit pyaw myit dik lam jaw ya lu ai, ngu sharin shaga let Kanu Nu Maria gaw Karai Kasang a tsaw ra matsan dum lama ai hpe gara hku hkam la chye ra ai hpe sharin ya u ga ngu akyu hpyi htinglu htinglai let mungga hpe ginchyum dat da ai.

By Fr. Patrick Gawmaw Hkawng Yae 

#vaticannews

#rvakachinservice

https://www.vaticannews.va/en/pope/news/2022-03/pope-at-angelus-may-we-receive-god-s-mercy-with-open-hearts.html