Wa Sarabyin: Myit Malai Lu, Kamhpa Myit Masin Hte Rai Yang Karai Kasang Matsan Dum Kumhpa Hkam La Lu Na

Pope Francis

Lusha Gam Ladaw htingrai htingrat akyu hpyi lamang hku nna, "Karai Kasang a matu hkying hkum 24" ngu ai ga baw hte akyu hpyi lamang hta shang lawm na ni hpe, Wa Sarabyin Francis, March 17, bat manga ya shani, mungga hte n-gun jaw da ai.Masha hkum shagu Karai Kasang hta kamhpa kam shamyat, myit malai myit masin salum hte rai yang Karai Kasang a matsan dum lama kumhpa hpe hkam la lu na re lam n-gun jaw shadum da ai rai nga ai.

Lamang hpe Roma Jau Ginwang, Santa Maria delle Grazie al Trionfale, hta galaw lai wa ai rai nga ai. Lusha Gam Ladaw laman, Mara Sakramentu hkam la ai, hkam ya ai lam hpe ahkyak madung da galaw ai rai nna, Roma Jau Ginwang hta shaning shagu galaw ai nawku htung lai langai re lam chye lu ai.Wa Sarabyin Francis woi galaw lai wa ai lamang rai nna, daining gaw (10) ning hpring sai lam chye lu ai. Shaning shagu Lusha Gam Ladaw a (4) ngu na laban hta galaw ai re lam chye lu ai. Yesu Madu hkrung rawt ai Paska a matu tau nau hkyen lajang ai magam hku nna galaw ai rai nga ai.

Kamsham ai masha ni, htingrai htingrat lam hkam la ai Mara Raw Sakramentu hpe hkam la na matu shadum jahprang, n-gun jaw, saw shaga nna wenyi lam woi ya na yaw shada let Wa Sarabyin Francis woi galaw hpang wa ai re lam chye lu ai."Shut hpyi ai wa ngai hpe matsan dum la e law" (Lk 18:13).Hkying hkum (24) akyu hpyi, mara raw sakramentu hkam la ai lamang hpe, the Dicastery for Evangelization's Sector for Fundamental Question regarding Evangelization in the World" kawn lit la lajang ya ai. myu sha g hpan law law hte chye na hkra mung sawk sagawn nna ga gale lajang ra ai re lam chye lu ai.

Ndai link ni hta shang yu mai ai: a special pastoral resource,  available for download, Pope Francis in his homily.

"Shagrit shanem let akyu hpyi ai nsen gaw summwi ni hpe achyaw hkren lai lu ai" (Sir 35:1). Wenyi hta matsan mayan re ai ni gaw Karai Kasang a man hta shagrit shanem ai, Shi a matsan dum lama ai mara dat hkyamsa hte hkye hkrang la lam hpe ra marin ma ai. Shanhte gaw madu da lu ai hpa n nga ai, Madu hta chyu sha yawng mayawng hkam la lu ma ai.

Shagrit shanem ai wa gaw, arawng la nna yawng a shawng kaw galoi n nga ai; shagrit shanem let shingdu kaw sha nga ai. Shi a shagrit shanem let shi a mara hpe myit dum, tawng ban ai wa gaw Karai Kasang a man hta seng seng nga ai. Shi gaw Kawa Karai Kasang a matsan dum lama ai tsaw myit hpe hkam sha lu ai. Karai Kasang gaw dai zawn re ai ni hte nihtep sa nga ai. Sharit shanem let myit malai lu tawng ban sit shang wa ai wa a matu Karai Kasang shara lajang da ya ai.

Shagrit shanem let tengman ai hku hkrum shaga ai gaw hpu nau shada, mahkrai hkrai htingrai htingrat ai lam hpe gaw de ai rai nga ai. Chyum Laika hta na "kang hta ai wa" Nawku Htingnu kata, nawku tawn hte tsan tsan kaw, baw n sharawt gwi ai sha, tsap nga let shagrit shanem ai myit hte, Karai Kasang a man, shi hta tengman byin ai lam, myit dum myit malai nna sit shang wa ai.

"Hpu nau ni e, 'Ngai' ngu ai myit jasat hpe kau da, Karai man de sit shang ga ai rai yang, Karai Kasang anhte hte rau rai nga ai hpe dum nga ga. Tsan gang hkat ai anhte ni hpe mahkrai hkrai hkrisawn ya nga ra ai. Sanseng myit hte anhte a gawng kya ai lam ni, shi a man hta tsun hpaw dan, galai shai hkam la na hpe Karai Kasang ala nga ai, grau nna, Mara Raw Sakramentu Chyeju Kumla hku nna anhte hpe ala nga ai," nga nna Wa Sarabyin shadum jahprang ai.

"Htingrai htingrat lam la ai Mara Raw Sakramentu Chyeju Kumla gaw anhte a myit masin kraw salum hpe jasan jaseng ya nna simsa ai hte sak hkrung hkawm sa shamu shamawt lu shangun ai. Mungkan shinggyim tara dara, tara jeyang ai kaw sa ai masa hku n rai, Karai Kasang a tsaw ra matsan dum lama ai hte shalan shabran, jasan jaseng hkam la ai rai nga ai" nga nna mung sang lang da ai.

Shut hpyit ai majaw tengman myit malai hte sit sang tang ban, hpyi nem ai wa gaw mara dat hkyamsa hpe hkam la mayu ai. Shada mara hkyam sa ya hkat ga. Shaloi tengman simsa lam hkam la lu na ga ai, nga nna mung shadum jahprang da ai."Shut Hpyit Ai Wa Ngai Hpe Matsan Dum La E Law."Ndai tawng ban akyu hpyi ga hpe hkring mi sumru dinglik let anhte a myit masin ni hpe hkyen laja nga ga, anhte a myit masin salum hpaw let Karai Kasang a chyeju kumba kaba hpe hkam la gaw, nga nna hpang jahtum shadum let Wa Sarabyin Francis, shi a mungga hpe ginchyum dat shangut da ai.

 

Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2023-03/pope-with-repentant-trusting-hearts-we-receive-gift-god-s-mercy.html

 

Add new comment

9 + 6 =